كەشە مەملەكەت باسشىسى نۇرسۇلتان نازارباەۆ جۇمىس ساپارىمەن اقتوبە وبلىسىنا كەلدى. ساپار اياسىندا قازاقستان پرەزيدەنتى بىرقاتار الەۋمەتتىك جانە ونەركاسىپتىك نىسانداردى ارالاپ, ءوڭىردىڭ الەۋمەتتىك-ەكونوميكالىق دامۋ بارىسىمەن تانىستى.
قازاقستان پرەزيدەنتى ساپار بارىسىندا وبلىس ورتالىعىنداعى «DaruZharygy» جاۋاپكەرشىلىگى شەكتەۋلى سەرىكتەستىگىنىڭ وفتالمولوگيا ورتالىعىنا باردى.
مەملەكەت باسشىسى جاڭا كلينيكانىڭ ەمحانالىق, دياگنوستيكالىق جانە ستاتسيونارلىق بولىمشەلەرىن, لازەر ورتالىعى مەن وتا جاساۋ ءبولىمىن ارالاپ كوردى, سونداي-اق كوزگە وتا جاساۋعا ارنالعان زاماناۋي مەديتسينالىق قۇرال-جابدىقتارمەن تانىستى.
ەلباسى ءوڭىر تۇرعىندارىنا شەتەلدەرگە بارماي-اق, ەۋروپالىق دەڭگەيدەگى جوعارى مامانداندىرىلعان وفتالمولوگيالىق كومەك الۋعا مۇمكىندىك بەرەتىن مۇنداي نىسانداردى ىسكە قوسۋدىڭ ماڭىزدىلىعىن ايرىقشا اتاپ ءوتتى.
مەديتسينا قىزمەتكەرلەرى دەنساۋلىق ساقتاۋ سالاسىنا ۇنەمى كوڭىل ءبولىپ, ءتيىمدى الەۋمەتتىك ساياسات جۇرگىزىپ جاتقانى ءۇشىن نۇرسۇلتان نازارباەۆقا العىس ءبىلدىردى. سونىمەن قاتار قازاقستان پرەزيدەنتىنە استانا قالاسىندا سالىناتىن العاشقى مەديتسينالىق وڭالتۋ ورتالىعىنىڭ ماكەتى تانىستىرىلدى.
ايتا كەتۋ كەرەك, «DaruZharygy» جاۋاپكەرشىلىگى شەكتەۋلى سەرىكتەستىگى – مەملەكەت-جەكەمەنشىك ارىپتەستىگى اياسىندا اۋستريالىق كومپانيامەن بىرلەسىپ سالىنعان وڭىردەگى ءىرى وفتالمولوگيا جانە كوز ميكروحيرۋرگياسىنىڭ ورتالىعى. جوبا قۇنى – 3,2 ميلليارد تەڭگە. كلينيكا ەۋروپادا وندىرىلگەن مەديتسينالىق قۇرىلعىلارمەن جابدىقتالعان. ستاتسيونار 60 ادامعا ارنالعان, ەمحانا كۇنىنە 500 ادامدى قابىلداي الادى.
بۇدان سوڭ مەملەكەت باسشىسى اقتوبەدەگى «ايالا» بالالاردى ساۋىقتىرۋ ورتالىعىندا بولىپ, تسەرەبرالدى سال اۋرۋىمەن, اۋتيزممەن, نەيرو-ورتوپەديالىق پاتولوگيامەن اۋىراتىن بالالارعا ارنالعان زاماناۋي تەحنولوگيالار مەن ستاندارتتارى بار الەۋمەتتىك-پسيحولوگيالىق جانە مەديتسينالىق وڭالتۋ باعدارلامالارىمەن تانىستى.
