بۇگىن سپورتپەن اينالىسىپ, سالاۋاتتى ءومىر سالتىن ساقتايتىن ءتورت مىڭ ادام قالا كوشەلەرىمەن ءبىرىنشى «الماتى جارتىلاي مارافونىن» جۇگىرىپ ءوتتى. وعان قازاقستان, اقش, فرانتسيا, جاپونيا, رەسەي, قىرعىز رەسپۋبليكاسى مەن وزگە ەلدەردىڭ سپورتشىلارى قاتىستى.
مارەگە ءبىرىنشى بولىپ 10 كم قاشىقتىققا جۇگىرۋدەن العا شىققاندار جەتتى. ەرلەر اراسىندا دميتري يۆانچۋكوۆ (مەركە ق.), قىزدار اراسىندا مادينا كەريموۆا, (تالدىقورعان ق.) ءبىرىنشى بولىپ ەڭسەردى.
ەڭ جۇيرىك جارتىلاي مارافونشى 21 كم قاشىقتىقتىقتى باعىندىرعان يليا تياپكين (بيشكەك ق.) بولدى. ال ايەلدەر قاتارىنان ەرلەر اراسىنداعى ءابسوليۋتتى چەمپيوننان نەبارى 8 مينۋتقا ارتتا قالعان سيتورا حاميدوۆا (تەرمەز ق.) جەڭىپاز اتاندى.
- «الماتى جارتىلاي مارافونى» العاش رەت ءوتتى. ەندى, ول جىل سايىن كۇزدە ۇيىمداستىرىلادى. جارتى جىلدان كەيىن 21 ساۋىردە ءبىز بارلىق قاتىسۋشىلاردى ونداعان مىڭ جۇگىرۋشى كۇتەتىن شارا – «الماتى مارافونىندا» قارسى الامىز. جۇگىرۋ جارىستارىمىزدىڭ ءبارى ورتالىق ازياداعى ەڭ باستى جۇگىرۋ جارىسىنا دايىندىق اياسىندا وتەدى»,-دەدى ء«بىرىنشى بولۋعا باتىلدىق» كورپوراتيۆتىك قورىنىڭ ديرەكتورى سالتانات قازىباەۆا.
جارىس سورەسىنە جاستى 60-تان اسقان 41 قاتىسۋشى شىقسا, ولاردىڭ 16-سى جارتىلاي مارافون قاشىقتىعىن ەڭسەردى.
- مەن جۇگىرۋ جارىستارىنا بۇرىننان بەرى قاتىسىپ كەلەمىن. تەك الماتى نەمەسە قازاقستاندا ەمەس, سونىمەن بىرگە شەتەلدە وتەتىن جارىستارعا ۇزبەي قاتىسۋعا تىرىسامىن. ەشقاشان مۇنىمەن كاسىبي تۇردە اينالىسقان جوقپىن, دەگەنمەن, وسى ۋاقىتقا دەيىن 150 000 كم جۇگىردىم, - دەيدى جارتىلاي مارافوننىڭ 71-جاستاعى قاتىسۋشىسى مارات بالتاباەۆ. مارات ءشارىپ ۇلى جاقىندا ارداگەرلەردىڭ I ازيا-تىنىق مۇحيتى ويىندارىندا 3 التىن القا الدى. – ءبىزدىڭ ۇرانىمىز – «سپورت-ءدىنىمىز, ال جۇگىرۋ - دۇعامىز». ونى كۇن سايىن ۇستانامىز. مەن بارشاڭىزعا سپورتپەن شۇعىلدانۋعا جانە وزدەرىڭىزدى ارقاشان سەرگەك ۇستاۋعا كەڭەس بەرەمىن!
«الماتى جارتىلاي مارافونىنىڭ» ءار قاتىسۋشىسى القا الدى. 21 كم قاشىقتىققا جۇگىرۋدەن ءابسوليۋتتى چەمپيوندار 1,5 ميلليون تەڭگە كولەمىندە جۇلدە قورىن ءوزارا ءبولىستى.