فۋتزالدان چەمپيوندار ليگاسىنىڭ ەليتالىق توبىندا وينايتىن كوماندالار تولىقتاي انىقتالىپ, جەرەبە تارتۋ ءراسىمى وتكەننەن سوڭ الماتىنىڭ «قايرات» كلۋبىنىڭ باس باپكەرى كاكامەن از-كەم تىلدەسۋدىڭ ءساتى ءتۇستى.
وسىنىڭ الدىنداعى ىرىكتەۋ تۋرنيرىنەن «قايرات» ءبىر دەممەن, ەش مۇدىرمەي وتكەنى بەلگىلى. پورتۋگاليانىڭ «سپورتينگ», بەلارۋستىڭ «ليدا» جانە كوسوۆونىڭ «فەنيكس» كلۋبتارىنا قارسى وتكىزگەن باسەكەلەردىڭ بارلىعىندا باسىمدىق تانىتتىق. ارينە, بۇل قۋانتارلىق جاعداي. بىراق بىزگە بوساڭسۋعا مۇلدە بولمايدى. ويتكەنى, قارت قۇرلىقتىڭ باستى دوپ دوداسىنىڭ فينالدىق سايىسىنىڭ جالعىز جولداماسى ءۇشىن تالاساتىن D توبىنداعى كوماندالار اراسىندا وسالى جوق. بارلىعىنىڭ مۇمكىنىدىگى بىردەي. قاي قايسىسى دا قاۋىپتى قارسىلاس. سوندىقتان دا بۇل سىناققا دا ساقاداي ساي ازىرلىكپەن اتتانىپ, جارىس جولىندا جانىمىزدى سالىپ ايقاسقان جاعدايدا عانا كوزدەگەن ماقساتىمىزعا قول جەتكىزە الامىز, – دەيدى كاكا.
ەستەرىڭىزگە سالا كەتەيىك, ايتۋلى جارىستىڭ D توبىندا ونەر كورسەتەتىن «قايراتتىڭ» قارسىلاستارى – چەحيانىڭ «حرۋديم», بەلارۋستىڭ «ليدسەلماش» جانە يتاليانىڭ «پەسكارا» كلۋبتارى. بۇل باسەكەلەر 13-18 قاراشا ارالىعىندا چەحيادا وتەدى. ال وزگە توپتاردا مىندا كوماندالار ءوزارا شەبەرلىك بايقاسادى: A توبى: «ينتەر» (يسپانيا), «دوبوۆەتس» (سلوۆەنيا), «حاللە-گوويك» (بەلگيا) جانە «ۆيتيس» (ليتۆا). B توبى: «يۋگرا» (رەسەي), «بارسەلونا» (يسپانيا), «ەكونوماتس» (سەربيا) جانە «رەكورد» (پولشا). C توبى: «بەنفيكا» (پورتۋگاليا), «سپورتينگ» (پورتۋگاليا), «سيبيرياك» (رەسەي) جانە «نوۆو ۆريەمە» (حورۆاتيا).
ءار توپتىڭ جەڭىمپازدارى عانا چەمپيوندار ليگاسىنىڭ فينالدىق سايىسىندا كۇش سىناسۋ قۇرمەتىنە يە بولادى. ال شەشۋشى باسەكەلەر كەلەسى جىلدىڭ 25-27 نەمەسە 26-28 ءساۋىر كۇندەرى وتەدى دەپ جوسپارلانۋدا.
عالىم سۇلەيمەن,
«ەگەمەن قازاقستان»