الماتىدا بۇگىن «امان-ساۋلىق» قوعامدىق قورى مەن الماتى قالاسىنىڭ ناركولوگيالىق ديسپانسەرى بىرىگىپ, فوتوگراف سانات وڭعارباەۆتىڭ «ومىرگە اراشا ءتۇسۋ» الەۋمەتتىك فوتوكورمەسىنىڭ رەسمي تۇردە تۇساۋىن كەستى.
بۇل كورمە فوتوگرافتىڭ ەسىرتكى شەڭگەلىندە زارداپ شەككەندەر تۋرالى اۆتورلىق تۋىندىلارىنان تۇرادى. كورمە ماقساتى – ناشاقورلىققا تاۋەلدى ادامداردى قوعامنان شەتتەتپەي, ولارعا اراشا بولۋدى كوزدەيدى. ياعني «مەتادون تەراپياسى» باعدارلاماسىنا قاتىستى جوباعا الماتى ناركولوگيا ديسپانسەرىنىڭ 11 پاتسيەنتى دە قاتىستى.
«اتالمىش جوبادا باستارىنان وتكەن قيىندىق پەن ءتۇرلى تالكەككە مويىماعانداردى كورسەتۋگە تىرىستىم. مەن ولاردى ءومىرى ءۇشىن, باقىتتى بولۋى ءۇشىن كۇرەسىپ جۇرگەن قوعامنىڭ تولىققاندى مۇشەسى رەتىندە كورسەتۋگە ۇمتىلدىم. ءبىز ولارعا قولداۋ كورسەتىپ, ءوز ورتامىزعا تارتۋىمىز كەرەك», – دەيدى سانات وڭعارباەۆ.
ءوز كەزەگىندە قر دەنساۋلىق ساقتاۋ مينيسترلىگىنىڭ جيتب الدىن الۋ جانە كۇرەسۋ جونىندەگى رەسپۋبليكالىق ورتالىقتىڭ باس ديرەكتورى (جيتب رو) باۋىرجان بايسەركين ناۋقاستاردىڭ كوپشىلىگى ەسىرتكى پايدالانۋ ارقىلى ايۆ جۇقتىرعانىن العا تارتتى.
– ادام يممۋنتاپشىلىعى ۆيرۋسىنىڭ 50 پايىزدان استامى ەسىرتكى ەگۋ كەزىندە جۇعادى. سەبەبى ەسىرتكىگە تاۋەلدىلەر ينەكتسيا ءۇشىن وعان دەيىن ايۆ جۇقتىرعان باسقا ادام قولدانعان ينەلەردى, شپريتستەر مەن باسقا دا قۇرالداردى پايدالانادى. سوندىقتان ەسىرتكىنى قولدانۋدىڭ الدىن الۋ مەن تولىقتىرۋشى ەم ارقىلى ەسىرتكىنى باقىلاۋعا الۋ – ەلىمىزدە ايۆ جۇقتىرۋدى بىرنەشە ەسە تومەندەتەدى, – دەيدى باۋىرجان بايسەركين.
«امان-ساۋلىق» قوعامدىق قورىنىڭ پرەزيدەنتى باقىت تۇمەنوۆا زياندى تومەندەتۋ تۇجىرىمداماسىن قولدانۋ ەسىرتكىگە تاۋەلدى ادامداردىڭ ءومىرىن ساقتاپ قالۋدا وتە ءتيىمدى دەپ سانايدى. «زياندى تومەندەتۋ تۇجىرىمداماسى بالاما الماستىرعىشتاردى پايدالانۋ ءومىردى ساقتاپ قالۋعا كومەكتەسپەك. مۇنداي جاعدايدا مەتادون ارقىلى ەمدەۋ ەسىرتكىگە تاۋەلدىلەرگە تولىققاندى ءومىر سۇرۋگە كومەكتەسەدى. «ومىرگە اراشا ءتۇسۋ» فوتوكورمەسى – بۇل ەسىرتكى قۇربانىنا اينالۋى مۇمكىن حالىقتىڭ بارلىق توپتارىنا باعىتتالعان وتە ماڭىزدى جانە قاجەتتى شارا. ءبىز ەسىرتكىگە تاۋەلدى ادامداردى شەتتەتۋگە قارسى جۇمىستاردى عانا جۇرگىزىپ وتىرعان جوقپىز, سونىمەن بىرگە قوعامنىڭ بارلىق باسقا توپتارىنا ەسىرتكى پايدالانۋدىڭ وتە قاۋىپتى دەرت ەكەنىن كورسەتەمىز», – دەدى «امان-ساۋلىق» قورىنىڭ پرەزيدەنتى باقىت تۇمەنوۆا.
ايناش ەسالي,
«ەگەمەن قازاقستان».
الماتى