ۆاسيلي جيروۆ پەن گونسالەستىڭ جەكپە-جەگى ەكى مينۋتتا اياقتالدى

«بارىس» دەگەن لاقاپ اتقا يە بالقاشتىڭ بالاسى قاشان دا بۇل تۋرالى: «مەن ءۇشىن ەڭ ەستە قالعان باسەكە – قازاقستاندا الەكس گون­سا­لەس­پەن وتكەن جۇدىرىقتاسۋ, الەم چەمپيونى تيتۋلىن ءۇشىنشى رەت قاتارىنان قورعاپ قالۋىم ەدى. وعان مەملەكەت باسشىسى كەلىپ, مەن وتە قۋانىشتى بولدىم. بىراق ءبارى قاس پەن كوزدىڭ اراسىندا وتە تەز اياقتالدى» دەپ ەسكە الادى.

ايتقانداي, جيروۆقا «بارىس» دەگەن لا­قاپ ەسىمدى بەرگەن دە, كەيىن ونى «بال­قاش­تىڭ بارىسى» دەپ اسپەتتەگەن دە ءوزىمىزدىڭ جۋرناليستەر. 

ارينە بوكسشى وليمپيادا چەمپيونى, الەم چەمپيونى اتاق­تارىنا قول جەتكىزگەنگە دەيىن تاع­دىرى دا, سپورتتاعى مان­سابى دا تاقتايداي تەگىس بولماعانى بار­­شامىزعا ايان. التى بىردەي بالا­سىن جالعىز ءوزى تۇم­سىعىمەن سۇي­رەپ ءجۇرىپ وسىرگەن اناسى نينا گري­گورەۆنا شەشەي­دىڭ ءۇمىتىن اقتاعان ۇل­دىڭ تاريحي سۋرەتى تومەندەگىدەي سويلەيدى. 

– بۇل جەكپە-جەك 2001 جىلى 6 اقپاندا ءوتتى. ونى ەلباسى نۇرسۇلتان ءابىش ۇلى نازارباەۆ تا تاماشالايتىن بولدى. سپورت سارايى جانكۇيەرلەرگە لىق تولدى. ناعىز انشلاگ ەدى. ءبىز سول كەزدەگى ەلباسىنىڭ جەكە فوتوگرافى يوسيف بۋدنەۆيچ ەكەۋ­مىز بۋفەتتەن كوفە ىشەمىز دەپ ءجۇرىپ, زالعا ءسال عانا كەشىگىپ كىرسەك, رينگتىڭ اينالاسىندا تۇمسىق تىعا­تىن جەر جوق. ونى باق وكىل­دەرى, فوتوتىلشىلەر, وپە­­راتور­لار قورشاپ العان. مەن ارەڭ دەگەندە ەپتەپ ءجۇرىپ, فوتواپپاراتىمدى قوسىپ, رينگكە قاراي جاقىنداعانىم سول ەدى, ۆاسيا الەكستىڭ باۋىر تۇسىنا ءوزىنىڭ وڭتايلى سوققىسىن سىلتەپ جىبەرىپ, نوكاۋتقا ءبىر-اق ءتۇسىردى. فوتو­اپپاراتتى باسىپ ۇلگەردىم. كەزدەيسوق تۇسىرىلگەن ءدال وسى كادر بۇكىل باسىلىمداردا جارىق كوردى. جەكپە-جەكتىڭ ەڭ وڭتايلى جەرىنەن اياق استىنان تاپقان ورنىم ءساتتى بولىپ شىقتى. ايت­پەسە, بارلىق فوتوگرافتار الدىن الا ورنالاسىپ, قۇرالدارىن وڭتايلاپ 12 راۋندقا سوزىلۋعا ءتيىستى جەكپە-جەكتەن كەرەمەت كادر­لار تۇسىرۋگە دايىندالىپ تۇرعان-دى.

مەنىڭ بىلۋىمشە, باسەكە بار بولعانى شامامەن 1 مينۋت 45 سەكۋندقا عانا سوزىل­دى. ەرتەسىنە باسىلىمدار 2 مينۋتتا عانا اياق­تالعانىن جارىسا جاريالاپ جاتتى. جيروۆ جۇرتقا جەكپە-جەك­تى ايىزى قانىپ تاماشالاۋعا مۇمكىندىك بەرمەدى, – دەيدى يۋري بەككەر. 

جاتتىعۋ بارىسىندا قا­لىپقا سىيمايتىن ادىستەردى قول­دانا وتىرىپ, جىگەرى مەن ءتو­زىمىن جا­نىعان بالقاشتىڭ جىگىتى وسىلايشا, سپورتتىق عۇ­مىرىنداعى 27 نوكاۋتتىڭ 25-ءشىسىن الماتىدا جۇزەگە اسىرىپ, «اكۋلا» اتانعان الەكس گون­سالەستى ءبىرىنشى راۋندتا-اق جالپ ەتكىزىپ, داۋسىز جەڭىسكە جەتكەن. سەنىمدى دەرەك كوزدەرى سول جولى جەڭىمپازدىڭ جۇلدەسى 150 مىڭ اقش دوللارىن قۇراعانىن ايتادى.

ءسوز سوڭىندا قازىر اقش-تا تۇرسا دا قازاق جەرىنە ءجيى ورالاتىن ۆاسيلي جي­روۆ­تىڭ 2017 جىلى يسلام ءدىنىن قابىل­داعانىن, سول جەڭىستى كۇندەرى قولتىقتاسىپ جۇرگەن جارى رەبەككامەن اجىراسىپ كەتكەنىن ايتا كەتۋگە بولادى. 

ايناش ەسالي,

«ەگەمەن قازاقستان»

الماتى