الماتىداعى دوستىق ۇيىندە قازاقستان ۇيعىرلارىنىڭ رەسپۋبليكالىق مادەنيەت ورتالىعى باسقارما مۇشەلەرى مەملەكەت باسشىسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىن تالداۋ بويىنشا كەڭەيتىلگەن جينالىس وتكىزدى. ءىس-شاراعا قازاقستان حالقى اسسامبلەياسىنىڭ مۇشەلەرى, ۇيعىر ەتنو-مادەني ورتالىعىنا قاراستى اقساقالدار كەڭەسى, انالار كەڭەسىنىڭ بەلسەندىلەرى جانە ۇيعىر حالقىنىڭ زيالى قاۋىم وكىلدەرى قاتىستى.
باسقوسۋ بارىسىندا ەلباسى جولداۋىندا ايقىندالعان ماقسات-مىندەتتەر مەن باسىمدىقتار ميلليونداعان حالىقتىڭ تۇرمىس جاعدايىن جاقسارتۋدىڭ تاپتىرماس تەتىگى ەكەندىگى, مەملەكەتتىڭ بارلىق سالاسىنداعى دامۋدىڭ جاڭا ساپالىق دەڭگەيگە كوتەرىلۋىنە كەدەرگى كەلتىرەتىن ارەكەتتەرگە توسقاۋىل قويىپ, تسيفرلىق دامۋ داۋىرىنە اپاراتىن تاريحي قۇجات ەكەندىگى ايتىلدى. اسىرەسە, پرەزيدەنت باسا ايتقان جاستاردىڭ جان-جاقتى جەتىلۋىنە جاعداي جاساۋ جايى اڭگىمەنىڭ وزەگىنە اينالدى. الداعى جىلدىڭ جاستار جىلى دەپ جاريالانۋى ەل ەرتەڭى سانالاتىن وسكەلەڭ ۇرپاققا مەملەكەتىمىز ۇلكەن قامقورلىق تانىتىپ وتىرعانىن كورسەتەدى دەيدى جينالعاندار.
– ءبارىمىز تاعى دا ءبىر تاريحي ءساتتىڭ كۋاسى بولدىق. بۇعان دەيىنگى جولداۋلارداعىداي بۇل جولداۋدا دا قازاقستان حالقىنىڭ ءومىرىن جاقسارتۋعا, تۇرمىسىن تۇزەۋگە باسا نازار اۋدارىلدى. پرەزيدەنتىمىز, حالىقتىڭ ءال-اۋقاتىن ارتتىرۋدىڭ ەڭ توتە جولىن قاداپ ايتىپ بەردى. وزىمىزدە وندىرىلەتىن ونىمدەردىڭ قۋاتىن ارتتىرۋ, وتاندىق تاۋارلارعا قولداۋ كورسەتۋ, كاسىپپەن اينالىسام دەگەن ازاماتتارعا جول اشۋ, ساپالى كادرلار دايارلاۋ, جەمقورلىقتى ءتۇپ-تامىرىمەن جويۋ, مەملەكەتتىك قىزمەتكەرلەر مەن بيۋدجەتتىك سالا ماماندارىنىڭ تابىسىن ارتتىرۋ سىندى وزەكتى ماسەلەلەر جولداۋدا تۇگەل قامتىلدى. الداعى بەس جىل ىشىندە ءبىلىم, عىلىم, دەنساۋلىق ساقتاۋ سالالارىنا جۇمسالاتىن قاراجاتتى ىشكى جالپى ءونىمنىڭ 10 پروتسەنتىنە دەيىن جەتكىزۋ دەگەن مىندەت ەلىمىزدەگى əلەۋمەتتىك سالانىڭ دامۋىن جاڭا بەلەسكە كوتەرەدى دەپ ەسەپتەيمىن. بۇگىندە تاۋەلسىز قازاقستانىمىزدى بۇكىل الەم تانيدى. استانامىز جاھانداعى شۇرايلى شاھاردىڭ بىرىنە اينالدى. مۇنىڭ بارلىعى بىرلىك پەن تاتۋلىقتىڭ, ەلباسىمىزدىڭ كورەگەن ساياساتىنىڭ ارقاسىندا ىسكە اسىپ وتىرعان دۇنيەلەر – دەيدى قازاقستان ۇيعىرلارىنىڭ رەسپۋبليكالىق مادەنيەت ورتالىعىنىڭ توراعاسى, ءماجىلىس دەپۋتاتى شايماردان نۇرىموۆ .
ستراتەگيالىق قۇجاتتا ايتىلعانداي, ءبىلىم بەرۋ جۇيەسى مەن دەنساۋلىق ساقتاۋ سالاسىن جاڭا زامان تالاپتارىنا ساي بەيىمدەۋدىڭ ماڭىزى زور. جولداۋدا كورسەتىلگەن جەكەلەگەن باعىتتاردىڭ بارلىعىن بىرىكتىرەتىن ورتاق كۇش مەملەكەت دامۋى. سوندىقتان, ەلباسى العا قويعان ماقساتتاردى ىسكە اسىرۋدا ءار قوعام مۇشەسى بەلسەندىلىك تانىتۋ قاجەت دەيدى جينالعاندار. شارا بارىسىندا ءسوز العان ەتنومادەني بىرلەستىكتىڭ مۇشەلەرى پرەزيدەنت جولداۋىنا قولداۋ ءبىلدىرىپ, وندا كورسەتىلگەن باعىتتار مەن كوزدەلگەن ماقساتتار بارلىق قوعام مۇشەلەرىن بىرىكتىرە تۇسەتىن كۇش ەكەنىن ايتتى.
ارمان وكتيابر,
«ەگەمەن قازاقستان»
الماتى