تاياۋدا برەست قالاسىندا XY حالىقارالىق ەلەكتر ەنەرگياسى سالاسى قىزمەتكەرلەرىنىڭ كاسىبي شەبەرلىگى جارىسى ءوتتى. حالىقارالىق جارىسقا تمد-عا مۇشە مەملەكەتتەردىڭ ءىرى كومپانيالارىنىڭ ەڭ مىقتى دەگەن ماماندارى قاتىستى.
ءداستۇرلى جارىستا قازاقستان, بەلارۋس, رەسەي, تاجىكستان جانە وزبەكستان ەلدەرىنىڭ ەلەكتر جەلىلەرى كومپانيالارىنىڭ بريگادالارى جوندەۋ جانە قىزمەت كورسەتۋ بويىنشا شەبەرلىكتەرىن كورسەتتى. كوماندالار ءتورت كۇنگە سوزىلعان سايىستا 7 كەزەڭنەن ءوتتى. ءار كەزەڭ سايىن مامانداردىڭ ءوز سالالارىنا قاتىستى ەرەجەلەردى, نۇسقاۋلاردى قانشالىقتى بىلەتىنى, ەلەكتر توعىنان زارداپ شەككەن ادامدى قۇتقارۋ, ءورت شىققان ايماقتا جۇمىس ىستەۋ شەبەرلىكتەرى نازارعا الىنىپ, ارقايسىسىنا تيىسىنشە ۇپاي بەرىلىپ وتىردى.
سونىمەن, ءتورت كۇن ىشىندە جيناعان ۇپايلاردىڭ قورىتىندىسى بويىنشا قازاقستاننان بارعان «KEGOC» اق-تىڭ بريگاداسى ەكىنشى ورىنعا تابان تىرەدى. ارمان ءابىلوۆ, المات شوقانوۆ, مەدەت مۇقانعاليەۆ, نيكولاي يۋدەنكوۆ جانە يۋري فيلاتوۆتان جاساقتالعان قازاقستاندىق بريگادا جارىس يەلەرى «بەلەنەرگو» كومپانياسىنىڭ بريگاداسىنا عانا ەسە جىبەرگەنىن ايتا كەتەيىك.
ەلەكتر ەنەرگياسى سالاسى قىزمەتكەرلەرىنىڭ كاسىبي شەبەرلىگى ساراپقا سالىناتىن حالىقارالىق جارىس 2004 جىلدان بەرى تۇراقتى تۇردە وتكىزىلىپ كەلە جاتىر. اتالعان شارا مامانداردىڭ شەبەرلىگىن تەكسەرىپ قانا قويماي, ولاردىڭ وزگە ەلدەردەگى ارىپتەستەرىمەن ءوزارا تاجىريبە الماسۋىنا دا ىقپال ەتەدى.
ەركەجان ايتقازى,
«ەگەمەن قازاقستان»