دۋشانبەدە تاۋەلسىز مەملەكەتتەر دوستاستىعىنا (تمد) مۇشە مەملەكەتتەر باسشىلارىنىڭ كەزەكتى وتىرىسى ءوتىپ جاتىر.
جيىندى اشقان تاجىكستان پرەزيدەنتى ەمومالي راحمون ۇيىم اياسىندا ىنتىماقتاستىقتى نىعايتۋ ءۇشىن اۋقىمدى شارالار اتقارىلعانىن اتاپ ءوتتى. ە.راحمون وسىنداي جيىننىڭ ۇيىمعا مۇشە مەملەكەتتەر اراسىنداعى قارىم-قاتىناستى نىعايتىپ, دامىتا تۇسەتىنىن مالىمدەدى.
«بىرلەسكەن جۇمىستىڭ ناتيجەسىندە جاڭا قۇجاتتار ازىرلەندى. بۇدان بولەك, تمد اياسىنداعى ىنتىماقتاستىقتىڭ بارلىق سالالارىن قامتيتىن شەشىمدەر قابىلداندى. ايتا كەتكەن ءجون, ءبىزدىڭ توراعالىعىمىز كەزىندە سالالىق كەڭەستەردىڭ قىرىققا جۋىق وتىرىستارى ۇيىمداستىرىلدى. ءبىز ەكسترەميزمگە جانە تەرروريزمگە قارسى كۇرەس, ەسىرتكىنىڭ زاڭسىز اينالىمى, ەكونوميكالىق قىلمىستار, زاڭسىز كوشى-قون, ادام ساۋداسى سەكىلدى باعىتتارعا باسىمدىق بەردىك», دەدى ە.راحمون.
تمد-عا مۇشە مەملەكەتتەر باسشىلارىنىڭ كەزەكتى وتىرىسىنا ەلباسى نۇرسۇلتان نازارباەۆ قاتىسىپ وتىر. سونىمەن قاتار جيىنعا رەسەي پرەزيدەنتى ۆلاديمير پۋتين, بەلارۋس پرەزيدەنتى الەكساندر لۋكاشەنكو, ازەربايجان پرەزيدەنتى يلحام اليەۆ, قىرعىزستان پرەزيدەنتى سوورونباي جەەنبەكوۆ, ارمەنيا پرەمەر-ءمينيسترى نيكول پاشينيان, مولدوۆا پرەزيدەنتى يگور دودون جانە وزبەكستان پرەزيدەنتى شاۆكات ميرزيوەۆ, تۇرىكمەنستاننىڭ اتىنان مەملەكەت قايراتكەرى پۋرلي اگامۋرادوۆ كەلدى.
ايتا كەتۋ كەرەك, قىرعىزستان باسشىسى س.جەەنبەكوۆ پەن ارمەنيا پرەمەر-ءمينيسترى ن.پاشينيان تۇڭعىش رەت قاتىسىپ وتىر.
جيىن بارىسىندا تمد اتقارۋ كوميتەتىنىڭ توراعاسى سەرگەي لەبەدوۆ كۇن تارتىبىندەگى ماسەلەلەردى تانىستىردى.
بۇدان كەيىن وتىرىس شاعىن قۇرامدا, جابىق ۇلگىدە وتەدى. ال كەڭەيتىلگەن قۇرامداعى باسقوسۋدا تمد اياسىنداعى ءوزارا ارىپتەستىكتى نىعايتۋعا جانە دامىتۋعا قاتىستى بىرقاتار ماسەلەلەر ءسوز بولادى. تالقىلاناتىن تاقىرىپتار قاتارىندا ادام قۇقىقتارى جونىدەگى جالپىعا ورتاق دەكلاراتسيانىڭ قابىلدانعانىنا 70 جىل تولۋىنا وراي تمد-عا مۇشە مەملەكەتتەر باسشىلارىنىڭ شەشىمىنە قاتىستى قۇجات بار.
سونىمەن قاتار ەكىنشى دۇنيەجۇزىلىك سوعىستىڭ اياقتالعانىنا 75 جىل تولۋ مەرەيتويىن كەڭ كولەمدە اتاپ ءوتۋ جوسپارى سەكىلدى بىرقاتار قۇجاتتار راسىمدەلەدى. كەڭەس قورىتىندىسى بويىنشا 15-كە جۋىق قۇجاتقا قول قويىلماق.
كەڭەس بارىسىندا تمد-عا توراعالىق ەتۋ مىندەتىن تۇرىكمەنستان تاراپىنا رەسمي تۇردە تاپسىرۋ جوسپارلانعان.
اباي اسانكەلدى ۇلى,
"ەگەمەن قازاقستان" - دۋشانبەدەن