اتىراۋ وبلىسى اكىمى جانىنداعى جاستار ءىسى جونىندەگى كەڭەستىڭ وتىرىسى ءوتتى.
وبلىستىق جاستار ساياساتى ماسەلەلەرى باسقارماسىنىڭ باسشىسى روللان قۇسپان جاستاردى الەۋمەتتىك قولداۋ جانە جۇمىسپەن قامتاماسىز ەتۋ, جاستار ساياساتىن جۇزەگە اسىرۋ, جاستار ۇيىمدارىن بىرىكتىرۋ تۋرالى مالىمدەدى.
- رەسۋرستىق ورتالىقتار جاستارمەن ۇلكەن جۇمىس جۇرگىزۋدە. بۇگىندە ولار وبلىستىڭ بارلىق اۋداندارىندا قۇرىلعان. بۇل ورتالىقتار جاستارعا ناقتى كومەك كورسەتۋ ورنىنا اينالدى. ولارعا جىل باسىنان بەرى ءتۇرلى ماسەلەلەر بويىنشا 1,8 مىڭنان استام ادام ءوتىنىش بىلدىرگەن. جالپى ايتقاندا,جۇمىسقا ورنالاسۋ, شىعارماشىلىق يدەيالار جانە ءوز ءىسىن اشۋ بويىنشا وتىنىشتەر ءتۇسىپ وتىر,- دەيدى روللان قۇسپان.
بۇگىنگى تاڭدا وبلىستا شامامەن 147 مىڭ جاس تۇرادى, بۇل وبلىس حالقىنىڭ 24% -ءى.
- جىل باسىنان بەرى 5 مىڭنان استام ادام قاتىسقان 27 جاستار جارمەڭكەسى وتكىزىلدى. 70 كاسىپورىن 900 بوس جۇمىس ورنىن ۇسىندى, ناتيجەسىندە 130 جاس جۇمىسقا ورنالاستى, - دەپ اتاپ ءوتتى روللان قۇسپان. – "جاسىل ەل" باعدارلاماسى بويىنشا جاستاردى جازعى ۋاقىتتا جۇمىسقا تارتۋ بويىنشا دا اۋقىمدى جۇمىستار جۇرگىزىلدى. 2150 ستۋدەنت جانە جۇمىسسىز جاستار وسى جوباعا قاتىسۋعا مۇمكىندىك الدى. وسى ماقساتتا جەرگىلىكتى جانە رەسپۋبليكالىق بيۋدجەتتەن 140,5 ملن. تەڭگە ءبولىندى.
جاستاردى جۇمىسقا ورنالاستىرۋدىڭ تاعى ءبىر باعىتى "ديپلوممەن اۋىلعا" باعدارلاماسى. جىل باسىنان بەرى 32 جاس مامان بيۋدجەتتىك نەسيە الدى. 125 – كوتەرمە جاردەماقى. جاس مامانداردى اۋىلعا تارتۋ مەملەكەتتىڭ باسىم مىندەتتەرىنىڭ ءبىرى.
جاستار ساياساتى ماسەلەلەرى باسقارماسى باسشىسىنىڭ ايتۋىنشا, وبلىس جاستارى بۇگىندە ءتۇرلى مادەني, سپورتتىق, شىعارماشىلىق جوبالارمەن قامتىلعان. بۇل – پىكىرتالاس كلۋبى, دەلفي ويىندارى, ەتنوفەستيۆالدار, جاستار تەاترى جانە تاعى باسقالار.
كەڭەس وتىرىسىندا قىزىلقوعا اۋدانىنىڭ اكىمى ارمان باجەنوۆتىڭ بايانداماسى تىڭدالدى. اۋداندا جاستاردى قوعامدىق ومىرگە تارتۋ بويىنشا ۇلكەن جۇمىستار اتقارىلدى. بۇل – جاس مامانداردى جۇمىسقا ورنالاستىرۋ, الەۋمەتتىك جانە مەملەكەتتىك قولداۋ كورسەتۋ جانە ءتۇسىندىرۋ.
وبلىس اكىمى نۇرلان نوعاەۆ جينالىستى قورىتىندىلاي كەلە, جاستار ساياساتى بويىنشا وڭىردە كوپتەگەن پايدالى جۇمىستار اتقارىلعانىن اتاپ ءوتتى. بىراق, كەيبىر ماسەلەلەر دە بار.
