تەمىرتاۋ قالاسىنىڭ ىرگەسىندە «جاۋىرتاۋداعى كەزدەسۋ» اتتى فورۋم-فەستيۆال ءوتتى. «رۋحاني جاڭعىرۋ» باعدارلاماسى اياسىندا ۇيىمداستىرىلعان مادەني شاراعا 100-دەن استام بەلسەندى جاس قاتىستى. ولاردىڭ اراسىندا ەرىكتىلەر, بلوگەرلەر, روبوت تەحنيكتەرى جانە باسقالار بولدى.
– بۇل جوبا ۇزاق مەرزىمگە – 2021 جىلعا دەيىن جوسپارلانعان. ءبىز وسىنداي فەستيۆالداردى ءتۇرلى تاقىرىپتار بويىنشا جىل سايىن وتكىزۋدى قولعا الماقشىمىز. بيىلعى شارانى جاستارعا ارناۋدى ءجون كوردىك. سپيكەرلەر رەتىندە تانىمال سپورتشىلاردى, بيزنەسمەندەر مەن تەولوگتاردى شاقىردىق. ولار شەبەرلىك سىنىپتار, سەمينارلار جانە جاستارعا تاجىريبەلىك دارىستەر وتكىزدى, – دەيدى تەمىرتاۋ قالالىق مادەنيەت جانە تىلدەردى دامىتۋ ءبولىمىنىڭ جەتەكشىسى ايجان شاكەنوۆا.
فەستيۆالدا جاستار ءۇشىن بي باسەكەسى, بەلسەندى ويىندار مەن ءتۇرلى سايىستاردان تۇراتىن تيمبيلدينگ باعدارلاماسى ۇيىمداستىرىلدى. سونىمەن قاتار شارا اياسىندا تەمىرتاۋ تاريحي-ولكەتانۋ مۇراجايىنىڭ قىزمەتكەرلەرى ءحىح عاسىردىڭ ورتا شەنىندەگى قازاق قىستاۋىن جاڭعىرتۋ جوباسىن ىسكە اسىردى. ولار مالعا ارنالعان قورا-قوپسى, اس ازىرلەيتىن, ءجۇن تازالايتىن, تەرى يلەيتىن جانە شي توقيتىن اۋماق جاساپ, سامان ءۇيدىڭ ماكەتىن قۇراستىردى.
– بۇل جوبا – ءبىزدىڭ كوپجىلدىق زەرتتەۋىمىزدىڭ ناتيجەسى. ادامدار قىستاۋلاردا كۇزدىڭ ورتاسىنان مامىردىڭ سوڭىنا دەيىن جىلدىڭ باسىم بولىگىن وتكىزگەن. ءبىزدىڭ اتا-بابالارىمىز قانداي جاعدايدا تۇرعانىن قايتا جاڭعىرتىپ كورسەتۋدى كوزدەدىك. ارينە سامان ءۇيدى سالا المادىق, تەك ونىڭ ماكەتىن جاسادىق. ىشكى جابدىقتار دا ايتارلىقتاي ۇقساس بولمادى. الايدا باسقا جادىگەرلەردىڭ بارلىعى سول كەزەڭگە ساي جاسالدى, – دەپ اتاپ ءوتتى مۇراجاي قىزمەتكەرى تاتيانا حمەليوۆا.
شارا بارىسىندا تەمىرتاۋ قالاسىنداعى جەكە سەكتوردىڭ تۇرعىندارى قويلارى مەن جىلقىلارىن بەرىپ, ۇيىمداستىرۋشىلارعا كوپ كومەك كورسەتتى. قوناقتاردى قىستاۋدىڭ ماڭىندا قارسى العان مۇراجاي قىزمەتكەرلەرىنە ارنالعان كيىمدەر دە ماڭايداعى اۋىلداردان جينالدى.
فەستيۆالدى قىزىقتاپ كەلگەن قوناقتارعا ساماۋرىننان شاي ۇسىنىلدى. سونىمەن قاتار ولار ەسكى تاسىلدەر بويىنشا ءجۇن ءتۇتىپ, شي توقىپ, اتا-بابالارىمىزدىڭ كونەدەن كەلە جاتقان كاسىبىنىڭ قىر-سىرىنا قانىقتى. ەڭ باستىسى, بيىل عانا تۇساۋىن كەسكەن فورۋم-فەستيۆالعا قاتىسۋشىلار ءبىر جارىم عاسىر بۇرىنعى كەزەڭگە ساياحات جاساپ, تاريحي سانانى جاڭعىرتىپ, رۋحاني مول ولجاعا كەنەلدى.
قايرات ءابىلدا,
«ەگەمەن قازاقستان»
قاراعاندى وبلىسى,
تەمىرتاۋ قالاسى