دۇنيەجۇزىلىك دەنساۋلىق ساقتاۋ ۇيىمى قازان ايىن ءسۇت بەزى قاتەرلى ىسىگىنەن قۇلاعدار بولۋ دەڭگەيىن كوتەرۋ ايى دەپ جاريالادى. ويتكەنى ومىراۋ وبىرىنان بولاتىن ءولىم-ءجىتىمنىڭ كوپتىگى ونكولوگيا سالاسىنداعى وزەكتى ماسەلەلەر قاتارىندا تۇر. بۇل دەرتتى اسقىندىرماي انىقتاۋ انالارىمىزدىڭ ءومىرىن الدەقايدا ۇزارتادى.
ال ددسۇ عالامدىق اكتسياعا «قىزعىلت قازان» دەگەن اتاۋ بەردى. سەبەبى شارانىڭ نىشانى رەتىندە قىزعىلت لەنتا تاڭدالىپ الىنعان.
ءوز كەزەگىندە قازاقستانداعى ونكولوگيالىق اۋرۋلار اراسىندا ءسۇت بەزى قاتەرلى ىسىگى ءبىرىنشى ورىندى الىپ تۇر. جىل سايىن قازاقستاندا 4 مىڭنان استام ايەلدە ءسۇت بەزى قاتەرلى ىسىگى بار ەكەندىگى جاڭادان انىقتالادى. جىل سايىن ءسۇت بەزى قاتەرلى ىسىگىنەن ەلىمىزدە 1400-گە جۋىق ايەل قايتىس بولادى.
وسىعان وراي بيىلعى 6-12 قازان ارالىعىندا الماتىداعى دەنساۋلىق ساقتاۋ مينيسترلىگى قازاق ونكولوگيا جانە راديولوگيا عىلىمي-زەرتتەۋ ينستيتۋتىندا اشىق ەسىك كۇنى ءوتتى. اۋقىمدى شارا اياسىندا ينستيتۋتتىڭ جەتەكشى ماماندارى – بىلىكتى ماممولوگتار ءتۇرلى كەڭەستەر بەردى.
تەكسەرىلۋ بارىسىندا پاتولوگيا انىقتالعان جاعدايدا, ۋزي-گە ءتۇسۋ, مامموگرافيا جانە بيوپسيانىڭ كورسەتىلگەن ءارتۇرلى تۇرلەرىمەن ەمدەۋ تەگىن جۇرگىزىلەدى.
بۇدان باسقا, ەگەر ايەلدە وتباسىلىق انامنەز بار بولسا, ون بەزى قاتەرلى ىسىگىنە قارسى تۇقىم قۋالايتىن بەيىمدىلىككە ارنالعان تەستتەن وتۋگە مۇمكىندىك جاسالدى.
وعان قوسا 20 قازان, ياعني سەنبى كۇنى قازاقستاننىڭ بارلىق ونكولوگيالىق ديسپانسەرلەرىندە اشىق ەسىك كۇنى وتەدى. بۇل كۇنى ايەلدەر ماممولوگتان تەگىن كەڭەس الۋ مۇمكىندىگىنە جانە ۋزي-دەن, مامموگرافيادان كورسەتىلگەن بەلگىلەر بويىنشا ءوتۋ مۇمكىندىگىنە يە بولادى. ناقتى ۋاقىتىن ءوز قالالارىڭىزدىڭ ونكولوگيالىق ديسپانسەرلەرىنەن بىلۋگە بولادى.
ماماندار قازاقستاندا 40 جاستان 70 جاسقا دەيىنگى ايەلدەر ەمحانالاردا 2 جىلدا 1 رەت تەگىن پروفيلاكتيكالىق مامموگرافيادان تەكسەرىستەن ءوتىپ تۇرۋلارى كەرەكتىگىن ەسكەرتەدى.
تەگىن قاتەرلى ىسىك سكرينينگىنە بايلانىستى بارلىق اقپارات ەلىمىزدىڭ بارشا ەمحانالارىندا بار.
ايناش ەسالي,
«ەگەمەن قازاقستان»
الماتى