الماتىدا «قازپوشتانىڭ» 25 جىلدىعىنا وراي «جازىلۋشىلار كۇنى» ۇيىمداستىرىلدى.
«گازەت - حالىقتىڭ كوزى, قۇلاعى ءھام ءتىلى» دەپ ۇلت قايراتكەرى احمەت بايتۇرسىنوۆشا ايتقاندا, بۇگىنگى وقىرمان ءۇشىن اقپارات كوزى, جاڭالىقتىڭ تىنىسى بولىپ وتىرعان گازەت-جۋرنالداردىڭ وكىلدەرى الماتىداعى «Grand Park» ساۋدا ورتالىعىندا جاڭادان اشىلعان «قازپوشتا» فيليالىندا ءوز ونىمدەرىنەن شاعىن كورمەلەر ۇيىمداستىرىپ, وقىرماندارمەن قاۋىشتى. فيليال ديرەكتورى ەرجان تاسمۇحان «قازپوشتا» قىزمەتىنىڭ تۇتىنۋشىلارى مەن باق وكىلدەرىن ايتۋلى كۇنمەن قۇتتىقتاپ, سەرىكتەستىك سالاداعى جەتىستىكتەرگە العىسىن ءبىلدىردى. شيرەك عاسىرعا جۋىق تاريحى بار وتاندىق پوشتا قىزمەتىنىڭ بارىسىنا توقتالىپ, الداعى جوسپارلار جايىندا اقپارات بەرىپ ءوتتى. بۇگىندە الماتى قالاسىندا جۇزدەن استام «قازپوشتا» بولىمدەرى جۇمىس ىستەيدى.
الداعى ۋاقىتتا زاماناۋي جابدىقتالعان تاعى دا 4 فيليال اشىلاتىن بولادى. جاڭا زامانعى ۇدەرىستەرگە وراي «قازپوشتا» جىلدام ءارى سەنىمدى تاسىمالداۋشى رەتىندە نارىقتاعى جوعارى سۇرانىسقا يە كومپانيا مارتەبەسى ءۇشىن ارقاشان قىزمەت ساپاسىن جەتىلدىرىپ, تۇتىنۋشىلارعا قولايلى جاعدايلار تۋعىزىپ وتىرۋدى ماقسات ەتەدى.
شارا اياسىندا اۋەزوۆ اۋدانى اكىمىنىڭ ورىنباسارى قايرات داستان ۇلى, «ەگەمەن قازاقستان», «كازاحستانسكايا پراۆدا», «مىسل» جۋرنالى, «بالدىرعان» جۋرنالى, «درۋجنىە رەبياتا», ت.ب. باسىلىمداردىڭ وكىلدەرى ءسوز سويلەپ, «قازپوشتا» قىزمەتكەرلەرىنە قۇتتىقتاۋ لەبىزدەرىن ءبىلدىردى. «ەگەمەننىڭ» تۇراقتى وقىرمانى, اقىن جاراس سارسەك گازەتتىڭ وقىرمان ۇدەسىنەن شىعۋداعى وزگەرىستەرىن قۇپتايتىندىعىن ايتىپ, اقپارات ايدىنىنداعى قىزمەتىنە ءسات-ساپار تىلەدى. بۇگىندە زامان سۇرانىسىنا قاراي ىڭعايلانىپ بارا جاتقان گازەتتەر قاتارىنان تابىلاتىن ەل گازەتى جاڭا ايدارلارىمەن, تىڭ ماقالالارىمەن ەرەكشەلەنۋدە.
سۇقبات الاڭىنا اينالعان «قازپوشتا» فيليالىنداعى مەرەكەلىك شارا كونتسەرتتىك باعدارلاماعا ۇلاستى. ۇزدىك پوشتا قىزمەتكەرلەرىنە, سونىمەن قاتار تۇراقتى وقىرماندارعا ارنايى سىيلىقتار ۇلەستىرىلدى.
ەلۆيرا سەرىكقىزى,
«ەگەمەن قازاقستان»
الماتى