اتىراۋداعى جەڭىس ساياباعىندا قازاقستان رەسپۋبليكاسى قارۋلى كۇشتەرىنىڭ قاتارىنا قابىلداۋ سالتاناتى ءوتتى. اتىراۋلىق 40 سارباز تاراز قالاسىنداعى قۇرلىق اسكەرىنە شۇعىل اسكەري قىزمەتكە جىبەرىلدى. وبلىس اكىمى نۇرلان نوعاەۆ بولاشاق جاۋىنگەرلەر, ولاردىڭ تۋىستارى مەن جاقىندارى الدىندا ءسوز سويلەدى.
- بۇگىن ءبىز قازاقستاندىق اسكەر قاتارىنا جاس جىگىتتەرىمىزدى وتان الدىنداعى بورىشىن اتقارۋعا جىبەرەمىز. بىراق, بورىشتان بولەك, اسكەري قىزمەت – سارباز ءۇشىن ەڭ جاقسى ومىرلىك مەكتەپ. اسكەردەگى قىزمەت بىرقاتارىڭىزعا جەتىلۋ, مىنەز, باتىلدىق ءۇشىن ومىرلەرىڭىزدەگى العاشقى سىناق,- دەدى نۇرلان نوعاەۆ. – بۇگىندە ءبىزدىڭ ەلىمىز الەمدىك كەڭىستىكتە وزىنە لايىقتى ورنى بار مەملەكەت. بۇل, البەتتە, ەلباسىمىز, باس قولباسشى نۇرسۇلتان نازارباەۆتىڭ ىشكى جانە سىرتقى سارابدال ساياساتىنىڭ ارقاسى. قازاقستاندىق اسكەر ءۇشىن ماتەريالدىق-تەحنيكالىق بازا, الەۋمەتتىك كومەك تۇرعىسىنان بارلىق جاعداي قاراستىرىلعان. بۇل ءبىزدىڭ اسكەرگە شەكارامىزدى قورعاۋدا العا قويىلعان ستراتەگيالىق تاپسىرمالاردى ورىنداۋعا مۇمكىندىك بەرەدى. جاس ساربازدارعا ازاماتتىق بورىشتارىن لايىقتى تۇردە وتەپ, انتتارىنا ادال بولۋلارىن تىلەيمىن.
وبلىس باسشىسى سونىمەن قاتار, جاۋىنگەرلەرگە اسكەري قىزمەت قيىندىعىنا مويىماي, امان ورالىپ, باتىلدىق تانىتىپ, مۇقتاج ادامدارعا ءاردايىم كومەك كورسەتۋگە قابىلەتتى بولۋلارىن تىلەدى.باستى مىندەت – جاس ۇرپاق ساناسىندا ءوز ەلى مەن بولاشاعىنا دەگەن ماقتانىش پەن جاۋاپكەرشىلىك سەزىمىن وياتۋ. كوپتەگەن جاستار وتانعا قىزمەت ەتۋ – ءار ەر ازاماتتىڭ بورىشى ەكەنىن تۇسىنەدى.
اتىراۋ وبلىستىق قورعانىس ىستەرى دەپارتامەنتىنىڭ باسشىسى, پولكوۆنيك باتىرحان اقباليەۆتىڭ ايتۋىنشا, بۇگىنگى جاۋىنگەرلەردىڭ ءار قايسىسى ناعىز سارباز بولۋعا لايىقتى.
- اسكەردەگى قىزمەت كەشەگى ءجاسوسپىرىمدى كەلەشەك وتانىنا ادال ەر ازامات بولۋعا تاربيەلەيدى. اق جول تىلەيمىز, - دەدى باتىرحان اقبالاەۆ.
اتىراۋ قالالىق ارداگەرلەر كەڭەسىنىڭ توراعاسى الىپقالي بەكەش جانە ساربازداردىڭ تۋىسقاندارى دا ءوز تىلەكتەرىن ءبىلدىردى.
ايتا كەتەيىك, 10 قىركۇيەكتە قازاقستاندا ساربازداردى كۇزگى قارۋلى كۇشتەر قاتارىنا شاقىرۋ باستالعان بولاتىن. رەسپۋبليكا بويىنشا 1992-2000 جىلى تۋىلعان 17 مىڭنان اسا ازاماتتى شاقىرۋ جوسپارلانعان. اتىراۋ وبلىسىنان كۇزگى ماۋسىمعا 826 سارباز شاقىرىلدى. 215-ءى اسكەري بولىمدەرگە ورنالاسۋعا جىبەرىلدى. ولاردىڭ 175-ءى ۇقك شەكارا قىزمەتىنە, 40-ى قارۋلى كۇشتەرگە قابىلداندى.