ەرلىك ەشقاشان ۇمىتىلمايدى. ۇرپاقتار ساناسىندا ەستەلىك بولىپ جاڭعىرىپ تۇرا بەرەدى. بۇگىن قالا كۇنى مەرەكەسى اياسىندا «جەڭىس» ساياباعىندا تاريحي ەرلىك دارىپتەلدى.
اتاپ ايتساق, اۋعان سوعىسى ارداگەرلەرىنە ارنالعان ەسكەرتكىش اشىلىپ, كوپشىلىك وسى ءبىر يگى باستاماعا كۋا بولدى. ەسكەرتكىشتىڭ اشىلۋ سالتاناتىنا حالىق قاھارمانى, اۋعان سوعىسىنىڭ ارداگەرى, پارلامەنت ءماجىلىسىنىڭ دەپۋتاتى باقىتجان ەرتاەۆ پەن اۋعان سوعىسىنىڭ ارداگەرى, پارلامەنت ءماجىلىسىنىڭ دەپۋتاتى, «قازاقستان ارداگەرلەرى» قاۋىمداستىعىنىڭ توراعاسى باقىتبەك سماعۇل ارنايى قاتىسىپ, نىساننىڭ لەنتاسىن قيدى. بۇدان كەيىن ءسوز الىپ, وتكەن كۇننىڭ ورنى تولماس وكىنىشىن شەجىرەلەدى. كەزىندە اۋعانستان جەرىندەگى اسكەري ءىس-قيمىلدارعا جامبىل وبلىسىنان 2236 جاۋىنگەر قاتىسىپ, اسكەري قاقتىعىستار كەزىندە 71 جاس ازاماتتىڭ قازا تاپقانىن, بۇل ارقاشان ورنى تولماس وكىنىش ەكەنىن جەتكىزدى.
سونىمەن قاتار, بۇگىن «جەڭىس» ساياباعىندا چەرنوبىل اتوم ەلەكتر ستانتسياسىنداعى اپاتتى زالالسىزداندىرۋعا قاتىسۋشىلارعا ارنالعان ەسكەرتكىش اشىلدى. سالتاناتتى شاراعا قازاقستان رەسپۋبليكاسى چەرنوبىل ارداگەرلەرى جانە مۇگەدەكتەرى قوعامدىق بىرلەستىكتەرىنىڭ ۇيلەستىرۋ كەڭەسى فيليالىنىڭ توراعاسى باقىتجان اشىرباەۆ پەن جامبىل وبلىستىق چەرنوبىل وداعى قوعامدىق بىرلەستىگىنىڭ مۇشەسى ۆلاديمير حوروشين قاتىستى. ايتا كەتەيىك, بيىل چەرنوبىل اتوم ەلەكتر ستانتسياسىنداعى اپاتتىڭ ورىن العانىنا 32 جىل. عالامدىق ءىرى جارىلىستىڭ زاردابىن جويۋعا 800 مىڭداي ادام قاتىسقان. ونىڭ ىشىندە 32 ازامات قازاقستاندىق بولسا, 1200 ادام جامبىل وبلىسىنان ەدى.
كەشەگى ەر ەتىگىمەن قان كەشىپ, ات اۋىزدىعىمەن سۋ ىشكەن الماعايىپ سوعىس كەزىندە جەڭىس كۇنىن جاقىنداتۋعا تىل ەڭبەككەرلەرى دە اتسالىستى. كۇن دەمەي, ءتۇن دەمەي مايدان دالاسىنداعى ەرلەرگە ەڭبەگىمەن رۋح بەرگەن ەڭبەك ارداگەرلەرىنە ارنالىپ بۇگىن «جەڭىس» ساياباعىنان ەسكەرتكىش اشىلدى. تىل ەڭبەككەرلەرىنە ارنالعان ەسكەرتكىشتىڭ اشىلۋ سالتاناتىندا جانىبەك مايقانوۆ جانە رايسا جاندوسوۆا سىندى تىل ارداگەرلەرى كوز الىپ, ولاردىڭ ەڭبەكتەگى ەرلىك جولىنا توقتالدى. بۇدان كەيىن ارداگەرلەر ەسكەرتكىشتىڭ لەنتاسىن قيىپ, ەسكەرتكىشكە گۇل شوقتارىن قويدى.
حاميت ەسامان,
«ەگەمەن قازاقستان»
جامبىل وبلىسى