امانگەلدى اۋدانىنداعى امانتوعاي جانە جالداما اۋىلدارىنا ورتالىقتاندىرىلعان تازا اۋىز سۋ قۇبىرى كەلدى. بۇرىن وسىنداعى كەڭەس وداعى كەزىندە سالىنعان سۋ قۇبىرىنىڭ ابدەن توزىعى جەتكەن بولاتىن.
سۋ تارتقىشتى ارقالىق قالاسىنداعى «الليۋمينستروي» جاۋاپكەرشىلىگى شەكتەۋلى سەرىكتەستىگى بارلىعى جىل تاۋلىگىندە ءبىتىرىپ, 22 شاقىرىم سۋ قۇبىرىن تارتتى. امانگەلدى اۋدانىنىڭ قۇرىلعانىنا 90 جىل تولۋى مەرەيلى مەرەكەسى كەزىندە ورتالىقتاندىرىلعان سۋ قۇبىرى سالتاناتتى تۇردە اشىلدى. وبلىس اكىمى ارحيمەد مۇحامبەتوۆ بۇل جۇمىستىڭ, سۋ تارتقىش قۇرىلعىلاردىڭ وتە ساپالى جاسالعانىن اتاپ ءوتتى.
«ەلدى مەكەندەر ءۇشىن اۋىز سۋ ماسەلەسى وتە ماڭىزدى. ەلباسى تاپسىرماسىمەن اۋىلداردى اۋىز سۋمەن قامتاماسىز ەتۋ ءىسى اتقارىلىپ كەلەدى. ساپالى اتقارىلعان جۇمىسى ءۇشىن مەردىگەرلەرگە ريزاشىلىعىمدى بىلدىرەمىن. امانگەلدى اۋدانىنىڭ ورتالى, ەسىر, امانتوعاي جانە ۇرپەك اۋىلدارىنا سۋ قۇبىرىن تارتۋ ءۇشىن 2 ميلليارد تەڭگە ءبولىپ وتىرمىز, ولار بىرتىندەپ, شەتىنەن ءبىتىپ كەلەدى. جول سالىنىپ جاتىر, اۋىز سۋ كەلدى, جاقىن كۇندەرى ارقالىقتان ەت كومبيناتى اشىلادى. مۇنىڭ بارلىعى اۋىلدىڭ الەۋەتىن ارتتىرادى, ەڭبەك ەتۋگە قولايلىلىق تۋدىرادى» دەدى ارحيمەد بەگەجەن ۇلى.
بۇرىنعى ەسكى قۇبىر كەزىندە امانتوعاي اۋىلىنىڭ تۇرعىندارى كۇنىنە 1–1,5 ساعات عانا سۋ الاتىن ەدى, ەندى ۇيگە تاۋلىك بويى ءمولدىر سۋ كەلىپ تۇر.
«سۋدىڭ ساپاسىن ايتسايشى. بۇرىن قۇبىر وتە ەسكى بولعان سوڭ, سۋ دا ماردىمسىز ءارى ساپاسى تومەن بولدى, كەيدە سىنىپ قالسا سۋسىز دا وتىراتىنبىز. ەندى جانىمىز كىرىپ قالدى» دەيدى اۋىل تۇرعىنى گۇلناز ابدىقادىروۆا.
امانتوعاي اۋىلىنىڭ اۋىز سۋ قۋانىشىنا بەلگىلى اكادەميك كەنجەعالي ساعاديەۆ دە ورتاقتاستى. جانگەلدين جانە امانگەلدى اۋداندارىنىڭ قۇرىلعانىنا 90 جىل تولۋ تويىنا قوناق بولعان ول جەرلەستەرىنىڭ قۋانىشىنا ورتاقتاسىپ, تۋعان جەردەگى ىلكىمدى ىستەردى كورۋ ءۇشىن وسىندا ادەيى ات باسىن بۇرىپتى.
«ادام دەنساۋلىعىنىڭ دۇرىس بولۋىنا سۋدىڭ ماڭىزى زور, سۋسىز ءومىر جوق. سوندىقتان ەلباسى دا اۋىز سۋ ماسەلەسىنە بايلانىستى مەملەكەتتىك باعدارلامانىڭ بولۋىن تاپسىرعان بولاتىن. سوناۋ جىداردان بەرى وسى باعدارلاما جۇمىس ىستەپ كەلەدى. قازاقتىڭ دالاسى كەڭ, اۋىل, اۋداندار اراسى جاقىن ەمەس, سوندىقتان اۋىز سۋ قۇبىرىن تارتۋ دا وڭاي ەمەس, شىعىنى كوپ شارۋا. دەگەنمەن سوڭعى جىلدارى ەلدەگى كوپتەگەن مەكەندەردىڭ تازا سۋعا قولى جەتتى. بۇل اۋىلدىڭ, حالىقتىڭ جاعدايى جاقسارا ءتۇسۋىنىڭ ءبىر عانا كورىنىسى. ەلباسىنىڭ ەكونوميكالىق ساياساتىنا راحمەت ايتۋ كەرەك, بارلىعى دا بىرتىندەپ ورنىنا كەلەدى» دەدى كەنجەعالي ابەن ۇلى.
اۋىلدا تازا اۋىز سۋ قازىر 230 ءۇيدى, 7 نىساندى قامتىپ تۇر.اۋىلدان كەتكەندەردەن گورى, كوشىپ كەلۋشىلەردىڭ قاتارى كوبەيە باستادى.
ءنازيرا جارىمبەت,
«ەگەمەن قازاقستان»
قوستاناي وبلىسى
امانگەلدى اۋدانى