قاراعاندىدا بەلگىلى ءانشى, سازگەر قوراباي ەسەنوۆتىڭ مەرەيتويلىق كونتسەرتى ءوتتى.
كەشكە ارنايى كەلىپ قاتىسقان وبلىس اكىمى ەرلان قوشانوۆ ءوزىنىڭ قۇتتىقتاۋ سوزىندە قوراباي ەسەنوۆ اندەرىنىڭ ۇلتتىق مۋزىكا ونەرىنىڭ التىن قورىنا ەنىپ, شىن مانىندە حالىق يگىلىگىنە اينالعانىن اتاپ ءوتتى.
– مەن ءسىزدىڭ شىعارماشىلىعىڭىزبەن بالا كەزىمنەن تانىسپىن. ءسىزدىڭ تالانتىڭىزدى دارىپتەيتىن ادامداردىڭ ءبىرىمىن. ءسىز ءبىزدىڭ, اعالارىمىزدىڭ كۋميرى بولعانسىز. ءسىزدىڭ اندەرىڭىز نەگىزىنەن سول ۋاقىتتاعى ءرومانتيزمدى سيپاتتايدى, ول كەزدەرى جاستار ءمولدىر, تازا سەزىمدەرگە, ماحابباتقا تولى بولاتىن. قوراباي اعا, حالىق ءسىزدى سول ءۇشىن جاقسى كورەدى, ءسىزدىڭ اندەرىڭىز قازاق راديوسىنىڭ التىن قورىندا ساقتالعان, – دەدى ەرلان قوشانوۆ.
ءوڭىر باسشىسى جەتپىسكە جاسى جەتكەن مەرەيتوي يەسىنىڭ يىعىنا شاپان جاۋىپ, سىي-قۇرمەت كورسەتتى.
شىعارماشىلىق كەشكە ءانشى عالىم مۇحامەدين, قر ەڭبەك سىڭىرگەن ءارتىسى, ءانشى سەرىك وسپانوۆ, قر ەڭبەك سىڭىرگەن قايراتكەرى جانعالي جۇزباەۆ جانە مەرەيتوي يەسىنىڭ شاكىرتى, ءانشى سەيىل اياعانوۆ سىندى ونەر سالاسىنىڭ مايتالماندارى قاتىسىپ, كەش كورىگىن قىزدىردى.
قوراباي ەسەنوۆ جاڭاارقا اۋدانىنىڭ تۋماسى. اۋەسقوي ءانشى-كومپوزيتوردىڭ ون جەتى جاسىندا جازعان «جاس قالام» ءانى وتكەن عاسىردىڭ 60-70-ءشى جىلدارى جاستار اراسىندا ەرەكشە تانىمال بولعان. وسى «جاس قالام» جانە «قوشتاسۋ» اندەرى كومپوزيتوردىڭ ەرەكشە تۋىندىلارىنا اينالىپ, ونىڭ ەسىمىن بۇكىل ەلگە ايگىلى ەتتى.
قايرات ءابىلدا,
«ەگەمەن قازاقستان»
قاراعاندى