«بايتەرەك» حولدينگىنىڭ مۇرىندىق بولۋىمەن «باسەكەگە قابىلەتتىلىك كوشباسشىلارى - ۇلتتىق چەمپيوندار 2.0» باعدارلاماسى باستالدى. باعدارلاما مەملەكەت باسشىسى نۇرسۇلتان نازارباەۆتىڭ «100 ناقتى قادام» ۇلت جوسپارىنىڭ 62-ءشى قادامىنا سايكەس جۇزەگە اسىرىلادى.
ۇيىمداستىرۋشىلاردىڭ حابارلاۋىنشا, حالىقارالىق وزىق تاجىريبەلەردى ەسەپكە الا وتىرىپ ازىرلەنگەن باعدارلامانىڭ ماقساتى – باسەكەگە قابىلەتتى, ەكسپورتقا باعىتتالعان جانە تەحنولوگيالىق وڭدەۋشى ونەركاسىپتەردى قۇرۋعا كومەكتەسۋ.
«Kazakhstan Project Preparation Fund» تاراپىنان تەحنيكالىق ەكونوميكالىق نەگىزدەمە جاساۋ, قازاقستاننىڭ دامۋ بانكى مەن «دامۋ» كاسىپكەرلىكتى دامىتۋ قورىنىڭ جەڭىلدىكپەن قارجىلاندىرۋدىڭ جانە پايىزدىق مولشەرلەمەنى سۋبسيديالاۋ, سونداي-اق «Kazyna Capital Management»-ءتىڭ ۇلەستىك قارجىلاندىرۋىنىڭ قۇرالدارىن پايدالانۋى, سونداي-اق «KazakhExport» كومپانياسىنىڭ قولداۋ شارالارى سىندى بىرقاتار كەشەندى جۇمىستار وسى باعدارلامانىڭ اياسىندا جۇرگىزىلمەك.
باعدارلاماعا قاتىسۋ ءۇشىن كاسىپورىندار بىرقاتار كريتەريلەرگە جاۋاپ بەرۋى ءتيىس. ونىڭ ىشىندە وڭدەۋ ونەركاسىبىنە ءوتىنىم بەرۋ, شتاتتا 100-دەن استام ادامنىڭ بولۋى جانە 300000 اەك-ءتىڭ جىلدىق كىرىسىنىڭ, ەكسپورتقا باعدارلانعان باعىتىنىڭ بولۋى, نارىقتا كەمىندە ءۇش جىل بولۋى سىندى تالاپتار بار.
باعدارلامانىڭ مەرزىمى بەس جىلدى قامتۋعا ءتيىس. ونىڭ ىشىندە ءۇش جىل - جۇزەگە اسىرۋعا, ەكى جىل – مونيتورينگكە جۇمسالادى. باعدارلامانىڭ شارتتارى مەن تولىق ءماتىنى, سونداي-اق تاپسىرىستىڭ ۇلگىسى «بايتەرەك» حولدينگىنىڭ رەسمي سايتىندا جاريالانعانىن ايتا كەتەيىك.
ارنۇر اسقار
«ەگەمەن قازاقستان»