بۇگىن قر باس پروكۋراتۋراسى جانە ۇلتتىق قاۋىپسىزدىك كوميتەتىنىڭ قىزمەتكەرلەرى قىلمىستىق جاۋاپتىلىققا تارتۋ ءۇشىن ەلدوس كۇنشىعاروۆتى تۇركيادان ەكستراديتسيالادى, دەپ حابارلايدى ۇلتتىق قاۋىپسىزدىك كوميتەتىنىڭ ءباسپاسوز قىزمەتى.
باس پروكۋراتۋرا ءباسپاسوز قىزمەتىنىڭ مالىمەتىنشە, ول 2011 جىلى اتىراۋ قالاسىنىڭ اۋماعىندا تەرروريستىك قىلمىستاردى جاساعانى ءۇشىن كۇدىكتەلگەن.
ەلدوس كۇنشىعاروۆ زاڭعا قايشى ارەكەتىنەن كەيىن ءىزىن جاسىرعان ەدى. وسىعان بايلانىستى وعان حالىقارالىق ىزدەۋ جاريالاندى.
«قازاقستاننىڭ قىلمىستىق قۋدالاۋ ورگاندارىنىڭ تۇرىك ارىپتەستەرىمەن ءوزارا ۇيلەسىمدى ءىس-قيمىلىنىڭ ناتيجەسىندە كۇدىكتى ەلگە جەتكىزىلدى.
قازىر كۇنشىعاروۆ اتىراۋ قالاسىنداعى تەرگەۋ يزولياتورىنا ورنالاستىرىلدى. سوت ۇكىمى شىعارىلعانعا دەيىن سوندا بولادى», - دەلىنگەن حابارلامادا.
ەسكە سالا كەتسەك, 2012 جىلى قىركۇيەكتە اۋعانستاندا مودجاحەدتەر جاعىندا سوعىسىپ جۇرگەن جانە قازاقستاندا استىرتىن لاڭكەستىك توپتاردى باسقارعان 9 اتىراۋلىقتىڭ ەسىمى جاريا ەتىلگەن بولاتىن. سولاردىڭ قاتارىندا ەلدوس كۇنشىعاروۆتىڭ اتى دا اتالدى.