سونىمەن قاتار نۇرسۇلتان نازارباەۆقا «باقىتتى بالا» وبلىستىق جوباسىنىڭ جۇزەگە اسىرىلۋ ناتيجەلەرى جونىندە مالىمدەلدى. جوبا اياسىندا ەرەكشە مۇقتاج بالالار ءۇشىن ارنايى كوررەكتسيالىق بالاباقشا, پسيحولوگيالىق جانە مەديتسينالىق-پەداگوگيكالىق كونسۋلتاتسيا بەرەتىن ورىندار, «كۇنشۋاق» بالالاردى ساۋىقتىرۋ لاگەرى اشىلدى. اۋداندارداعى پسيحولوگيالىق-پەداگوگيكالىق كوررەكتسيا كابينەتتەرى جانە اقتوبە قالاسىنىڭ ورتا مەكتەپتەرىندە ينكليۋزيۆتى ءبىلىم بەرۋ ءىسىن دامىتۋ جونىندەگى رەسۋرستى كابينەتتەر جاساقتالىپ, جۇمىس جۇرگىزۋدە.
بيزنەستىڭ الەۋمەتتىك جاۋاپكەرشىلىگى اياسىندا «اقتوبە مىس كومپانياسى» جاۋاپكەرشىلىگى شەكتەۋلى سەرىكتەستىگى سالعان ورتالىق شۆەيتساريا, چەحيا, پولشا جانە رەسەيدىڭ زاماناۋي قۇرالدارىمەن جابدىقتالعان.
كەلەسى نىسان – قالاداعى جاڭا مۇز سارايىندا ەلباسى جاس حوككەيشىلەردى جانە بارشا اقتوبەلىكتەردى سپورت كەشەنىنىڭ اشىلۋىمەن قۇتتىقتاپ, شايباعا ەستەلىك قولتاڭبا قالدىردى. بۇل سپورت سارايى مەملەكەت-جەكەمەنشىك ارىپتەستىگى اياسىندا سلوۆاكيا ينۆەستورلارىنىڭ قاتىسۋىمەن سالىنعان-دى.
جالپى اۋماعى 8 500 شارشى مەتر بولاتىن سپورت كەشەنى جىل بويى حوككەيدەن, شورت-ترەكتەن, مانەرلەپ سىرعاناۋدان, باسكەتبولدان, شاعىن فۋتبولدان, بوكستان, ۇلكەن تەننيستەن, گيمناستيكادان كاسىبي جارىستار وتكىزۋگە, سونداي-اق كونكيمەن جاپپاي سىرعاناۋعا مۇمكىندىك بەرەدى. ارەنا 2 500-دەن استام كورەرمەنگە ارنالعان.
مەملەكەت-جەكەمەنشىك ارىپتەستىگىنىڭ اقتوبە وبلىسىندا جەمىستى جۇزەگە اسىپ جاتقانىن كورسەتەتىن تاعى ءبىر جوبا – «ACE Tennis Center» ورتالىعىندا نۇرسۇلتان نازارباەۆ جاس سپورتشىلارمەن اڭگىمەلەسىپ, تەننيس دوبىنا ەستەلىك قولتاڭبا قالدىردى, سونداي-اق وسى ورتالىقتىڭ قوناق ءۇي كەشەنى مەن باسقا دا ورىندارىن ارالاپ كوردى.
قازاقستان پرەزيدەنتى سپورت كەشەنىنىڭ جۇمىسىمەن تانىسىپ, وڭىرلەردە وسىنداي سپورت ينفراقۇرىلىمدارىنىڭ اشىلۋى سالاماتتى ءومىر سالتىن ناسيحاتتاۋعا جانە ەلىمىزدە تەننيستىڭ دامۋ دەڭگەيىن ارتتىرۋعا مۇمكىندىك بەرەتىنىن اتاپ ءوتتى.
وڭىردەگى الەۋمەتتىڭ الەۋەتىن ارتتىرۋ باعىتىنداعى وسىنداي ىرگەلى جوبالارمەن تانىسقاننان كەيىن مەملەكەت باسشىسى «اقتوبە» يندۋستريالىق ايماعىنا باردى.
يندۋستريالىق ايماقتىڭ كولەمى 200 گەكتار جەردى الىپ جاتىر. وندا ينجەنەرلىك-كوممۋنيكاتسيالىق ينفراقۇرىلىم, اۆتوموبيل جانە تەمىر جول كولىكتەرىنە ارنالعان كىرمە جولدار بار. بۇگىندە مۇندا جالپى قۇنى 60,3 ميلليارد تەڭگە بولاتىن 14 ينۆەستيتسيالىق جوبا جۇزەگە اسىرىلۋدا.
