سىرتقى ىستەر ءمينيسترى قايرات ءابدىراحمانوۆ پەن دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس گەبرەيەسۋس استانادا وتكەن مەديتسينالىق-سانيتارلىق العاشقى كومەك جونىندە جاھاندىق كونفەرەنتسيانىڭ قورىتىندىلارىن تالقىلادى, دەپ حابارلايدى ءسىم ءباسپاسوز قىزمەتى.
حالىقارالىق قوعامداستىق وسىنداي بەدەلدى الەمدىك فورۋمدى ۇيىمداستىرۋعا, دەنساۋلىق ساقتاۋ جۇيەسىنە قولداۋ كورسەتۋگە جەكە نازار اۋدارعانى ءۇشىن پرەزيدەنت نۇرسۇلتان نازارباەۆقا ريزاشىلىعىن ءبىلدىرىپ, بۇنداي ءىس-شارانى قر ۇكىمەتى مەن دەنساۋلىق ساقتاۋ مينيسترلىگى تاراپىنان جاقسى ۇيىمداستىرىلۋىن اتاپ وتۋدە.
كەزدەسۋ بارىسىندا تاراپتار 25 قازاندا ءبىراۋىزدان فورۋم قاتىسۋشىلارىمەن قابىلدانعان استانا دەكلاراتسياسىنىڭ ماڭىزدىلىعىن اتاپ ءوتتى. قۇجاتتا ساپالى جانە ۋاقىتىلى مەديتسينالىق كومەك كورسەتۋدى قامتاماسىز ەتەتىن زاماناۋي جەتىستىكتەر مەن تەحنولوگيالاردىڭ قولدانۋىن ەسكەرە وتىرىپ, 1978 جىلعى الما-اتا دەكلاراتسياسىنىڭ مىندەتتەمەلەرىن ورىنداۋدا اينىماستىعىن كورسەتەدى. 40 جىل بۇرىن الماتىدا ماقۇلدانعان بۇل قۇجات, دەنساۋلىق ساقتاۋ جۇيەسىنىڭ العاشقى مەديتسينالىق-سانيتارلىق كومەككە نازار اۋدارا وتىرىپ, الەمدەگى دەنساۋلىق ساقتاۋ جۇيەسىن تۇپكىلىكتى دامىتۋعا نەگىز قالاعان.
ت. گەبرەيەسۋس قازاقستاننىڭ جاھاندىق دەڭگەيدە العاشقى مەديتسينالىق-سانيتارلىق كومەكتى دامىتۋعا قوسقان ۇلەسىن اتاپ ءوتتى. كەزدەسۋ بارىسىندا تاراپتار 2019 جىلدىڭ مامىرىندا جەنەۆادا وتەتىن دۇنيەجۇزىلىك دەنساۋلىق ساقتاۋ اسسامبلەياسىنىڭ ددسۇ-نىڭ استانا دەكلاراتسياسى نەگىزىندە قابىلداناتىن شەشىمنىڭ پەرسپەكتيۆاسىن قابىلداۋ مۇمكىندىگىن تالقىلادى. سونىمەن قاتار, 2019 جىلدىڭ قىركۇيەگىندە نيۋ-يوركتە دۇنيەجۇزىلىك دەنساۋلىق ساقتاۋدى قامتۋ جونىندەگى بۇۇ باس اسسامبلەياسىنىڭ جوعارى دەڭگەيدەگى كەزدەسۋ رەزوليۋتسياسىنىڭ ۇسىنىلۋى جوسپارلانۋدا.