كۋرچاتوۆ قالاسىنداعى قازاقستان ۇلتتىق يادرولىق ورتالىعىندا ەلىمىزدەگى اقش ەلشىلىگىنىڭ وكىلدەرى, DTRA مەن DOE/NNSA ۇيىمدارىنىڭ ماماندارى مەن عالىمدارى باس قوسقان ارنايى جيىن بولىپ ءوتتى. القالى جيىن جاپپاي قىرىپ-جويۋ قارۋىن تاراتپاۋ جونىندەگى قازاقستان-اقش كەلىسىمشارتىنىڭ 25 جىل تولۋىنا ارنالدى.
وسى كەلىسىمشارتتان كەيىن قازاقستان مەن اقش قۇرلىقارالىق بالليستيكالىق راكەتالاردى جويدى. يادرولىق قارۋدى تاراتپاۋدى جانە اتوم سىناقتارىنان كەيىنگى ەل مەن جەر جاراسىن ەمدەۋدى قولعا الدى.
قازاقستاننىڭ بەيبىتشىلىك باعىتىنداعى قۇندى قۇجاتتارى ناننا-لۋگارا باعدارلاماسىنىڭ ورىندالۋىنا ىقپال ەتتى.
25 جىلدىق دوستىق ارىپتەستىك ارقاسىندا قازاقستان ۇلتتىق يادرولىق ورتالىعى مەن اقش-تىڭ قورعانىس جانە ەنەرگەتيكا مينيسترلىكتەرى اراسىندا تىعىز بايلانىس ورناتىلىپ, بۇرىنعى سەمەي يادرولىق سىناق پوليگونىن قاۋىپسىز جاعدايعا كوشىرۋ ماسەلەسى تالقىلاندى. يادرولىق اتوم قارۋى قالدىقتارى ەل اياعى بارمايتىن جەرلەرگە اۋىستىرىلدى.
– سەمەي يادرولىق سىناق پوليگونىندا اتقارىلعان جۇمىستارعا وراي, پوليگون اۋماعىنىڭ باسىم بولىگى تەكسەرىلدى, – دەدى ۇلتتىق يادرولىق ورتالىقتىڭ باس ديرەكتورى ەرلان باتىربەكوۆ, – بۇل پوليگون جەرىندەگى قازاقستان مەن كۇللى الەمگە ءتونىپ تۇرعان قاۋىپتى سەيىلتتىك. ينجەنەرلىك جانە فيزيكا تۇرعىسىنان الىپ قاراعاندا, جاعداي بىرقالىپتى.
اقش وكىلدەرى قاتىسقان جينالىستى قورىتىندىلاي كەلە, ەرلان باتىربەكوۆ بىلاي دەدى: «مىنە, 25 جىل ىشىندە ءبىز كوپتەگەن تاجىريبە جيناقتادىق. قازاق عىلىمىنىڭ دامۋى ءۇشىن بۇل اسا ماڭىزدى. الداعى ۋاقىتتا دا اقش پەن قازاقستان ارىپتەستىگى جالعاسا بەرەتىن بولادى».
راۋشان قابجانقىزى,
«ەگەمەن قازاقستان»
شىعىس قازاقستان وبلىسى, كۋرچاتوۆ قالاسى