مەملەكەت باسشىسىنا يندۋستريالىق ايماقتا ىسكە اسىرىلىپ جاتقان جوبالار, سونداي-اق ونەركاسىپ كاسىپورىندارىن تسيفرلاندىرۋ جانە تەحنولوگيالىق تۇرعىدان جاڭعىرتۋ, وبلىستىڭ اگروونەركاسىپ كەشەنىن دامىتۋ ءۇشىن اتقارىلعان جۇمىستار تۋرالى مالىمدەلدى. اقتوبە وبلىسىنىڭ اكىمى بەردىبەك ساپارباەۆ بيىلعى 9 ايداعى ءوڭىردىڭ الەۋمەتتىك-ەكونوميكالىق دامۋىنىڭ نەگىزگى ناتيجەلەرى جونىندە باياندادى.
– ەسەپتى كەزەڭدە الەۋمەتتىك-ەكونوميكالىق دامۋدىڭ بارلىق نەگىزگى كورسەتكىشى بويىنشا ءوسۋ قارقىنى ساقتالىپ وتىر. ونەركاسىپ ءوسىمى – 105,7 پايىز. جالپى, قاڭتار-قىركۇيەك ايلارىندا وندىرىلگەن ءونىمنىڭ قۇنى 1,3 تريلليون تەڭگەدەن استى. اۋىل شارۋاشىلىعى ءونىمىنىڭ جالپى كولەمى 167,3 ميلليارد تەڭگەنى نەمەسە 104 پايىزدى قۇرادى. وسى ايدا 85 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانىپ وتىر. بۇل بىلتىرعى وسى كەزەڭمەن سالىستىرعاندا 22,1 پايىزعا ارتىق. بيىلعى 9 اي ىشىندە 318 ميلليارد تەڭگەدەن استام ينۆەستيتسيا تارتىلدى, – دەدى ب.ساپارباەۆ.
ءوڭىر باسشىسىنىڭ ايتۋىنشا, وبلىستا جۇمىسسىزدىق دەڭگەيىن ازايتۋ جونىندە بىرقاتار شارا قولعا الىندى. سونىمەن بىرگە بۇگىندە ايماقتا مەملەكەت باسشىسىنىڭ قازاقستان حالقىنا جولداۋىندا قويىلعان تاپسىرماعا سايكەس جىل اياعىنا دەيىن 35 مىڭ ادامنىڭ جالاقىسى وسىرىلمەك. تاعى ءبىر اتاپ وتەرلىك ماسەلە, وبلىس تۇرعىندارىنىڭ ءال-اۋقاتىن, تابىس پەن تۇرمىس ساپاسىن جاقسارتۋ ماسەلەسى ءبىرىنشى كەزەكتە ەكونوميكالىق ءوسىمدى ءوسىرۋ, ونىڭ دەڭگەيىن بەس پايىزدىق كورسەتكىشتەن تۇسىرمەۋ تۇرعىسىنان مەجەلەنىپ وتىر. سونداي-اق وڭىردە ونەركاسىپتى جاڭعىرتۋ ءىسى تسيفرلاندىرۋ جونىندەگى باعدارلامامەن تىعىز بايلانىستا جۇرگىزىلىپ كەلەدى.
وبلىس اكىمى ەلباسىنا نەگىزگى مەملەكەتتىك باعدارلامالاردىڭ, سونىڭ ىشىندە «پرەزيدەنتتىڭ بەس الەۋمەتتىك باستاماسىنىڭ» جۇزەگە اسىرىلۋ بارىسى جونىندە دە ەسەپ بەردى.
سوڭىندا نۇرسۇلتان نازارباەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى حالىققا ارنالعان جولداۋدى ءتيىمدى ىسكە اسىرۋدىڭ ماڭىزدىلىعىن اتاپ ءوتىپ, وبلىستاعى ورتاشا جالاقىنى ءوسىرۋ, جەرگىلىكتى ماڭىزى بار جولداردى جوندەۋ جانە ءوڭىردىڭ, اسىرەسە اقتوبە قالاسىنىڭ ەكولوگيالىق احۋالىن جاقسارتۋ جونىندە بىرقاتار ناقتى تاپسىرما بەردى.
تەمىر قۇسايىن,
«ەگەمەن قازاقستان»
اقتوبە وبلىسى