ەلباسىنىڭ «بولاشاققا باعدار – رۋحاني جاڭعىرۋ» اتتى ماقالاسىنان تۋىنداعان «وزگەرىستەردى وزىڭنەن باستا» كىشى باعدارلاماسىن وڭىرلەردە جۇزەگە اسىرىلۋىنا جاڭا سەرپىن بەرۋ ماقساتىندا ىسساپارمەن كەلگەن اگەنتتىكتىڭ جۇرتشىلىقپەن بايلانىس جونىندەگى دەپارتامەنتىنىڭ ديرەكتورى ارمان بەردالين جانە رەسپۋبليكالىق ارنايى مونيتورينگ توبىنىڭ مۇشەسى, ەلىمىزگە بەلگىلى ەتنوديزاينەر ىرزا تۇرسىنزادا اگەنتتىكتىڭ اۋماقتىق دەپارتامەنتى قىزمەتشىلەرىمەن بىرلەسىپ ءىسساپاردىڭ ەكىنشى كۇنىن ماڭعىستاۋ اۋدانى شەتپە سەلوسىندا جالعاستىردى.
ارنايى مونيتورينگ توبىنىڭ وكىلدەرى اۋداننىڭ اكتيۆتەرىمەن كەزدەسۋ وتكىزىپ, قىزمەتتەرىمەن تانىسىپ, رەسپۋبليكالىق ارنايى مونيتورينگ توبىنىڭ ماقساتى مەن مىندەتتەرىنە, سىبايلاس جەمقورلىققا قارسى ءىس-قيمىلدى ءتيىمدى جۇرگىزۋ ءۇشىن, قوعامدا سىبايلاس جەمقورلىققا قارسى مادەنيەتتى قالىپتاستىرۋ ماقساتىندا ءار قىزمەتشى وزگەرىستى وزىنەن باستۋ كەرەكتىگىن ايتتى. سونداي-اق, Facebook الەۋمەتتىك جەلىسىندەگى جەكە پاراقشاسىنا كەز-كەلگەن تۇرعىننىڭ ءوز كوكەيىندەگى وي-پىكىرىن جولداۋعا تولىق مۇمكىندىگى بار ەكەنىن, جۇرتىشىلىقپەن كەرى بايلانىس مەحانيزمدەرىن جەتىلدىرۋ باعىتىنداعى قولعا الىنعان باستامالار ۋاكىلەتتى ورگاننىڭ اشىقتىعىنىڭ دالەلى ەكەنىن اتاپ ءوتتى.
ءىسساپار بارىسىندا قوناقتار كەزدەسۋدى ماڭعىستاۋ اۋداندىق اۋرۋحاناسىندا جالعاستىردى. كەزدەسۋ بارىسىندا 2011 جىلى پايدالانۋعا بەرىلگەن عيمارتتىڭ قابىرعالارى شىتىناپ, قۇلاپ, سالىنعانىنا از ۋاقىت بولسا دا, ساپاسى سىن كوتەرمەي تۇرعاندىعى انىقتالدى. سونداي-اق ارنايى دەلەگاتسيا اۋداننىڭ ارنايى مونيتورينگ توپ مۇشەلەرىنىڭ ۇسىنىسى بويىنشا بيىل عانا پايدالانۋعا بەرىلگەن №7 مەكتەپ ليتسەيىنە بارىپ, قۇرىلىس ساپاسىمەن تانىستى. انىق بولعانداي, ساپاسى سىن كوتەرمەيتىن عيماراتقا تاعار ءمىن وتە كوپ. ءبىر وكىنىشتىسى, ساپاسىز سالىنعان مەكتەپتە بالالار ءبىلىم الۋدا. ودان سوڭ, اۋداندىق حالىققا قىزمەت كورسەتۋ ورتالىعىنا بارعان قوناقتار اۋداندىق ارنايى مونيتورينگ توبىنىڭ باستاماسىمەن بۇل جەردەن دە بىرنەشە ولقىلىق تاۋىپ, مەكەمە باسشىلىعىنا بىرقاتار ەسكەرتۋلەر جاسادى. ءىسساپار سوڭىندا ماڭعىستاۋ اۋداندىق تەحنيكالىق كوللەدجىنە كەلگەن ارنايى توپ ستۋدەنتتەرمەن, ۇستازدارمەن كەزدەسىپ, ۇسىنىس-پىكىرلەرىن تىڭداپ قايتتى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى