باتىس قازاقستان وبلىسى اقجايىق اۋدانىنا قاراستى بازارشولان اۋىلىنداعى بۇرىنعى قىزىلجار ورتا مەكتەبى – وڭىردەگى تاريحى تەرەڭ ءبىلىم ورداسىنىڭ ءبىرى. ىرگەتاسى 1888 جىلى قالانعان مەكتەپتە اقىن جۇبان مولداعاليەۆ سىندى بەلگىلى تۇلعالار دا ءبىلىم العان. 2000 جىلدان بەرى عابدوللا ماحامبەتوۆتىڭ ەسىمىن يەلەنگەن مەكتەپ عيماراتى الدىندا جاقىندا وسى ۇستازدىڭ ەسكەرتكىش ءبيۋستى ورناتىلدى.
2000 جىلى 31 تامىزدا قازاقستان رەسپۋبليكاسى ۇكىمەتىنىڭ №1325 قاۋلىسىمەن قىزىلجار ورتا مەكتەبىنە عابدوللا ماحامبەتوۆ ەسىمى بەرىلگەن ەدى. عابدوللا ماحامبەتوۆ – قازاقتىڭ العاشقى كاسىبي مۇعالىمدەرىنىڭ ءبىرى, باتىس قازاقستان ءوڭىرىنىڭ ءبىلىم جۇيەسىنە ەرەكشە ەڭبەگى سىڭگەن تۇلعا بولاتىن.
عابدوللا ماحامبەتوۆ 1888 جىلى قازىرگى اتىراۋ وبلىسىنىڭ قىزىلقوعا اۋدانى اۋماعىندا دۇنيەگە كەلگەن. 1909 جىلى ورىنبور مۇعالىمدەر سەمينارياسىن تامامداپ, تۋعان جەرىندە كەلگەندە كەيىن بۇكىل قازاقتىڭ ماقتانىشىنا اينالعان ءسوز زەرگەرلەرى زەينوللا قابدولوۆقا, عابدول سلانوۆقا ساباق بەرگەن ەكەن. ول كەزدە قازىرگى اتىراۋ ورال وبلىسىنا, قىزىلقوعا ءوڭىرى تايپاق اۋدانىنا قارايتىن. 1932-1934 جىلدارى عابدوللا ماحامبەتوۆ تايپاق اۋدانىنىڭ بازارتوبە, 1934-1959 جىلدارى زەينەت دەمالىسىنا شىققانعا دەيىن قىزىلجار مەكتەبىندە ەڭبەك ەتتى. جيىرما جىل ديرەكتور بولىپ, وسى مەكتەپتى باسقاردى. 1940 جىلى قازاق سسر جوعارعى كەڭەسىنىڭ قۇرمەت گراموتاسىمەن, 1939 جانە 1949 جىلدارى سول كەزدەگى ەڭ جوعارى ناگرادا – لەنين وردەنىمەن ماراپاتتالدى.
عابدوللا ماحامبەتوۆ ەرەكشە ءبىلىمدى, مىنەزگە باي, حالىق اراسىندا اسا سىيلى مۇعالىم بولعان. ۇلى وتان سوعىسى جىلدارىندا تۇرمىس قيىنشىلىعىنان مەكتەپتەگى وقۋىن جالعاستىرا الماي قالعان وقۋشىلارىن ىزدەپ بارىپ, جاناشىرلىقپەن سويلەسىپ, وقۋىن جالعاستىرۋىن وتىنگەنىن سول كەزدىڭ كۋاگەرلەرى اڭىز ەتىپ ايتادى. قازاق سسر-ءىنىڭ ەڭبەك سىڭىرگەن مۇعالىمى, حالىق اعارتۋ ءىسىنىڭ وزاتى, رەسپۋبليكالىق دارەجەدەگى دەربەس زەينەتكەر 1967 جىلى ومىردەن ءوتتى. بىراق ۇستازدىڭ ەڭبەگىن جارتى عاسىر وتسە دە ۇمىتپاعان شاكىرتتەرى مەن ۇرپاقتارى ءوزى ەسىمىن يەلەنگەن مەكتەپ عيماراتى الدىندا ەسكەرتكىشىن ورناتتى. بۇل وقيعا قازاقستان پرەزيدەنتىنىڭ ۇستاز بەدەلىن ەرەكشە ايشىقتاعان جولداۋىمەن تۇسپا-تۇس كەلۋىنىڭ ءوزى تەگىن ەمەس.
- ەلباسى ن.ءا.نازارباەۆ «رۋحاني جاڭعىرۋ» باعدارلاماسىندا ء«بىز جاڭعىرۋ جولىندا بابالاردان ميراس بولىپ, قانىمىزعا سىڭگەن ىزگى قاسيەتتەردى قايتا تۇلەتۋىمىز كەرەك. بۇل تاريحتىڭ جاسامپاز بۇگىنگى كۇن مەن جارقىن بولاشاقتىڭ كوكجيەكتەرىن ۇيلەسىمدى ساباقتاستىراتىن ۇلت جادىنىڭ تۇعىرناماسى» دەگەن بولاتىن. «وتكەنىن بىلمەگەن ەلدىڭ بولاشاعى ب ۇلىڭعىر», كەشەگى ۇلى تۇلعا عابدوللا ماحامبەتوۆ ەسىمى بۇگىنگى مەكتەبىمىزدىڭ تاريحىندا التىن ارىپپەن جازۋلى, - دەدى ەسكەرتكىشتىڭ سالتاناتتى اشىلۋى كەزىندە اتالعان ءبىلىم ورداسىنىڭ باسشىسى قاناپيا تاسپاي.
ۇستازدى ۇلىقتاعان شاراعا اقجايىق اۋدانى اكىمىنىڭ ورىنباسارى اسقار ابۋعاليەۆ, اۋداندىق ارداگەرلەر كەڭەسىنىڭ توراعاسى سەرىك باقمانوۆ, وسى مەكتەپتى ءار جىلدارى بىتىرگەن تۇلەكتەر ارنايى كەلگەن ەكەن. عابدوللا ماحامبەتوۆتىڭ ۇرپاقتارى روزا مەن رازيا عابدوللاقىزى, نۇرجان عابدوللا ۇلى, كەلىنى, ارداگەر ۇستاز باقىتجامال قاجىباەۆا, اقىن تىلەس جازىقباەۆ تاعى باسقالار ءسوز سويلەپ, تاريحي تۇلعانىڭ تاعىلىمدى ىستەرى تۋرالى ەستەلىكتەردى ورتاعا سالدى. مەكتەپ وقۋشىلارى قۇرالبەك باقتىگەرەي, زۋلفيا ەرمەكقاليەۆا, مۇعالىم سايا كاريمۋللينا عابدوللا ماحامبەت ۇلىنا ارناعان ولەڭ جىرلارىن وقىپ, باسقا دا ونەرلەرىن كورسەتتى.
سالتاناتتى شارا سوڭىنان مەكتەپتە عابدوللا ماحامبەتوۆتى ەسكە الۋعا ارنالعان ءداستۇرلى ۆولەيبول ءتۋرنيرى ءوتتى. وعان اقجايىق اۋدانىنىڭ المالى, سارىتوعاي, قىزىلجار, تايپاق اۋىلىنان مۇعالىمدەر كومانداسى كەلگەن ەكەن. تۋرنير جەڭىمپازدارى ع.ماحامبەتوۆتىڭ ۇرپاقتارى تاعايىنداعان باعالى سىيلىققا يە بولدى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
سۋرەتتى تۇسىرگەن تۇرعالي عۇماروۆ