جاسوسپىرىمدەردىڭ ولميپيادا ويىندارىندا قازاقستاندىق سپورتشىلار كانوە ەسۋ سپورتىندا دياس باحراددين التىن مەدال, ستەللا سۋحانوۆا قولا مەدال جەڭىپ الدى, دەپ حابارلايدى Olympic.kz.
سپرينت جارىسىنىڭ ىرىكتەۋ كەزەڭىندە 16 جاستاعى دياس باحراددين ەكىنشى ورىن الدى. سودان كەيىن شيرەك فينالدا ۋكراينالىق تاراسا كۋزىكانى جارىس جولىنان ىعىستىردى. جارتىلاي فينالدا ءبىزدىڭ سپورتشى ۆەنگريالىق بالاز پاللانى ءۇش سەكۋندقا وزىپ كەتتتى. فينالدا وزبەكستاندىق يسلومجون ابدۋسالوموۆ دياسقا قارسىلاس اتاندى. تارتىستى وتكەن باسەكەدە دياس باحراددين مارەگە 1:54.66 ناتيجەسىمەن ءبىرىنشى كەلدى. ابدۋسالوموۆتىڭ ۋاقىتى - 1:55.17.
«وزدەرىڭىز كورگەندەي جارىس وتە قيىن بولدى. دەگەنمەن جەڭىسكە جەتتىك. فينالدا بار كۇشىمدى جيناپ, جەڭىسكە جەتۋگە تىرىستىم. وزبەكستاندىق قارسىلاسىم مىقتى سپورتشى. تالاي باسەكەلەردە جارىسىپ ءجۇرمىز. بۇگىنگى تاڭدا جاسوسپىرىمدەر اراسىنداعى وليمپيادا ويىندارىنداعى جۇلدەم سپورتتىق مانسابىمداعى باستى جەتىستىگىم. ەل قورجىنىنا مەدال سالعانىم ءۇشىن وتە قۋانىشتىمىن», دەدى كانوە ەسۋدەن جاسوسپىرىمدەردىڭ وليمپيادا ويىندارىنىڭ جەڭىمپازى دياس باحريددين.
15 جاستاعى ستەللا سۋحانوۆا بولسا ىرىكتەۋ كەزەڭىندە 1:54.64 ناتيجەنى كورسەتىپ, كەلەسى اينالىمعا ءتورتىنشى ورىنمەن ءوتتى. سودان كەيىن ستەللا اۆستراليالىق قارسىلاسىنان بۇرىن مارەگە كەلدى. شيرەك فينالدا يتاليا ەلىنىڭ وكىلى
ليۋكرەتسيازيرونيدى وزىپ كەتتى. جارتىلاي فينالدا قازاقستاندىق كانوە ەسۋشى ۆەنگريالىق ەستەر رەندەسسيگە جول بەرىپ قويىپ, قولا مەدال ءۇشىن تالاسۋعا مۇمكىندىك الدى. ءۇشىنشى ورىن ءۇشىن وتكەن سىندا ستەللا سۋحانوۆا بەرىلگەن قاشىقتىقتا نەمىس دجينا زينتتەن شامامەن ءۇش سەكۋند جىلدام بولدى. ستەللانىڭ ۋاقىتى- 1:54.25.
«وتە قۋانىشتىمىن. دياس ءۇشىن دە قۋانىشتىمىن. ەموتسيا اسىپ تۇر. سوزبەن جەتكىزە المايمىن. جارىس وتە قيىن بولدى. قولا مەدال وڭاي كەلگەن جوق. ەلىم ءۇشىن قۋانىشتىمىن. وسى سپورت تۇرىندەگى بۇل جاقسى جەتىستىك. «ۆ» جولىمەن جارىسۋ وڭاي بولعان جوق. اسىرەسە بۇرىلىسقا كىرۋ قيىنعا سوقتى. جارتىلاي فينالدا تولقىنىستان بولار, سەنىمسىزدەۋ ونەر كوسەرتتىم. ال قولا مەدال ءۇشىن تالاستا بارىمدى سالدىم», دەيدى كانوە ەسۋ جارىسىنان جاسوسپىرىمدەر اراسىنداعى وليمپيادا ويىندارىنىڭ قولا جۇلدەگەرى ستەللا سۋحانوۆا.
ايتا كەتەيىك, وسى وليمپيادا ويىندارىندا قازاقستان قۇراماسىنىڭ قورجىنىندا ءتورت مەدال بار. العاشقى ەكەۋىن دزيۋدوشىلار بەكارىس سادۋاقاس پەن مارگاريتا گريتسەنكو جەڭىپ العان ەدى.