ريددەر قالاسىندا جۇرەگىنە ىزگىلىك ۇيالاعان گالينا گيلدەرمان ەسىمدى جان تۇرادى. ول كىسىنى شاعىن شاھاردا تانىمايتىن كىسى جوق دەۋگە بولاتىن شىعار. «گيلدەرماننىڭ وتباسى جيىرما جىلدان استام وڭىرىمىزدەگى جەتىمدەرگە كومەك بەرىپ, الەۋمەتتىك جوبالارعا بەلسەنە قاتىسادى. ەكى جىلدان بەرى باسپاناسى جوق, قاڭعىرىپ جۇرگەن جانداردى جيناپ, ولاردىڭ قۇجاتتارىن قالپىنا كەلتىرىپ, قوعامعا پايدالى ازامات رەتىندە قايتا قوسىلۋىنا كوپ كۇش-جىگەرلەرىن سالىپ ءجۇر. گيلدەرماننىڭ وتباسى – ينتەرناتسيونالدى. جولداسى باي-ەلي ءسايدسوليموۆيچتىڭ ۇلتى – چەشەن, ءوزى نەمىس قىزى. ەكەۋىنىڭ دە اكە-شەشەسى 1957 جىلى قازاقستانعا قونىس اۋدارىلىپتى. وسى جەردە ءۇشىنشى ۇرپاقتارى دۇنيەگە كەلگەندىكتەن, قازاقستاندى وتانىمىز دەپ قۇرمەت تۇتادى», – دەيدى ريددەر قالالىق ىشكى ساياسات ءبولىمىنىڭ باسشىسى انار ورالقىزى.
گالينا گيلدەرمان جاقىندا ريددەردە «رۋحاني جاڭعىرۋ» باعدارلاماسىنىڭ اياسىندا وتكەن «جومارت جۇرەك» قايىرىمدىلىق فورۋمىندا «جىل تۇلعاسى» اتالىمى بويىنشا ماراپاتتالىپتى. جۇرەگى جومارت كاسىپكەر جىل باسىنان بەرى قالاداعى قايىرىمدىلىق شارالارىنا ءۇش ميلليون تەڭگەدەن استام قارجىسىن جۇمساپتى. ءوزىنىڭ «ريابينۋشكا» دەگەن ءدامحاناسىندا مۇگەدەك جاندار مەن جالعىزىلىكتى زەينەتكەرلەرگە, ۇزىن سانى 57 ادامعا كۇن سايىن ءبىر مەزگىل تەگىن ىستىق تاماق بەرۋدى داستۇرگە اينالدىرعان ەكەن. وسىنداعى جەتىم بالالارعا ارنالعان ارنايى كوررەكتسيالىق مەكتەپ-ينتەرناتتىڭ تاربيەلەنۋشىلەرىنە دە ۇنەمى جاردەمدەسىپ تۇرادى. جۇيكە اۋرۋلارى ديسپانسەرىندە جاتقان 41 مۇڭلىققا دا گالينا ميحايلوۆنانىڭ جۇرەگى اۋىرادى. «ولاردىڭ بارلىعىن تۋىستارى ۇمىتىپ كەتكەن, ەشكىمگە كەرەكتەرى جوق. ماڭگىلىك مەكەنىنە وسى جەردەن اتتاناتىندارى دا كەزدەسەدى. جارىمكوڭىل جانداردى ءبىر ۋاقىت قۋانتۋ ءۇشىن مەرەكەلىك ءىس-شارالار ۇيىمداستىرامىز. ەندى ءبىر تەلەديدار سىيلايىق دەپ ءجۇرمىز», دەيدى ول.
رەتى كەلگەندە ايتا كەتەيىك, ريددەر قالاسىندا سوڭعى ەكى جىلدا 70-تەن استام ءارتۇرلى قايىرىمدىلىق شارالارى ۇيىمداستىرىلىپ, قولى اشىق جانداردىڭ قولداۋىمەن 100 ميلليون تەڭگەدەن استام قاراجاتتىڭ الەۋمەتتىك كومەگى كورسەتىلىپتى. «جومارت جۇرەك» قايىرىمدىلىق فورۋمىندا اتىمتاي جومارت ازاماتتار «ەرەن ەرىكتىلىك», «جىل تۇلعاسى», «جىلدىڭ ۇزدىك ۇيىمى», «تۋعان ولكەم», «جىل مەتسەناتى» اتالىمدارى بويىنشا ماراپاتتالىپتى.
ازامات قاسىم,
«ەگەمەن قازاقستان»
شىعىس قازاقستان وبلىسى, ريددەر قالاسى