پاۆلوداردا كومىردى تاسىمالداۋمەن 300-گە جۋىق شاعىن جانە ورتا كاسىپكەرلىك ورىندارى اينالىسۋدا

ال, وبلىس ورتالىعىندا «ەليت KZ», «ا-ۆەست پاۆلودار» جانە «سەۆەر-ەنەرگوۋگولسناب» جشس-تارى جەتكىزىلگەن كومىردى ساتۋدا. جانار-جاعار ماي وتىنىنىڭ باعا تۇراقسىزدىعىنا وراي, كومىر باعاسى دا تۇراقتى رەتتەلمەي, وزگەرىپ تۇرۋى دا مۇمكىن.

باسقارما ماماندارىن ايتۋىنشا, كومىردىڭ باعاسىن كەنىشتەر بەكىتەدى. قازىر اكىمدىكتەرمەن كومىر جەتكىزۋ بويىنشا كەلىسىشارتتار جاسالدى. مىسالى, «مايكوبەن-ۆەست» جشس بيىل كومىردىڭ 1 تونناسىن 6500 تەڭگەگە وتكىزبەكشى. كومىر قورى ەركىن ساۋدادا جەتكىلىكتى. قاراعاندىداعى شۇباركولدىڭ كومىرىنىڭ تونناسى 17 مىڭ تەڭگە, مايكوبە كومىرى 12 مىڭ تەڭگە. تۇرعىندار سەمەيدىڭ قاراجىرا كومىر كەنىشىنىڭ دە كومىرىن تۇتىنادى.

وڭىردەگى كومىر ساتۋ قورلارىندا قازىر 18 مىڭ توننا كومىر بار, ونىڭ 14,2 مىڭ تونناسى - قوڭىر كومىر, 3,8 مىڭ تونناسى – تاس كومىر. اۋىلداردىڭ الىس-جاقىندىعىنا قاراي, كومىردىڭ ءتۇرى, ساپاسىنا ساي ءبىر تونناسى 6800-17000 تەڭگە ارالىعىندا تۇرادى. كومىر ساۋدالايتىن سەرىكتەستىكتەردىڭ ءتيىستى سەرتيفيكاتتارى بار, سالىق, ەميسسيا سىندى مىندەتتى تولەمدەردى جاسايدى. اتالعان ساۋدا ورىندارى كومىردى اكىمدىك ۇسىنعان باعا بويىنشا ساتادى.

باسقارما ماماندارى تۇرعىندارعا كومىردى ەرتەرەك الۋدى ەسكەرتتىك. قازىر ءوڭىردىڭ قالا-اۋداندارىنداعى كومىر ساتاتىن ورىندار تولىپ تۇر. قاجەت بولعان جاعدايدا تاعى دا جەتكىزىلەدى,-دەيدى.

مىسالى, شارباقتى اۋدانىنداعى الەۋمەتتىك سالا نىساندارىنىڭ 35-ءى كومىرمەن, 12-ءى ەلەكتر قۋاتى ارقىلى جىلىتىلادى. بۇل كۇندەرى اۋدانداعى بۇل نىساندار 14 235 توننا كومىرمەن قامتاماسىز ەتىلدى. بارلىق جۇمىسشىلاردىڭ قازاندىق جابدىعىمەن جۇمىس جاساۋعا رۇحسات بەرەتىن قۇجاتتارى دا بار.

كوممۋنالدىق-تۇرمىستىق سالا مەن اۋىل, قالا تۇرعىندارىن كومىرمەن قامتاماسىز ەتۋ ءۇشىن وبلىستىق اكىمدىك ارنايى جول كارتاسىن بەكىتتى. بۇل ماسەلەگە جاۋاپتىلار مەن نەگىزگى شارالار بەلگىلەندى.

مالىمەتىنشە, وڭىردەگى الەۋمەتتىك سالا نىساندارىنىڭ قازاندىقتارىنا الداعى قىسقا 141 مىڭ توننا كومىر ساتىپ الۋ ءۇشىن 1,4 ملرد تەڭگە قاراستىرىلىپتى.

فاريدا بىقاي,

«ەگەمەن قازاقستان»

پاۆلودار