ەلىمىزدەگى بايىرعى وقۋ ورنى اباي اتىنداعى قازاق ۇلتتىق پەداگوگيكالىق ۋنيۆەرسيتەتى بۇگىندە ءىرى عىلىمي جانە ءبىلىم بەرۋ ورتالىعى دارەجەسىنە جەتكەن.
ءوزىنىڭ 90 جىلدىق تاريحىندا پەداگوگ مامانداردى دايارلاۋ ءىسىنىڭ وزىق جەتىستىكتەرى مەن زاماناۋي ءبىلىم بەرۋ ۇلگىلەرىن يگەرگەن وقۋ ورنى جاھاندىق ءبىلىم بەرۋ كەڭىستىگىندە جوعارى دەڭگەيدەگى ۋنيۆەرسيتەتتەر قاتارىندا اتالادى. جاقىندا مەرەيتويىن سالتاناتتى جاعدايدا اتاپ وتكەن ۋنيۆەرسيتەت ۇجىمى باسەكەگە قابىلەتتى ماماندار دايارلاۋ سالاسىنداعى وزىق جەتىستىكتەرىن ۇلگى ەتە وتىرىپ, تاعى ءبىر ەرەكشە كەزەڭگە قادام باستى.
سالتاناتتى جيىنعا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا قاتىسىپ, پرەزيدەنت نۇرسۇلتان نازارباەۆتىڭ ارنايى قۇتتىقتاۋىن وقىدى. وتاندىق جوعارى ءبىلىم بەرۋ جۇيەسىنىڭ قارا شاڭىراعى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ تاريحى ەلىمىزدەگى جالعىز پەداگوگيكالىق فاكۋلتەتتەن باستاۋ الىپ, جەتەكشى وقۋ ورنىنا اينالىپ وتىر. وقۋ ورنىنىڭ قالىپتاسۋىندا بەلگىلى ۇلت قايراتكەرلەرى احمەت بايتۇرسىنوۆ, حالەل دوسمۇحامەدوۆ, ساكەن سەيفۋللين, تەمىربەك جۇرگەنوۆ جانە كوپتەگەن كورنەكتى تۇلعالاردىڭ قوسقان ۇلەسى زور. بۇگىندە ۋنيۆەرسيتەتتە قازاقستاننىڭ قارىشتى دامۋىنا قاجەتتى ماماندار دايارلايتىن 14 اكادەميك, 155 عىلىم دوكتورى جانە 380 عىلىم كانديداتى ساباق بەرىپ كەلەدى.
شارا اياسىندا قر ءبىلىم جانە عىلىم ءمينيسترى ەرلان ساعاديەۆتىڭ قۇتتىقتاۋىن ۆيتسە-مينيستر ەلميرا سۋحانبەرديەۆا وقىپ, مەرەكەلىك شاراعا تىلەگىن ءبىلدىردى. ال ءوز كەزەگىندە فرانتسيانىڭ قازاقستانداعى توتەنشە جانە وكىلەتتى ەلشىسى فيليپپ مارتينە ء سوز سويلەپ, ۋنيۆەرسيتەت ۇجىمىنا جەتىستىكتەر تىلەدى.
رەكتور تاكير بالىقباەۆ مەرەيتويلىق ءىس-شارانىڭ ماڭىزدىلىعىنا توقتالا كەلە, قازاقستاننىڭ پەداگوگيكا سالاسىنداعى جەتەكشى عىلىمي جانە ءبىلىم بەرۋ ورتالىعى رەتىندەگى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ جىل سايىعى الەمدىك جانە ۇلتتىق رەيتينگگى تۋرالى اتاپ ءوتتى. بيىلعى جىلى QS World University Rankings رەيتينگسىنىڭ قورىتىندىسىنا سايكەس اباي اتىنداعى قازۇپۋ الەمنىڭ ۇزدىك ۋنيۆەرسيتەتتەرى اراسىندا 481-ءشى ورىنعا كوتەرىلسە, Emerging Europe جانە Central Asia ارنايى رەيتينگىندە ەۋروپانىڭ جانە ورتالىق ازيانىڭ 30 ەلىندەگى 200 جوعارى وقۋ ورىندارى اراسىندا 86 ورىندى يەلەنگەن. قازىرگى ۋاقىتتا ۋنيۆەرسيتەت الەمنىڭ 25 ەلىندەگى 130 جوعارى وقۋ ورنىمەن عىلىمي جانە اكادەميالىق بايلانىس ورناتىپ, حالىقارالىق ىنتىماقتاستىق اياسىن كەڭەيتىپ كەلەدى.
ۇلتتىق ۋنيۆەرسيتەتتىڭ مەرەيتويلىق سالتاناتىنا قر پارلامەنت سەناتىنىڭ دەپۋتاتى دينار نۇكەتاەۆا, عالىم, قوعام قايراتكەرى ءشامشا بەركىمباەۆا, قر ءبىلىم جانە عىلىم مينيسترلىگىنىڭ وكىلدەرى, ۇلتتىق عىلىم اكادەمياسى جانە شەتەلدەن كەلگەن عالىمدار قاتىستى.
ۋنيۆەرسيتەتتىڭ مەرەيتويى اياسىندا شەتەلدىك ارىپتەستەردىڭ قاتىسۋىمەن بىرقاتار ماڭىزدى شارالار ءوتتى. فرانتسيانىڭ 8 ۋنيۆەرسيتەتىمەن مەموراندۋمعا قول قويىلۋى وقۋ ورنى تاريحىنداعى ماڭىزدى ءىس-شارالاردىڭ بىرىنە اينالدى.
مەرەيتوي اياسىندا ۋنيۆەرسيتەتتىڭ تاريحى مەن جەتىستىكتەرى تۋرالى دەرەكتى فيلم كورسەتىلىپ, قازاق ەسترادا انشىلەرىنىڭ قاتىسۋىمەن مەرەكەلىك كونتسەرت قويىلدى.
ەلۆيرا سەرىكقىزى,
«ەگەمەن قازاقستان»
الماتى