مادەنيەت جانە سپورت مينيسترلىگى ءتىل ساياساتى كوميتەتى جانە «مەملەكەتتىك ءتىلدى ۇيرەتۋ ەليتالىق كۋرسى» مادەني مەكەمەسىنىڭ ۇيىمداستىرۋىمەن دوستىق ۇيىندە «جەكسەنبىلىك مەكتەپتەردە قازاق ءتىلى مەن ۇلتتىق (انا) تىلدەردى جەدەلدەتە وقىتۋداعى وزەكتى ماسەلەلەر» تاقىرىبىندا رەسپۋبليكالىق عىلىمي-ادىستەمەلىك سەمينار-ترەنينگى ءوتتى.
قازاق ءتىلى مەن وزگە تىلدەردى وقىتۋدا يننوۆاتسيالىق ادىستەر مەن تەحنولوگيالاردى زەردەلەۋ, تاجىريبەگە ەنگىزۋ سياقتى كوكەيكەستى ماسەلەلەر سەميناردىڭ وزەگىنە اينالدى.
سەمينارعا قر مادەنيەت جانە سپورت مينيسترلىگى ءتىل ساياساتى كوميتەتى ءتىل ساياساتى باسقارماسىنىڭ ساراپشىسى گاۋھار مادانوۆا, «مەملەكەتتىك ءتىلدى ۇيرەتۋ ەليتالىق كۋرسى» مادەني مەكەمەسىنىڭ ديرەكتورى ساۋلە باقتىباەۆا, فيلولوگيا عىلىمدارىنىڭ دوكتورى, پروفەسسور باقىتجان حاسانوۆ, «قوعامدىق كەلىسىم» رمم الماتى قالاسى دوستىق ءۇيىنىڭ جۇمىسىن قامتاماسىز ەتۋ قىزمەتىنىڭ جەتەكشىسى جاننا شايمۇحانبەتوۆا, كۇردتەر قاۋىمداستىعىنىڭ توراعاسى كنياز ميرزوەۆ, پروفەسسور ايگۇل ساتبەكوۆا, ت.ب. ادىسكەر عالىمدار, ءتىل ماماندارى, ەتنومادەني بىرلەستىكتەر جانىنداعى جەكسەنبىلىك مەكتەپتەردىڭ مۇعالىمدەرى قاتىستى.
«مەملەكەتتىك ءتىلدى ۇيرەتۋ ەليتالىق كۋرسى» مادەني مەكەمەسىنىڭ ديرەكتورى ساۋلە باقتىباەۆا جەكسەنبىلىك مەكتەپتەردە قازاق ءتىلى مەن ۇلتتىق تىلدەردى جەدەلدەتە وقىتۋداعى كوكەيتەستى ماسەلەلەردى اتاپ ءوتتى. وسى ورايدا اتالعان مەكەمە تاراپىنان كەز كەلگەن ماسەلەنى ساراپتاپ, جان-جاقتى زەرتتەپ, ايقىنداۋعا بايلانىستى كەشەندى شارالار جۇزەگە اسۋدا.
جەكسەنبىلىك مەكتەپتەر مادەني-اعارتۋشىلىق جوبا رەتىندە مەكتەپ جاسىنا دەيىنگى بالالاردى, وقۋشىلار مەن ەرەسەكتەردى تىلگە باۋلۋمەن قاتار, تۋعان ەلدىڭ تاريحى, مادەنيەتى تۇرعىسىنداعى اقپاراتتارمەن قامتاماسىز ەتۋدى ماقسات ەتەدى.
اعىمداعى جىلى رەسپۋبليكالىق جانە ايماقتىق ۇلتتىق-ەتنومادەني بىرلەستىكتەر جانىنداعى جەكسەنبىلىك مەكتەپتەردە قازاق جانە انا تىلدەرىن وقىتۋ كۋرستارىندا 144 توپ قۇرىلدى. وندا بۇگىندە 26 ۇلتتىڭ وكىلدەرى ءبىلىم الۋدا. ولاردىڭ 70 پايىزىن مەكتەپ وقۋشىلارى مەن جاستار قۇرايدى. ال جەكسەنبىلىك مەكتەپتەردە قازاق ءتىلى مەن وزگە تىلدەردى جەدەلدەتە وقىتۋدىڭ وزەكتى ماسەلەلەرىن شەشۋ ۋاقىت تالابى. بۇل ينستيتۋتسيونالدى وقۋ ورنى ەمەس, قوسىمشا ءارى تەگىن ءبىلىم بەرەتىن مەكتەپتەر. جەكسەنبىلىك مەكتەپتەر ءبىر جۇيەگە كەلتىرىلگەن باعدارلامانى, جان-جاقتى قامتيتىن تۇجىرىمدامانى قاجەت ەتەدى. وسى ورايدا ماماندارعا دا كاسىبي قولداۋ قاجەت, ياعني ءتىل ۇيرەتۋدىڭ ءادىس-تاسىلدەرىنىڭ, ەتنوپەداگوگيكانىڭ جانە ەلتانۋ نەگىزدەرىمەن قاتار كاسىبي پسيحولوگيالىق كومەكتىڭ ماڭىزى زور. جەكسەنبىلىك مەكتەپتەر تىڭداۋشىلارىنىڭ جاسى دا, ءبىلىمى دە ءار ءتۇرلى كەلەتىندىكتەن, ولارمەن ءتىل تابىسۋ, ءتىل ۇيرەنۋگە دەگەن قىزىعۋشىلىعىن ارتتىرۋدا ۇلكەن شەبەرلىك قاجەت. وسى ورايدا ماماندار ماسەلەسىنە, وقىتۋ باعدارلاماسىنا, ارنايى وقۋ قۇرالدارىن ازىرلەۋگە ەرەكشە نازار اۋدارعان ءجون.
سەميناردا ادىسكەر-عالىمدار مەملەكەتتىك جانە وزگە دە ۇلت وكىلدەرىنىڭ تىلدەرىن وقىتۋدىڭ ءتيىمدى تەحنولوگيالارى مەن ءادىس-تاسىلدەرىمەن ءبولىسىپ, ەتنومادەني بىرلەستىكتەر جانىنداعى جەكسەنبىلىك مەكتەپتەردىڭ ۇزدىك مۇعالىمدەرى شەبەرلىك ساباقتارىن كورسەتتى.
ەلۆيرا سەرىكقىزى,
«ەگەمەن قازاقستان»
الماتى