قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ارنايى بريگاداسى «تۋعان جەرگە تاعزىم» جوباسىنىڭ اياسىنداعى تانىمدىق ساپارىن باستاۋ ءۇشىن بۇگىن الماتى وبلىسى سارقان اۋدانىنىڭ چەركاسسك اۋىلدىق وكرۋگىنە كەلدى.
ساپار قازاقستان پرەزيدەنتى ن. نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنان تۋىنداعان جوبانى جەرگىلىكتى جەردە جۇزەگە اسىرۋ ماقساتىندا ۇيىمداستىرىلىپ وتىر.
ۇگىتشىلەر بريگاداسىن مۇندا قازاق مەملەكەتتىك قىزدار پەداگوگيكالىق ۋنيۆەرسيتەتى تاربيە جانە الەۋمەتتىك جۇمىستار جونىندەگى دەپارتامەنتىنىڭ ديرەكتورى جاڭاگۇل سۇلتانوۆا باستاپ كەلدى. دەلەگاتسيا مۇشەلەرى ساپاردى اقتۇما اۋىلىنان باستادى. وسىنداعى پەتروپاۆل ورتا مەكتەبىندە الدىمەن ۋنيۆەرسيتەتتىڭ «ۇماي انا» ۇيىرمەسىنىڭ فيليالى سالتاناتتى جاعدايدا اشىلدى. ونىڭ اشىلۋى جونىندەگى قۇجاتقا ۋنيۆەرسيتەت دەپارتامەنتىنىڭ ديرەكتورى مەن مەكتەپ ديرەكتورى باۋىرجان يبرايىموۆا قول قويدى.
بۇدان كەيىن اۋىل تۇرعىندارى مەن مەكتەپ ۇجىمى تۇگەل قاتىسقان جيىن بولدى. وندا ۋنيۆەرسيتەت وقىتۋشىلارى ونەرتانۋ عىلىمىنىڭ مۇمكىندىكتەرى مەن سالالارى, جاس ۇرپاق بويىندا ەستەتيكالىق مادەنيەتتى قالىپتاستىرۋ, ادامگەرشىلىككە باۋلۋ, شەشەندىك ونەر, ءوزىن-ءوزى ۇستاي ءبىلۋ مادەنيەتى, مەكتەپ وقۋشىلارىنىڭ اتا-انا مەن مۇعالىم, قورشاعان ورتاعا دەگەن قارىم-قاتىناسىن جاقسارتۋدىڭ جولدارى مەن تاسىلدەرى, وقۋشىلاردىڭ ءوسۋ پروتسەسىندە, ولاردىڭ جاس جانە جەكە پەداگوگيكالىق-پسيحولوگيالىق ەرەكشەلىكتەرىنە قاراي قاقتىعىستىڭ سەبەپتەرى مەن سالدارلارىن انىقتاۋ جانە ولاردى شەشۋدىڭ جولدارى تۋرالى دارىستەر وقىپ, جينالعاندار سۇراقتارىنا جاۋاپ بەردى.
سوڭىنان مەكتەپكە رۋحاني جاڭعىرۋعا بايلانىستى شىعارىلعان 17 كىتاپ تارتۋ ەتىلدى. بۇدان كەيىن ۋنيۆەرسيتەت دەلەگاتسياسى اۋىلدىق وكرۋگتەگى چەركاسسك جانە قارعالى اۋىلدارىندا دا بولادى. ساپار قازاننىڭ 18-ىنە دەيىن جالعاسادى.