دۋشانبەدە تاۋەلسىز مەملەكەتتىك دوستاستىعى مەملەكەت باسشىلارى كەڭەسىنىڭ كەزەكتى وتىرىستى باستالدى. جيىنعا ەلباسى نۇرسۇلتان نازارباەۆ, تمد-عا مۇشە مەملەكەت باسشىلارى كەلدى.
شاعىن قۇرامدا وتەتىن وتىرىستا تمد-دا ارىپتەستىكتى نىعايتۋ ماسەلەسى, ۇيىمنىڭ توراعالىعى جانە كەلەسى وتىرىستىڭ قايدا وتەتىنى تۋرالى ماسەلەلەر تالقىلانباق.
كەڭەيتىلگەن قۇرامداعى وتىرىستا تمد اياسىنداعى ءوزارا ارىپتەستىكتى نىعايتۋعا جانە دامىتۋعا قاتىستى بىرقاتار ماسەلەلەر ءسوز بولادى. تالقىلاناتىن تاقىرىپتار قاتارىندا ادام قۇقىقتارى جونىدەگى جالپىعا ورتاق دەكلاراتسيانىڭ قابىلدانعانىنا 70 جىل تولۋىنا وراي تمد-عا مۇشە مەملەكەتتەر باسشىلارىنىڭ شەشىمىنە قاتىستى قۇجات بار.
سونىمەن قاتار ەكىنشى دۇنيەجۇزىلىك سوعىستىڭ اياقتالعانىنا 75 جىل تولۋ مەرەيتويىن كەڭ كولەمدە اتاپ ءوتۋ جوسپارى سەكىلدى بىرقاتار قۇجاتتار راسىمدەلەدى. كەڭەس قورىتىندىسى بويىنشا 15-كە جۋىق قۇجاتقا قول قويىلماق.
كەڭەس بارىسىندا تمد-عا توراعالىق ەتۋ مىندەتىن تۇرىكمەنستان تاراپىنا رەسمي تۇردە تاپسىرۋ جوسپارلانعان.
ەستەرىڭىزگە سالا كەتەيىك, ەلباسى نۇرسۇلتان نازارباەۆ كەشە تاجىكستان پرەزيدەنتى ەمومالي راحمونمەن كەزدەسىپ, ەكى جاقتى قاتىناستاردىڭ قازىرگى ماسەلەلەرىن جانە ەكونوميكانىڭ ءتۇرلى سەكتورلارىنداعى ىنتىماقتاستىقتى ودان ءارى دامىتۋدىڭ پەرسپەكتيۆالارى ءسوز بولدى.
اباي اسانكەلدى ۇلى,
"ەگەمەن قازاقستان" - دۋشانبەدەن