ارگەنتينانىڭ باس شاھارى – بۋەنوس-ايرەستە ءوتىپ جاتقان جاسوسپىرىمدەردىڭ وليمپيا ويىندارىنا قازاقستاننان ءتورت بوكسشى عانا اتتانعان ەدى. سولاردىڭ ۇشەۋى بارلىق قارسىلاستارىنان باسىم ءتۇسىپ, فينالدىق سايىستا كۇش سىناسۋ قۇرمەتىنە يە بولدى.
جارتىلاي فينالدا كانادالىق تەتلۋا چۋولياعا شاڭ قاپتىرعان اسا اۋىر سالماقتاعى دامير تويباي اقتىق سىندا رەسەيلىك الەكسەي درونوۆپەن ايقاسادى. بۇل جەكپە-جەكتى بارشا جانكۇيەر تاعاتسىزدانا كۇتۋدە. ويتكەنى, ۇستىمىزدەگى جىلدىڭ تامىز ايىنىڭ ەكىنشى جارتىسىندا بۋداپەشتە ۇيىمداستىرىلعان جاستار اراسىنداعى الەم بىرىنشىلىگىنىڭ فينالىندا قوس قارسىلاستىڭ جولى قيىسقان بولاتىن. سول كەزدە قانداسىمىز قيتۇرقى ويىننىڭ «قۇربانى» بولدى. جاي عانا تيگەن سوققىعا بولا, رينگتەگى تورەشى نوكاۋت بەلگىلىپ, قازاق بوكسشىسىن جارىس جولىنان شىعارىپ تاستاعان ەدى. ەندى دامير بۇل جولى ءوزىنىڭ مىقتىلىعىن دالەلدەۋگە ءتيىس.
91 كەلى سالماقتاعى ايبەك ورالبايدىڭ دا شەشۋشى تۇستاعا قارسىلاسى وزىنە جاقسى تانىس. ول الجيرلىك مۇحاممەد ءامين حاسيدپەن كۇش سىناسادى. قوس بىلعارى قولعاپ شەبەرى بۋداپەشتەگى الەمدىك دودانىڭ جارتىلاي فينالىندا شەبەرلىك بايقاسقان بولاتىن. ول تارتىس جەرلەسىمىزدىڭ پايداسىنا شەشىلگەن ەدى.
64 كيلو سالماق دارەجەسىندەگى تالعات شايكەن جارتىلاي فينالدا ماروككالىق مۇحاممەد بۋلاۋدجانىڭ تاس-تالقانىن شىعاردى. تورەشى ءۇشىنشى راۋندتا جەكپە-جەكتى توقتاتۋعا ءماجبۇر بولدى. ەندى تالعات فينالدا جاستار اراسىنداعى الەم بىرىنىشلىگىنىڭ كۇمىس جۇلدەگەرى, رەسەيلىك يليا پوپوۆپەن قولعاپ تۇيىستىرەدى.
ال جارتىلاي فينالدا جەڭىلىس تاپقان 75 كەلى سالماقتاعى نادەجدا ريابەتس قولا مەدال ءۇشىن تالاسادى. ونىڭ قارسىلاسى – ءالجيردىڭ وكىلى – يچراك چايب.
عالىم سۇلەيمەن,
«ەگەمەن قازاقستان»