قازاقستان جانە ليتۆا ساياسي تۇرعىدا جان-جاقتى ىنتىماقتاستىق پەن ارىپتەستىكتى بەلسەندى تۇردە جالعاستىرۋعا, ەكونوميكالىق ديپلوماتيانى جانە حالىقارالىق ارەناداعى ءوزارا ءىس-قيمىلدى نىعايتۋعا نيەتتى. ەكى ەلدىڭ سىرتقى ىستەر مينيسترلىكتەرىنىڭ اراسىندا وتكەن قازاقستان-ليتۆا كونسۋلتاتسيالارىنىڭ باستى كۇن ءتارتىبى وسىنداي بولدى, دەپ حابارلايدى ءسىم ءباسپاسوز قىزمەتى.
قازاقستاندىق دەلەگاتسيانى سىرتقى ىستەر ءمينيسترىنىڭ ورىنباسارى رومان ۆاسيلەنكو, ال ليتۆالىق دەلەگاتسيانى سىرتقى ىستەر ۆيتسە-ءمينيسترى داريۋس سكۋسياۆيچيۋس باسقاردى.
كەلىسسوزدەردىڭ بارىسىندا قازاقستان-ليتۆا بايلانىستارىن جانداندىرۋدىڭ كەڭ اۋقىمدى ماسەلەلەرى تالقىلاندى. قازاقستان ساياسي ديالوگتى ءار ءتۇرلى فورماتتاردا, سونىڭ ىشىندە جوعارى دەڭگەيدە جانە پارلامەنتارالىق الماسۋلار جەلىسى بويىنشا دامىتۋعا مۇددەلى. تاراپتار حالىقارالىق تەرروريزمگە, ەسىرتكى بيزنەسىنە, كليماتتىڭ وزگەرۋ سالدارىنا جانە باسقا دا جاڭا قاۋىپ-قاتەرلەرگە قارسى بىرلەسكەن كۇرەستىڭ تيىمدىلىگىن ارتتىرۋدى ودان ءارى جالعاستىراتىنىن راستادى.
قازاقستان مەن ليتۆا بۇۇ قاۋىپسىزدىك كەڭەسىنىڭ تۇراقتى ەمەس مۇشەلەرىن سايلاۋدا ءبىر-بىرىنە قولداۋ كورسەتتى.
«استاناداعى ەقىۇ ءسامميتى نەمەسە «ەكسپو-2017» كورمەسى بولسىن, ءبىزدىڭ بارلىق نەگىزگى باستامالارىمىز ارقاشان ليتۆالىق سەرىكتەستەرىمىزدەن قولداۋىن تاباتىن, ماسەلەن, ليتۆا قر مەن ەو اراسىنداعى كەڭەيتىلگەن سەرىكتەستىك پەن ىنتىماقتاستىق تۋرالى كەلىسىمگە قول قويۋدىڭ بەلسەندى جاقتاۋشىسى جانە وسى ماڭىزدى كەلىسىمدى ءبىرىنشى بولىپ راتيفيكاتسيالاعان ەلدەردىڭ قاتارىندا بولدى», - دەدى ر. ۆاسيلەنكو.
2017 جىلدىڭ قورىتىندىسى بويىنشا ليتۆا كورسەتكىشتەرگە سايكەس ەو ەلدەرىنىڭ اراسىنداعى العاشقى 10 ەلدىڭ قاتارىنا ەنىپ, قازاقستاننىڭ بالتىق جانە سولتۇستىك ەۋروپا ەلدەرىندەگى ەڭ ءىرى ساۋدا ارىپتەسىنە اينالدى. ديپلوماتتار ۇستىمىزدەگى جىلدىڭ العاشقى سەگىز اي ىشىندە تاۋار اينالىمى ارتقانىن بەلگىلەدى. قازاقستاندىق مالىمەتتەر بويىنشا, ول 527 ملن. دوللاردى قۇرايدى, ال 2017 جىلى 722 ملن.دوللاردى قۇراعان. بۇل دەگەنىمىز, ەكىجاقتى ساۋدا اينالىمىنىڭ تومەندەۋ ءۇردىسى بايقالعان جاعدايدان شىعىپ كەلەدى, سوندىقتان تاراپتار وسى جاعىمدى ءۇردىستى نىعايتۋعا نيەتتى. تاراپتار وعان ساۋدا-ەكونوميكالىق ىنتىماقتاستىق جونىندەگى قازاقستان-ليتۆا ۇكىمەتارالىق كوميسسياسىنىڭ بەلسەندى جۇمىسى ىقپال ەتەتىندىگىن اتاپ ءوتتى, ونىڭ كەلەسى وتىرىسى كەلەسى جىلدىڭ باسىنا جوسپارلانىپ وتىر.
«قازاقستان-ليتۆا ەكونوميكالىق ارىپتەستىگىنىڭ مازمۇندى بولىگىن ءارتاراپتاندىرۋ ءۇشىن كەشەندى تاسىلدەمە ازىرلەۋ قاجەت», - دەدى د. سكۋسياۆيچيۋس.
ەكى ەل اراسىندا ءوزارا قارىم-قاتىناستاردىڭ, سونىڭ ىشىندە ساۋدا-ەكونوميكالىق, عىلىمي, ءبىلىم بەرۋ, مادەني-گۋمانيتارلىق سالالارداعى بەرىك شارتتىق-قۇقىقتىق بازاسى قۇرىلعان.