-ءبىرىنشى كەزەكتە,بۇل جاستاردى جۇمىسپەن قامتاماسىز ەتۋ. ءار قالا,اۋدان بويىنشا تالداۋ جۇرگىزۋ قاجەت. قازىر جوو-نىڭ قانشا تۇلەگى جۇمىسسىز, ۇسىنىلاتىن جۇمىستان باس تارتۋدىڭ نەگىزگى سەبەبى قانداي؟ وزدەرىڭىز بىلەسىزدەر,جۇمىس بەرۋشىلەر 900 بوس قىزمەت ورنىن ۇسىنىپ جانە تەك 130 ادام جۇمىسقا ورنالاسىپ وتىر. ءبىز جاستارعا مەملەكەت ۇسىناتىن بارلىق جاعدايدى ءتۇسىندىرۋىمىز كەرەك, - دەدى نۇرلان نوعاەۆ.- ەلباسى ءوزىنىڭ جولداۋىندا 2019 جىلدى جاستار جىلى دەپ جاريالادى. ءبىز قانداي جۇمىس جۇرگىزەمىز؟ بۇل ءۇشىن نە قاجەت؟ بۇل ماسەلەلەردىڭ بارلىعى كۇندەلىكتى باقىلاۋدا بولۋى ءتيىس.
جيىندا جاستار ساياساتىن دامىتۋ بويىنشا جاڭا جوسپارلار ايتىلدى. 2019-2021 جىلدارعا ارنالعان ءوڭىردىڭ «جول كارتاسى» ازىرلەنۋدە, وندا جاستارمەن جۇمىس جاساۋدىڭ ستراتەگيالىق باعىتتارى ايقىندالعان.
وبلىس باسشىسى جاستار رەسۋرستىق ورتالىقتارىن ودان ءارى قولداۋ جونىندەگى ۇسىنىستاردى ماقۇلداپ, اكىمدەرگە ورتالىقتاردى بارلىق دەڭگەيدەگى قاجەتتىلىكتەرمەن قامتاماسىز ەتۋدى تاپسىردى.
- جاستار جينالاتىن ورىندار. بۇل ورتالىقتاردا وزگە دە جاستار ۇيىمدارى ورنالاسا الادى. تۋىنداعان ماسەلەلەردى تالقىلاپ, تاجىريبە الماسىپ, جاستارمەن جۇمىس ىستەۋدىڭ بىرىڭعاي تۇجىرىمداماسىن ازىرلەۋگە مۇمكىندىك الادى, - دەپ ەسەپتەيدى نۇرلان نوعاەۆ.
– ويتكەنى بۇگىنگى تاڭدا جاستار قوزعالىسىنىڭ كوشباسشىلارى بارلىق جاس ۇرپاقتى كوشتەرىنە ىلەستىرىپ, ولاردى جاقسى ىستەرگە باعىتتاۋى ءتيىس. سوزىمە جاستار نازار اۋداراتىن تاقىرىپ قوزعايتىن جاستار تەاترى مىسال. جۇمىسقا اقساقالدار, قوعامدىق كەڭەستەر, دەپۋتاتتار, اۋدان اكىمدەرى, بارلىق بولىمدەردىڭ باسشىلارى قاتىسۋى ءتيىس. تەك بىرلەسكەن كۇش-جىگەرىمىزبەن عانا ءبىز الدىمىزعا قويىلعان مىندەتتەردى ورىنداي الامىز.
كەزدەسۋ بارىسىندا جاستار ۇيىمدارىنىڭ باسشىلارى وبلىس اكىمىنەن كەڭسەلەرمەن قامتاماسىز ەتىپ, جاستار باستامالارىن دامىتۋعا ارنالعان نەسيەلەردى سۋبسيديالاۋدى ءوتىندى. نۇرلان نوعاەۆ اتىراۋ قالاسىندا جاستار سارايىنىڭ,شىعارماشىلىق ورتالىقتىڭ قۇرىلىسى ءجۇرىپ جاتقانىن ەسكە سالدى. سول عيماراتتاردا جاستارعا بارلىق جاعدايلار جاسالادى.
- جاستارمەن جۇمىس جاساۋ جاۋاپتى ءارى قيىن جۇمىس. ءبىز سىزدەردىڭ باستامالارىڭىزدى ارقاشان قولدايمىز. قارجىلىق جاعىنان دا قولداۋ بىلدىرەمىز,- دەپ قورىتىندىلادى وبلىس اكىمى.