وبلىس ورتالىعىنداعى دوستىق ۇيىندە باسقارما باسشىلارى, اۋدان, قالا اكىمدەرى, ءماسليحات دەپۋتاتتارى, ارداگەرلەر, وبلىستاعى زيالى قاۋىم جانە قوعامدىق ۇيىمدار وكىلدەرى ەلباسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىن تالقىلادى.
وبلىس اكىمى بولات باقاۋوۆتىڭ توراعالىعىمەن وتكەن جيىندا الداعى جىلى جولداۋدى جۇزەگە اسىرۋ ءۇشىن اتقارىلاتىن ماقسات-مىندەتتەر ايقىندالدى.
جولداۋدا 2019 جىلدىڭ 1 قاڭتارىنان باستاپ ەڭ تومەنگى جالاقى مولشەرى 1,5 ەسەگە, ياعني 28 مىڭ تەڭگەدەن 42 مىڭ تەڭگەگە دەيىن وسەتىنى ايتىلعانى بەلگىلى. بۇل كۇندەرى وبلىسىمىزدا «جول كارتاسى 2020-2025» جوباسى جۇزەگە اسۋدا. جوبانىڭ ماقساتى – جاڭا جۇمىس ورىندارىن اشىپ, حالىقتى تابىسپەن قامتاماسىز ەتۋ.
– بۇل ءارتۇرلى مەنشىك يەسىندەگى بارلىق كاسىپورىندارعا, بيۋدجەتتىك ۇيىمداردىڭ قىزمەتكەرلەرىنە تىكەلەي قاتىستى, – دەپ اتاپ ءوتتى وبلىس اكىمى. سونداي-اق وبلىس اكىمى ەكونوميكا سالاسىندا وتاندىق ءوندىرىس كولەمىن ارتتىرىپ, ەكسپورتتىق ۇلەسىمىزدى ۇلعايتۋ مىندەتى تۇرعانىن اتاپ ءوتتى. مىسالى, تەحنولوگيالىق قايتا جاراقتاندىرۋعا جەرگىلىكتى ءوندىرىس وشاقتارى 200,0 ملرد تەڭگە جۇمساعان. وتكەن جىلى وبلىس ەكونوميكاسىنا 484 ملرد تەڭگە ينۆەستيتسيا تارتىلىپتى. يندۋستريالاندىرۋدىڭ ەكىنشى بەس جىلدىعى اياسىندا 19 جوبا ىسكە اسىرىلىپ, ناتيجەسىندە 3 مىڭداي جۇمىس ورنى اشىلدى. بيىل يندۋستريالاندىرۋ كارتاسى اياسىندا تاعى 8 جاڭا جوبا جۇزەگە اسىرىلماق.
وڭىردە سۋارمالى جەرلەردىڭ كولەمىن ارتتىرۋ بويىنشا جۇمىس جالعاسۋدا. بيىل بۇل كورسەتكىش 59 مىڭ گەكتارعا جەتكىزىلمەك. ەرتىس وزەنى مەن ساتباەۆ سۋ ارناسى بويىندا 120 مىڭ گەكتاردان استام القاپتا سۋارمالى ەگىستىك شارۋاشىلىعىن دامىتۋ جوسپارلانۋدا. وبلىسىمىز ءۇشىن جاڭا باعىت – وڭتۇستىكتەگىدەي قانت قىزىلشاسىن ءوسىرىپ, ءوندىرۋ باستالماقشى. قازىرگى ۋاقىتتا قانت قىزىلشاسىن وڭدەيتىن كاسىپورىن سالۋ ماسەلەسى تالقىلانۋدا. وڭىردە اگروونەركاسىپتىك كەشەننىڭ الەۋەتىن پايدالانىپ, 2022 جىلعا دەيىن وڭدەلگەن اۋىل شارۋاشىلىعى ونىمدەرىنىڭ ەكسپورتى مەن جۇمىس ونىمدىلىگىن 2,5 ەسە ارتتىرۋ جوباسى دا قولعا الىنۋدا.
ەلباسىنىڭ تاپسىرماسىنا سايكەس, مەكتەپكە دەيىنگى ءبىلىم بەرۋ ساپاسىن تۇبەگەيلى جاقسارتۋىمىز كەرەك. بۇل سالادا بىلىكتىلىك تالاپتارىن, وقىتۋ ءادىسىن, تاربيەشىلەردىڭ جانە بالاباقشاداعى باسقا دا قىزمەتكەرلەردىڭ ەڭبەگىنە اقى تولەۋ جۇيەسىن قايتا قاراۋ قاجەت. ب.باقاۋوۆ وسى ماقساتتا وبلىسىمىزدا ءتيىستى «جول كارتاسى» ازىرلەنىپ جاتقانىن ايتتى.
وبلىس اكىمى تۇرعىن ءۇي ماسەلەسىنە دە توقتالدى. بۇل رەتتە, مەملەكەت باسشىسى تۇرعىن ءۇي يپوتەكاسىنىڭ قولجەتىمدىلىگىن ارتتىراتىن جاڭا اۋقىمداعى «7-20-25» باعدارلاماسى بويىنشا جۇمىستى كۇشەيتۋدى تاپسىرعان بولاتىن. – ءبىز اتالعان باعدارلاماعا قاتىسۋعا نيەتتى بيۋدجەتتىك سالا ماماندارى ءۇشىن العاشقى جارنالارىن ءىشىنارا سۋبسيديالاۋدى قولعا الماقپىز, – دەدى ايماق باسشىسى.
