ەلوردا تورىندە ءوتىپ جاتقان قازاقستان مۇسىلماندارى ءدىني باسقارماسىنىڭ جۇلدەسى ءۇشىن ۇيىمداستىرىلعان قازاق كۇرەسىنەن V رەسپۋبليكالىق تۋرنير ءىرى كولەمدەگى قايىرىمدىلىق شاراسىنا ۇلاستى, دەپ حابارلايدى muftyat.kz.
ايتۋلى شارا بارىسىندا ەلوردامىزداعى قارتتار ءۇيى مەن SOS بالالار ۇيىنە, سونداي-اق شۇعىل تۇردە وتا جاسالۋى كەرەك ءۇش جاسار ءسابيدىڭ اناسى مەن تۇرمىس تاۋقىمەتىن تارتىپ جۇرگەن ون بالالى اناعا 1 000 000 تەڭگەدەن قايىرىمدىلىق قاراجاتى بەرىلدى.
ايتا كەتەيىك, ءدۇبىرلى دودا اياسىندا ورىن العان قايىرىمدىلىق شاراسى بيلەتتەن تۇسكەن قارجىعا جانە «زەكەت» قورىنىڭ استانا قالاسىنداعى وكىلدىگى مەن «ۋاقىپ» قايىرىمدىلىق قورى اتسالىسۋىمەن جۇزەگە استى.
سپورت دوداسىن تاماشالاۋعا كەلگەن ەلوردالىق اعايىن قمدب-نىڭ ۇيىمداستىرۋىمەن وتكەن ءىس-شاراعا ءدان ريزاشىلىعىن ءبىلدىرىپ, العىستارىن جاۋدىرىپ جاتتى.