قاراعاندى وبلىسىنىڭ تىلدەردى دامىتۋ جونىندەگى باسقارماسىنىڭ ۇيىمداستىرۋىمەن وتكەن داۋىلپاز اقىن قاسىم امانجولوۆ اتىنداعى «دۇنيەگە كەلەر ءالى تالاي قاسىم» رەسپۋبليكالىق ءمۇشايرادا «ەگەمەن قازاقستان» گازەتىنىڭ جامبىل وبلىسى بويىنشا مەنشىكتى ءتىلشىسى, جامبىل وبلىستىق جازۋشىلار وداعى فيليالىنىڭ ديرەكتورى حاميت ەسامان جۇلدەلى ءۇشىنشى ورىنعا يە بولدى.
وسى ۋاقىتقا دەيىن وبلىستىق دەڭگەيدە وتكىزىلىپ كەلگەن ءمۇشايرا بيىل تۇڭعىش رەت «رۋحاني جاڭعىرۋ» باعدارلاماسى اياسىندا رەسپۋبليكالىق دەڭگەيدى قامتىدى. مۇشايراعا ەلىمىزدىڭ تۇكپىر-تۇكپىرىنەن 18-40 جاس ارالىعىنداعى 70 ۇمىتكەر باق سىناپ, ونىڭ 17-ءى اقتىق سىنعا شىقتى.
قازىلار القاسىنىڭ شەشىمىمەن ىنتالاندىرۋ سىيلىعىنا قۋات ەجەمبەكوۆ (استانا قالاسى), سايات قامشىگەر (الماتى قالاسى), دۋمان سامات ۇلى (اقمولا وبلىسى), مارلەن عيلىمحانوۆ (باتىس قازاقستان وبلىسى), ميزان ءجۇماالى (پاۆلودار وبلىسى), اقەركە ابدىكارىم (قاراعاندى وبلىسى), سالتانات كەڭەسبەكوۆا (قاراعاندى وبلىسى), ماقسات كۇزەمحانوۆ (قاراعاندى وبلىسى), سۇلتان داۋلەتحان (قاراعاندى وبلىسى) يە بولىپ, ولارعا 30 مىڭ تەڭگەدەن جۇلدە تاپسىرىلدى. «ۇكىلى ءۇمىت» ارنايى جۇلدەسىنە (50 مىڭ تەڭگە) ەرىك نارىن (قاراعاندى وبلىسى) لايىق دەپ تانىلدى. جۇلدەلى ءۇشىنشى ورىن «ەگەمەن قازاقستان» گازەتىنىڭ جامبىل وبلىسى بويىنشا مەنشىكتى ءتىلشىسى حاميت ەسامانعا, تۇركىستان وبلىسىنان كەلگەن ارقالىق ءاماليات ۇلىنا جانە الماتىلىق مۇحتار كۇمىسبەككە بۇيىرىپ, ولار 150 مىڭ تەڭگەدەن جۇلدە قارجىسىن قانجىعاعا بايلادى. ەكىنشى ورىندى قاراعاندى وبلىستىق «ارقا اقشامى» گازەتىنىڭ باس رەداكتورى جانات جاڭقاش ۇلى جانە ماڭعىستاۋ وبلىسىنان كەلگەن اسىلبەك جاڭبىرباي يەلەندى. مۇنداعى جۇلدە 250 مىڭ تەڭگەدەن بولدى. ال 350 مىڭ تەڭگە تارتاتىن ءبىرىنشى ورىننىڭ جۇلدەسى قاراعاندى وبلىستىق «ورتالىق قازاقستان» گازەتىنىڭ ءتىلشىسى راۋان قابيدولدينگە بۇيىرسا, باس جۇلدە – 500 مىڭ تەڭگەنى وسى باسىلىمنىڭ اعا ءتىلشىسى جانىبەك ءاليمان يەلەندى.
قايرات ءابىلدا,
«ەگەمەن قازاقستان»
قاراعاندى