«قازاقستاندا ۇشاق بيلەتىنىڭ قۇنى قىمبات. ءتۋريزمنىڭ دامۋىنا كەدەرگى كەلتىرىپ تۇرعان سەبەپتىڭ ءبىرى – وسى». اتىراۋلىق كاسىپكەرلەرمەن كەزدەسكەن شوتلانديانىڭ ابەردين قالاسى اكىمشىلىگىنىڭ كەڭەسشىسى دجون رەينولدس وسىنداي پىكىر ايتتى.
اتىراۋ مەن ابەردين اراسىنداعى بايلانىستى نىعايتۋ ماقساتىندا ارنايى كەلگەن دەلەگاتسيا بىرقاتار كەلىسسوزدەر جۇرگىزدى.
– تەك وزىڭە عانا جۇمىس ىستەسەڭ, كوكجيەگىڭ كەڭىمەيدى. الەمدىك نارىققا شىعۋدىڭ جولدارىن قاراستىرۋ كەرەك, – دەيدى دجون رەينولدس.
– ءبىز IT, اۋىل شارۋاشىلىعى, ونەركاسىپ سالالارىندا تەحنولوگيالارىمىزدى ۇسىنا الامىز. مەن قازاقستاندا سوڭعى رەت 2004 جىلى بولعانمىن, ودان بەرى كوپ نارسە وزگەرىپتى. كومپانيالارىڭىز بىزگە جاقسى قىزمەتتەر مەن تاۋارلار ۇسىنا الاتىنىن كوردىم. اتىراۋدا ءتۋريزمدى دامىتۋ الەۋەتى جوعارى, بىراق اۋە بيلەتتەرىنىڭ باعاسى تىم قىمبات. لوندوننان وسى جەرگە كەلگەنشە جاراتقان قارجىما مەن ەۋروپانى تۇگەل ارالاپ شىعۋىما بولار ەدى. بيۋدجەتتىك اۋە جولىن تارتۋ ارقىلى بۇل ماسەلەنى شەشۋدىڭ جولى بار دەپ ەسەپتەيمىن.
شوتلاندىق كومپانيالار نەگىزىنەن مۇناي سالاسىنا شوعىرلانعان. «فەنيكس يسا» جشس باس ديرەكتورى دۇيسەنبەك سماعۇلوۆ قوناقۇي بيزنەسى, قۇرىلىس ماتەريالدارىن وڭدەۋ بويىنشا دا شەتەلدىك كاسىپكەرلەرمەن بىرلەسە جۇمىس ىستەۋگە نيەتتى ەكەندەرىن ايتادى.
قازىر ايماقتا بريتاندىق كاپيتالدىڭ قاتىسۋىمەن 88 كومپانيا جۇمىس ىستەپ جاتىر. بيىلعى ءبىرىنشى توقساندا اتىراۋ وبلىسى مەن ۇلىبريتانيا اراسىنداعى سىرتقى ساۋدا اينالىمى 46 ملرد دوللاردان استى. وتكەن جىلمەن سالىستىرعاندا 67%-كە تومەندەگەن. دوڭگەلەك ۇستەل باسىنا جينالعان ەكى ەل كاسىپكەرلەرى وسى كورسەتكىشتى كوبەيتۋگە ۋاعدالاستى.
باقىتگۇل باباش,
«ەگەمەن قازاقستان»
اتىراۋ