قىزىلوردادا ەلەكتروندىق بالاباقشا جۇيەسى ىسكە اسىرىلۋدا, بۇل تۋرالى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ قىزىلوردا وبلىسى بويىنشا دەپارتامەنتىنىڭ ۇيىمداستىرۋىمەن وتكىزىلگەن عىلىمي-تاجىريبەلىك كونفەرەنتسيادا وبلىستىق ءبىلىم باسقارماسىنىڭ باسشىسى مايرا مەلدەبەكوۆا مالىمدەدى.
كونفەرەنتسياعا قالالىق, اۋداندىق ءبىلىم بولىمدەرىنىڭ, وبلىستاعى جوعارى وقۋ ورىندارىنىڭ, تەحنيكالىق جانە كاسىپتىك ءبىلىم بەرۋ ۇيىمدارىنىڭ, مەكتەپتەردىڭ, بالاباقشالاردىڭ باسشىلارى مەن قىزمەتكەرلەرى قاتىستى.
بۇگىنگى تاڭدا وبلىس ورتالىعىنداعى بالاباقشالاردا بالانىڭ بىرنەشە رەت تىركەلۋىن بولدىرماۋ ماقساتىندا ەلەكتروندى جۇيە ەنگىزىلدى. سونداي-اق, بالاباقشاعا كەزەككە قويۋ, قۇجاتتاردى تاپسىرۋ, بالالاردى قابىلداۋ پروتسەستەرى اۆتوماتتاندىرىلعان.
- بۇل ءوز كەزەگىندە سىبايلاس جەمقورلىقتىڭ الدىن الۋ ماقساتىندا اتا-انامەن ءبىلىم بولىمدەرى اراسىندا تىكەلەي بايلانىستى ازايتىپ, اتا-انالارعا ۇيىندە وتىرىپ ەلەكتروندى تۇردە ءوتىنىش جاساۋعا مۇمكىندىكتەر تۋعىزدى. جىل سوڭىنا دەيىن اۋدانداردى دا وسى باعىتقا كوشىرۋ ماقساتىندا جۇمىستار جۇرگىزىلۋدە, - دەيدى م.مەلدەبەكوۆا.
سونىمەن قاتار, بالاباقشالاردىڭ تالاپقا سايكەستىگىن, بيۋدجەتتەن بولىنگەن قارجىنىڭ ماقساتتى جۇمسالۋىن انىقتاۋ ماقساتىندا قۇرىلعان جۇمىس توبى وبلىس بويىنشا زەردەلەۋ جۇمىستارىن جۇرگىزۋدى جوسپارلاۋدا. جۇمىس توبىنا ءتيىستى قۇزىرلى ورگانداردان قىزمەتكەرلەرى تارتىلادى. بۇل جۇمىس توبى تۇراقتى تۇردە بالاباقشالارعا, اسىرەسە جەكەمەنشىك بالاباقشالاردىڭ ساپاسىنا مونيتورينگ جۇرگىزەتىن بولادى.
كونفەرەنتسيا بارىسىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وبلىستىق دەپارتامەنتى باسشىسىنىڭ ورىنباسارى بەرىكبول بايحوجاەۆ, - ء«الى دە بولسا مەكتەپتەردە, بالاباقشالاردا اتا-انالاردان زاڭسىز اقشا جيناۋ كەزدەسەدى. جوندەۋگە, باسقا دا ءىس-شارالار ۇيىمداستىرۋعا دەپ زاڭسىز اقشا جيناۋ فاكتىلەرىن تۇبەگەيلى جويۋدى ءبىلىم سالاسىنداعى مەكەمە باسشىلارىنا قاتاڭ ەسكەرتەمىز. اتا-انالار ونداي شىعىنداردى تولەۋگە مىندەتتى ەمەس. ءبىلىم بەرۋ ۇيىمىنىڭ شىعىستارىنا بيۋدجەتتەن قاجەتتى كولەمدە قاراجات بولىنۋدە» - دەدى.