وبلىس اكىمىنىڭ ءبىرىنشى ورىنباسارى ۇلان جازىلبەكتىڭ ايتۋىنشا, وڭىردە «نۇرلى جەر» باعدارلاماسى ارقىلى بيىل 300 مىڭ شارشى مەتر تۇرعىن ءۇي پايدالانۋعا بەرىلمەك. «7-20-25» باعدارلاماسى بويىنشا 305 پاتەر ساتىلىپ جاتىر. بۇگىندە باعدارلاما بويىنشا 13 ءوتىنىش ءتۇسىپ, ونىڭ 7-ءۋى ماقۇلدانعان.
– وكىنىشكە قاراي, بۇعان دەيىن «7-20-25» باعدارلاماسى بويىنشا وتىنىشتەر از بولدى. بۇعان پاتەر ساتىپ الۋعا قاجەتتى العاشقى جارنا كولەمىنىڭ كوپتىگى سەبەپ بولعانداي, – دەدى ۇ.جازىلبەك.
ال وبلىس اكىمىنىڭ ورىنباسارى ءاليا ارىنوۆا وبلىس بويىنشا سالىقتىق بورىشى بار 12 مىڭ كاسىپكەردىڭ 927 ميلليون تەڭگە كولەمىندەگى قارىزى امنيستيالاناتىنىن ايتتى. شاعىن جانە ورتا بيزنەس سالاسىندا سوڭعى ەكى جىلدا جالپى قۇنى 14 ملرد تەڭگە بولاتىن 280 جوبا قارجىلاندىرىلعان. وبلىس اكىمىنىڭ الەۋمەتتىك ماسەلەلەر جونىندەگى ورىنباسارى مەيرام بەگەنتاەۆ ەلباسى تاپسىرماسىنا سايكەس مەكتەپكە دەيىنگى مەكەمەلەردەگى وقىتۋ باعدارلامالارى قايتا قارالاتىنىن جەتكىزدى. بيىلعى جىلدىڭ 1 قىركۇيەگىنەن باستاپ وبلىسىمىزدا 1 جانە 8 سىنىپ ارالىعىنداعى 74 مىڭ وقۋشى نازارباەۆ زياتكەرلىك مەكتەبىنىڭ وقىتۋ ۇلگىسىمەن ءبىلىم الىپ جاتقانىن جەتكىزدى.
وبلىستىق ءماسليحات حاتشىسى باقىت بەكسەيىتوۆا ۇستازدارعا كوممۋنالدىق تولەمدەر جاساۋدا جەڭىلدىكتەر ۇسىنىلۋى, باستاپقى جارناسىز تۇرعىن ءۇي الۋ, جەڭىلدىكپەن ساناتوريلەردە دەم الۋ قۇقىعى بەرىلۋى قاجەت دەگەن ۇسىنىسىن ايتتى. ال تەرەڭكول اۋدانىنىڭ اكىمى جانات شۇعاەۆتىڭ ايتۋىنشا, اۋداندا اۋىل شارۋاشىلىعى سالاسىندا جەرلەردى ءتيىمدى پايدالانۋ, سۋارمالى ەگىستىك القاپتارىنىڭ كولەمىن ارتتىرۋ مىندەتى تۇر.
قالا اكىمى ءانۋار كۇمپەكەەۆتىڭ ايتۋىنشا, تۇرعىن ءۇي-كوممۋنالدىق شارۋاشىلىق سالاسىندا «پاۆلودار ەلەكتر جەلىلەرىن تاراتۋ كومپانياسى» اق سياقتى كاسىپورىنداردىڭ كەيبىر قىزمەتتەرىنىڭ اقىسى تومەندەتىلۋدە. ءوز سوزىندە وبلىس ورتالىعىنداعى نازارباەۆ زياتكەرلىك مەكتەبىنىڭ ديرەكتورى رينات جۇماباەۆ وبلىستىق ورتا ءبىلىم بەرۋ مەكەمەلەرىمەن تاجىريبە الماسۋ باعىتىندا جۇمىس ىستەۋگە ءازىر ەكەنىن جەتكىزدى.
ال «مۇناي-حيميا زاۋىتى» جشس-ءنىڭ ۆيتسە-پرەزيدەنتى ەرمەك بايمۇحانوۆ ءوندىرىستى قولداۋ باعىتىندا مەملەكەت تاراپىنان كورسەتىلىپ جاتقان شارالاردىڭ ماڭىزدىلىعىن اتاپ ءوتتى. كاسىپورىندا قازىر تەحنولوگيا, ساندىق جۇيە قىر-سىرىن بىلەتىن بىلىكتى, ءبىلىمدى جاستار ەڭبەك ەتۋدە. ويتكەنى مۇناي زاۋىتىندا جۇمىستار تۇگەل اۆتوماتتاندىرىلعان.
اكتيۆ وتىرىسى سوڭىندا ءوڭىر باسشىسى بولات باقاۋوۆ جيىنعا قاتىسۋشىلاردى جولداۋ جۇكتەگەن مىندەتتەردى بىرلەسە جۇزەگە اسىرۋعا شاقىردى.
فاريدا بىقاي,
«ەگەمەن قازاقستان»
پاۆلودار وبلىسى