كەزدەسۋدە تاراپتار الەمدەگى قالىپتاسقان جاعدايعا بايلانىستى ساۋدا-ەكونوميكالىق ىنتىماقتاستىقتى دامىتۋعا قاتىستى پىكىر الماستى, سونداي-اق 2020 جىلى استانادا وتەتىن دۇنيەجۇزىلىك ساۋدا ۇيىمىنىڭ ءحىى مينيسترلەر كونفەرەنتسياسىنا دايىندىق بارىسىن تالقىلادى, دەپ حابارلايدى اقوردانىڭ ءباسپاسوز قىزمەتى.
– سىزبەن استانادا قايتا جۇزدەسكەنىمە قۋانىشتىمىن. قازاقستان دۇنيەجۇزىلىك ساۋدا ۇيىمىنا مۇشە بولار كەزدە ەلىمىزگە ۇلكەن قولداۋ بىلدىرگەنىڭىزدى بىلەمىز. بۇگىندە ءبىزدىڭ ەل ۇيىمنىڭ بەلسەندى مۇشەسى سانالادى. 2020 جىلى استانادا كونفەرەنتسيا وتكىزۋ جونىندە شەشىم قابىلداندى. ءبىز وسى شارانى ءتيىستى دەڭگەيدە وتكىزۋ ءۇشىن كۇش جۇمىلدىرامىز, دەدى مەملەكەت باسشىسى.
نۇرسۇلتان نازارباەۆ دۇنيەجۇزىلىك ساۋدا ۇيىمىنىڭ ەلدەر اراسىنداعى ساۋدا-ەكونوميكالىق قارىم-قاتىناستاردى نىعايتۋدى جانە كەڭەيتۋدى كوزدەيتىن باستى قاعيداتتارىن قازاقستاننىڭ تولىق قولدايتىنىن اتاپ ءوتتى.
روبەرتۋ ازەۆەدۋ نۇرسۇلتان نازارباەۆقا قوناقجايلىق تانىتقانى جانە قازاقستان مەن دۇنيەجۇزىلىك ساۋدا ۇيىمىنىڭ الداعى ىنتىماقتاستىعىنا ارنالعان ماسەلەلەردى تالقىلاۋعا مۇمكىندىك بەرگەنى ءۇشىن العىس ءبىلدىردى.
– جەنەۆاداعى سوڭعى كەزدەسۋىمىزدەن كەيىن قازاقستان مەن دۇنيەجۇزىلىك ساۋدا ۇيىمى اراسىنداعى ىنتىماقتاستىقتىڭ تەرەڭدەگەنىن نىق سەننىممەن ايتا الامىز. ءسىزدىڭ ەلىڭىز كوپ جاقتى ساۋدا جۇيەسىن دامىتۋ قاعيداتتارىن ءاردايىم بەرىك ۇستانىپ كەلەدى. ءبىز قازاقستاننىڭ 2020 جىلى مينيسترلەر كونفەرەنتسياسىن وتكىزۋگە كەلىسىم بەرگەنىنە قۋانىشتىمىز. بۇل بۇگىنگى الەمدە بولىپ جاتقان وقيعالارعا وراي ەرەكشە ماڭىزعا يە بولىپ وتىر, – دەدى دۇنيەجۇزىلىك ساۋدا ۇيىمىنىڭ باس ديرەكتورى.
سونداي-اق ر.ازەۆەدۋ جەتەكشى دەرجاۆالار اراسىنداعى ساۋدا-ەكونوميكالىق شيەلەنىستىڭ باسقا ەلدەرگە تيگىزەتىن سالدارىنا توقتالدى.