ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «ەۋرازيا حالىقتارىنىڭ تاريحي-مادەني مۇرالارىن زەرتتەۋدىڭ وزەكتى ماسەلەلەرى» اتتى XV ەۋرازيالىق عىلىمي فورۋم ءوتتى.
فورۋمنىڭ ماقساتى – ەلباسى ۇسىنعان رۋحاني جاڭعىرۋ كونتەكسىندە ەۋرازيا حالىقتارىنىڭ تاريحى, مادەني داستۇرلەرى مەن رۋحاني مۇرالارى ماسەلەلەرىن زەرتتەۋ جانە وزەكتەندىرۋ. جيىنعا وتاندىق جانە شەتەلدىك عالىمدار مەن رەسەي, بولگاريا, وزبەكستاننان كەلگەن ساراپشىلار قاتىسىپ, ورامدى ويلارى مەن پايىمدى پىكىرلەرىن ورتاعا سالدى.
«بۇل فورۋم ءداستۇرلى تۇردە وتكىزىلۋىمەن جانە عىلىم سالاسىندا ەلەۋلى ەڭبەك ەتىپ جۇرگەن عالىمداردىڭ باسىن قوسۋىمەن ەرەكشەلەنەدى. ءداستۇرلى دەپ اتاۋىمنىڭ دا سىرى بار, سەبەبى بيىل حV مارتە ۇيىمداستىرىلىپ وتىر. وتاندىق جانە شەتەلدىك عالىمدار جيىلعان بۇگىنگى باسقوسۋدىڭ ماڭىزى زور. سونىمەن قاتار شارا اياسىندا «گۋميلەۆ وقۋلارى» دا ۇيىمداستىرىلادى.
ەۋرازيالىق عىلىمي فورۋم وقۋ-ادىستەمەلىك ەمەس, سونىمەن قاتار عىلىمي-تاجىريبەلىك باعىتتى دا ۇستانادى. سوندىقتان دا وسى كۇندەرى قازاقستان تاريحشىلارىنىڭ ءVى كونگرەسى ءوتىپ, سونىڭ اياسىندا, ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ نەگىزىندە جارىق كورگەن بىرنەشە كىتاپتىڭ تۇساۋكەسەرى وتكىزىلەتىنىن ايتا كەتكەن ابزال. وسى ىسپەتتى ماڭىزدى ءماسليحاتتار ەۋرازيا حالىقتارىنىڭ تاريحى مەن تامىرىن تانىپ-بىلۋگە, حالىقتار دوستىعىن نىعايتا تۇسۋگە سەرپىن بەرەرى ءسوزسىز», دەدى ل.ن.گۋميلەۆ اتىنداعى ەۇۋ رەكتورى, ۇعا اكادەميگى ەرلان سىدىقوۆ.
ەرلان ءباتتاش ۇلى تىزگىنىن ۇستاعان جيىندا تاريح عىلىمدارىنىڭ دوكتورى, پروفەسسور, ءا.مارعۇلان اتىنداعى ارحەولوگيا ينستيتۋتىنىڭ استانا قالاسى فيليالىنىڭ باس عىلىمي قىزمەتكەرى, گەرمان ارحەولوگيا ينستيتۋىنىڭ كوررەسپوندەنت-مۇشەسى زەينوللا ساماشەۆ «ەرتە ساق مادەني كەشەنىنىڭ قالىپتاسۋى», مەملەكەت تاريحى ينستيتۋتىنىڭ ديرەكتورى, تاريح عىلىمدارىنىڭ دوكتورى, پروفەسسور بۇركىتباي اياعان «قازاق مەملەكەتتىلىگىنىڭ تاريحى تۋرالى جاڭا دەرەكتەر: ءابىلحايىر شايباني قوزعالىسىنىڭ باعىتى» تاقىرىبىندا بايانداما جاسادى. ل.ن.گۋميلەۆ اتىنداعى ەۇۋ قازاقستان حالقى اسسامبلەياسى كافەدراسىنىڭ مەڭگەرۋشىسى, ەكونوميكا عىلىمدارىنىڭ دوكتورى, پروفەسسور اناتولي باشماكوۆ «قازاقستاننىڭ وزىندىك الەۋەتى جانە قوعامدىق سانانى جاڭعىرتۋ: سينەرگيانىڭ اسەرى» جونىندە اڭگىمە وربىتسە, ش.ءۋاليحانوۆ اتىنداعى تاريح جانە ارحەولوگيا ينستيتۋتىنىڭ ديرەكتورى, تاريح عىلىمدارىنىڭ دوكتورى, پروفەسسور زيابەك قابىلدينوۆ «حVIII- حح عع. وتان تاريحىنىڭ وزەكتى ماسەلەلەرى» تاقىرىبىندا ءسوز سويلەدى.
سونداي-اق بولگاريادان كەلگەن پروفەسسور كامەن ۆەليچكوۆ «جان-جاقتىلىقتىڭ بىرلىك ءپرينتسيپى: ەۋروپالىق ۇلگى» تاقىرىبى توڭىرەگىندە بايانداسا, رەسەيدەن كەلگەن تاريح عىلىمدارىنىڭ كانديداتى, ءنوۆوسىبىر مەملەكەتتىك ۋنيۆەرسيتەتىنىڭ دوتسەنتى ولەگ ميتكو ء«بىزدىڭ داۋىرىمىزدەگى ءبىرىنشى مىڭجىلدىقتىڭ ءبىرىنشى جارتىسىنىڭ سوڭىنداعى التايلىق تايپالاردىڭ شىعىس ەۋروپا دالاسىنا قونىس اۋدارۋىنىڭ ارحەولوگيالىق دالەلدەرى» تاقىرىبىندا تارتىمدى اڭگىمەلەدى.
فورۋم اياسىندا جەكە باعدارلاما بويىنشا وزگە دە شارالار ءوتىپ, عالىمدار سەكتسيا ماجىلىستەرىندە باياندامالار جاسادى.
ۇلاربەك نۇرعالىم ۇلى,
«ەگەمەن قازاقستان»