كولىك سالاسىنداعى ىنتىماقتاستىق باسىم باعىت بولىپ قالا بەرمەك. ترانزيتتىك, كولىكتىك قاتىناستار مەن لوگيستيكا ماسەلەلەرى تالقىلاندى, بۇل جۇك اعىنىن دامىتۋ جانە ءارتاراپتاندىرۋ قاجەتتىلىگىنە بايلانىستى. ىسكە قوسىلعان جاڭا كونتەينەرلىك تاسىمالداۋ قىزمەتتەرى, 2018 جىلدىڭ مامىر ايىندا اشىلعان استانا مەن ۆيلنيۋس اراسىنداعى تىكەلەي اۋە قاتىناسى ەكى ەلدىڭ كولىك سالاسىنداعى ىنتىماقتاستىقتىعىنا جاڭا مۇمكىندىكتەر بەرەدى.
تاراپتار «جاڭا ەكونوميكا» دەپ اتالاتىن سالانى دامىتۋعا بىرلەسىپ جاردەمدەسۋگە كەلىستى. ۆيلنيۋس ەۋروپاداعى قارجىلىق تەحنولوگيالاردى (Fintech) دامىتۋدىڭ جاڭا ورتالىقتارىنىڭ ءبىرى بولماق, ال قازاقستاننىڭ استاناسى – وڭىرلىك قارجىلىق حابقا اينالماق, بۇل «استانا» حالىقارالىق قارجى ورتالىعىنىڭ (احقو) اشىلۋىمەن بايلانىستى. قازىرگى ۋاقىتتا احقو جانە ليتۆا بانكى ساراپشىلارىنىڭ دەڭگەيىندە ەۋروپالىق جانە ازيالىق يۋريسديكتسيالاردىڭ اراسىندا جالعاستىرعىش تەتىكتەرىن قۇرۋ ماسەلەسى قاراستىرىلۋدا, بۇل قر مەن ليتۆانىڭ وڭىرلىك قارجى ورتالىقتارى رەتىندەگى پوزيتسيالارىن ودان ءارى نىعايتۋعا قۋاتتى سەرپىن بەرەدى.
وڭىرلەر اراسىنداعى بايلانىستاردى دامىتۋعا جانە دوستىق ينستيتۋتىنا پراگماتيكالىق سيپات بەرۋگە ەرەكشە نازار اۋدارىلدى. قازىرگى ۋاقىتتا قازاقستان مەن ليتۆا ءىرى قالالارىنىڭ اراسىندا باۋىرلاس قالالىق قارىم-قاتىناستاردى ورناتۋ ماسەلەلەرى قاراستىرىلۋدا.
تاراپتار مادەني-گۋمانيتارلىق بايلانىستاردىڭ دامۋىنا وڭ باعا بەردى. وسى باعىتتا وسى جىلى قاراعاندى وبلىسىندا قۋعىن-سۇرگىندە بولعان ليتۆالىقتاردىڭ جەرلەنگەن جەرىنە كەلگەن «ميسسيا ءسىبىر» جاستار ەكسپەديتسياسى ۇلكەن قادام جاسادى. دەلەگاتسيانى قازاقستان حالقى اسسامبلەياسىنىڭ «جاڭعىرۋ جولى» جاستار قوزعالىسىنىڭ مۇشەلەرى بىرگە الىپ ءجۇردى.
ءبىلىم جانە عىلىم سالاسىنداعى بايلانىستارى كەڭەيتىلۋدە. ليتۆانىڭ جەتەكشى جوعارى وقۋ ورىندارى مەن قازاقستاننىڭ جوعارى وقۋ ورىندارى اراسىندا بايلانىستار ورناتىلدى. جالپى العاندا, 150-گە جۋىق قازاقستاندىق ستۋدەنت جىل سايىن ليتۆانىڭ جوعارى وقۋ ورىندارىندا ءبىلىم الىپ, تاعىلىمدامادان وتۋدە. ليتۆالىق تاراپتىڭ ايتۋىنشا, سوڭعى 6 جىلدا قازاقستاننىڭ مىڭعا جۋىق ازاماتتارى وسى ەلدە جوعارى ءبىلىم العان.
حالىقارالىق ماسەلەلەر اراسىندا ۋكراينا, سيريا, اۋعانستان جانە ورتالىق ازياداعى جاعدايلار تالقىلاندى. بۇۇ, ەقىۇ, ەو, ەىدۇ, ماگاتە سياقتى حالىقارالىق ۇيىمدار اياسىنداعى ەكى ەلدىڭ ىقپالداستىعىنا ەرەكشە نازار اۋدارىلدى.
سول كۇنى ليتۆا سىرتقى ىستەر مينيسترلىگىنىڭ دەلەگاتسياسىن قازاقستان رەسپۋبليكاسىنىڭ سىرتقى ىستەر ءمينيسترى قايرات ءابدىراحمانوۆ قابىلدادى.
كەلىسسوزدەر ەكى ەلدىڭ قارىم-قاتىناسى ءۇشىن ءداستۇرلى دوستىق جاعدايدا ءوتتى.