رەسپۋبليكالىق اقپاراتتىق توپتىڭ مۇشەلەرى لاتىن گرافيكاسىنا كوشۋگە بايلانىستى سەمينار ۇيىمداستىرىپ, ونى ەنگىزۋدىڭ العىشارتتارى مەن ەملە ەرەجەلەرى جايلى اڭگىمەلەندى.
اقپاراتتىق توپ مۇشەلەرىنىڭ ايتۋلارىنا قاراعاندا احمەت بايتۇرسىنوۆ اتىنداعى ءتىل ءبىلىمى ينستيتۋتى جاڭا الفاۆيتكە نەگىزدەلگەن قازاق ءتىلى ەملەسىنىڭ ەرەجەسىن قۇراستىرىپتى.
«قازاق ءتىلى ءالىپبيىن لاتىن گرافيكاسىنا كوشىرۋ جۇمىستارىمەن ۇلتتىق كوميسسيا اينالىسادى. لاتىن قارپىنە كوشىرۋ جوسپارى كەزەڭ-كەزەڭمەن اتقارىلىپ, 2025 جىلى تولىق اياقتالادى. ۇلتتىق كوميسسيا جانىنان ورفوگرافيالىق, تەرمينولوگيالىق, ادىستەمەلىك, تەحنيكالىق-اقپاراتتىق جۇمىس توپتارى قۇرىلعان», دەدى جينالعاندار الدىندا سويلەگەن سوزىندە ل. گۋميلەۆ اتىنداعى ەۇۋ قازاق ءتىل ءبىلىمى كافەدراسىنىڭ پروفەسسورى بەكجان ءابدۋالي ۇلى. كەلەسى جىلدان باستاپ مەكتەپالدى سىنىپتاردان 11 سىنىپقا دەيىنگى وقۋلىقتار بىرىندەپ ساراپتامادان وتەدى. مامانداردىڭ بىلىكتىلىگىن ارتتىرۋ وسىنداي جاڭاشىلدىقتارمەن ۇيلەستىرىلەدى.
سەمينار اياسىندا لاتىنعا كوشۋ, الدا تۇرعان پروبلەمالار, ونى شەشۋدىڭ جولدارى, قازاق ءتىلىنىڭ ەملە ەرەجەسىنە بايلانىستى ماسەلەلەر تالقىلاندى. جيىنعا قاتىسۋشىلاردى ادام ەسىمدەرىنىڭ جازىلۋى, كيريلل الفاۆيتىندە كەتكەن ولقىلىقتاردى شەشۋ جولدارى ەرەكشە قىزىقتىردى.
وبلىستىق تىلدەردى دامىتۋ باسقارماسىنىڭ ءبولىم جەتەكشىسى اسەم سۇلەيمەنوۆا لاتىن گرافيكاسىنا بىرتىندەپ كوشۋ شارالارى جايلى باياندادى. لاتىن قارپىن وقىتاتىن كۋرس جۇمىس ىستەيدى. وعان كەز كەلگەن ادام ەرىكتى تۇردە قاتىسا الادى. قازاق ءالىپبيىن كيريلليتسادان لاتىنعا كوشىرۋدىڭ قاجەتتىلىگى مەن ماڭىزى جەر-جەرلەردە تۇسىندىرىلۋدە. «يۆۋشكا» بالاباقشاسىنىڭ مەڭگەرۋشىسى گۇلبانۋ قاسەنوۆا بۇلدىرشىندەر لاتىن ءالىپبيىن ءۇش ايدان بەرى يگەرىپ جاتقانىن جەتكىزدى.
اقپاراتتىق توپتىڭ مۇشەلەرى جۇمىس ساپارلارىن اققايىڭ, تايىنشا اۋداندارىندا جالعاستىردى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى