امەريكالىق ەرىكتى ميريام گرينفيلد قاراعاندى وبلىسى, نۇرا اۋدانىنىڭ №3 كيەۆكا ورتا مەكتەبىنىڭ وقۋشىلارىنا 1 ايدان استام ۋاقىت بويى اعىلشىن ءتىلىن ۇيرەتىپ كەلەدى. قازاقستانعا كەلگەنىنە كوپ ۋاقىت بولماسا دا, اۋىل تۇرعىندارىمەن دوستاسىپ, وقۋشىلاردىڭ سۇيىكتى مۇعالىمدەرىنە اينالىپ ۇلگەرگەن.
وسى جىلى العاش رەت جۇزەگە اسقان «English for Jastar» جوباسى بويىنشا 9 شەتەلدىك جانە 146 قازاقستاندىق ەرىكتى ەلىمىزدىڭ مەكتەپ وقۋشىلارىنا اعىلشىن ءتىلىن ۇيرەتۋگە, سويلەۋ داعدىلارىن دامىتۋعا كومەكتەسۋ ءۇشىن 2 ايعا شالعاي اۋىلدارعا اتتانعان. سولاردىڭ ءبىرى – امەريكانىڭ نيۋ-يورك قالاسىنان كەلگەن ميريام.
ميريام بالالارعا تەك ساباق ۇيرەتىپ قانا قويماي, اۋىلدىڭ قايناعان تىرشىلىگىنە بەلسەنە ارالاسىپ ءجۇر. اۋىل تۇرعىندارى دا ونى ءجيى وتباسىلىق مەرەكەلەرگە, تويعا, بالىققا, ەكسكۋرسيالارعا قاتىسۋعا شاقىرىپ تۇرادى. ايتا كەتۋ كەرەك, ول الەۋمەتتىك جەلىلەردە دە وتە بەلسەندى اۋىلدا وتكەن ءار كۇنىمەن ينتەرنەت پاراقشاسىندا دوستارىمەن ءبولىسىپ تۇرادى. سونداي-اق ول بوس ۋاقىتىن جەرگىلىكتى جاتتىعۋ زالىندا يوگا جاتتىقتىرۋشىسى رەتىندە وتكىزەدى.
ميريام قازاقستانداعى وقۋشىلاردىڭ ءتارتىبىن ەرەكشە اتاپ ءوتتى: «وقۋشىلارىم كەرەمەت. وتە تاربيەلى, بىلىمگە قۇشتار, ساباقتا مۇقيات تىڭداپ, كوپ نارسە ۇيرەنۋگە تىرىسادى. كۇندە تاڭەرتەڭنەن باستاپ جۇزدەگەن بالا قۇشاقتاپ راحمەتىن ايتادى. مەن ءۇشىن ەڭ ۇلكەن جەتىستىك وسى. اۋىل تۇرعىندارى اقجارقىن, اشىق, وتە قوناقجاي. كەلەسى جىلى دا كەلۋگە قارسى ەمەسپىن».
سونداي-اق ەرىكتىلەر قاتارىندا گارۆارد ۋنيۆەرسيتەتىنىڭ ستۋدەنتى كەننەت پالمەر دە بار. ول قازىر قاراعاندى وبلىسىنىڭ وساكاروۆكا اۋدانىندا وقۋشىلارعا اعىلشىن ءتىلىن تەگىن ۇيرەتىپ ءجۇر. ودان وزگە ەرىكتىلەر ەلىمىزدىڭ تۇركىستان, اقمولا, اقتوبە, سولتۇستىك قازاقستان, قوستاناي, پاۆلودار, الماتى وبلىستارىنىڭ اۋىلدارىنا اتتانعان.