«قازاقستان رەسپۋبليكاسىنىڭ تۋريستىك قىزمەتى تۋرالى كەيبىر زاڭنامالىق اكتىلەرىنە تولىقتىرۋلار مەن وزگەرتۋلەر ەنگىزۋ تۋرالى» قازاقستان رەسپۋبليكاسىنىڭ كىرۋ جانە ىشكى ءتۋريزمىن دامىتۋدىڭ 2019-2023 جىلدارعا ارنالعان مەملەكەتتىك باعدارلاماسىنىڭ جوباسىن تالقىلاۋعا بايلانىستى «اتامەكەن» ۇكپ, مەملەكەتتىك ورگاندار جانە تۋريزم سالاسىنىڭ وكىلدەرى الماتىدا «قازاقستان» قوناق ءۇيىنىڭ ءماجىلىس زالىندا باس قوستى.
شاراعا مادەنيەت جانە سپورت ۆيتسە-ءمينيسترى ەرلان قوجاعاپانوۆ, تۋريزم سالاسى بويىنشا زاڭ جوباسىن ازىرلەگەن توپتىڭ جەتەكشىسى گۇلنارا قۇربانباەۆا, شتابتىڭ ۇيلەستىرۋشىسى ەركەبۇلان حاسەنوۆ, ت.ب. جاۋاپتى ماماندار قاتىسىپ, ەلىمىزدە ءتۋريزمدى دامىتۋدىڭ كەلەلى ماسەلەلەرى بويىنشا پىكىرتالاس وتكىزدى.
بۇگىندە ەل ەكونوميكاسىنىڭ درايۆەرى رەتىندە دامۋ باعدارىن ۇستانىپ وتىرعان سالا كەشەندى وزگەرىستەردى قاجەت ەتەدى. ماماندار پىكىرىنشە, ىشكى جانە سىرتقى ءتۋريزمدى دامىتۋدا ەلىمىزدە مۇمكىندىك مولىنان. قازاقستان تابيعي تارتىمدىلىعى, ىشكى تۇراقتى جاعدايلارىمەن كەز كەلگەن ساياحاتشى ءۇشىن قاۋىپسىز اۋماق بولىپ تابىلادى.
وسى ورايدا مادەنيەت جانە سپورت ۆيتسە-ءمينيسترى ەرلان قوجاعاپانوۆ كەز كەلگەن تۋريست بىرىنشىدەن, ساياحاتشىلاپ كەلەتىن ەل تۋرالى كەڭىنەن مالىمەت الۋدى قاراستىرادى. وسى تۇرعىدان العاندا قازاقستان تابيعاتى ەلىمىزگە ساياحاتتاپ كەلەتىن تۋريست ءۇشىن تارتىمدى ايماق. مەملەكەت باسشىسى اتاپ وتكەنىندەي, بىزدە ورمان دا, كول دە, تەڭىز بەن دالا دا بارشىلىق. مىنە, وسىناۋ كەرەمەت بايلىقتى وزگەلەرگە كورسەتۋ ءۇشىن بارلىق مۇمكىندىكتەردى قاراستىرۋىمىز قاجەت, دەدى.
سالا ماماندارىنىڭ پىكىرتالاسىن تۋعىزعان تۋريزم ماسەلەسىنە قاتىستى جوبا 2023 جىلعا قاراي ء جىو ءتۋريزمنىڭ ۇلەسىن كەم دەگەندە 8 پايىزعا جەتكىزۋدى كوزدەيدى. تۋريستىك رەسۋرستاردى دامىتۋ, تۋريستىك دەستيناتسيالاردىڭ جانە نىسانداردىڭ كولىكتىك قولجەتىمدىلىگىن قامتاماسىز ەتۋ, تۋريستىك ونىمدەردىڭ جانە قىزمەتتەردىڭ ساپاسىن, قولجەتىمدىلىگىن ارتتىرۋ, قولايلى تۋريستىك ورتا جۇيەسىن ءتۇزۋ, ىشكى جانە حالىقارالىق نارىقتاردا ەلدىڭ تۋريستىك الەۋەتىن ارتتىرۋ, تۋريستىك سالانى باسقارۋ جانە دامۋىن مونيتورينگىلەۋ جۇيەسىن جەتىلدىرۋ سياقتى كەشەندى ماسەلەلەر شەشىمىن تابۋعا ءتيىستى. ال 2023 جىلعا قاراي ەلىمىزگە كەلەتىن تۋريستەر سانىن 9 ملن, ال كىرمە تۋريزمدەگى ۇلەسىن 3 ملن, ىشكى تۋريستتەردى 8 ملن ادامعا جەتكىزۋدى كوزدەيدى. مۇنىمەن قاتار تۋريزم سالاسىندا جۇمىس ىستەيتىندەر 650 مىڭعا جەتۋى ءتيىس. وسىنداي ماقساتتى مىندەتتەردى قاراستىرىپ وتىرعان جوبا اياسىندا ماركەتينگ پەن برەندينگتى, ينفراقۇرىلىمداردى دامىتۋدىڭ ماڭىزى زور.
ەلۆيرا سەرىكقىزى,
«ەگەمەن قازاقستان»
الماتى