بۇگىن «قازمەديا» ورتالىعىندا وڭىرلىك باق اليانسىنىڭ ۇيىمداستىرۋىمەن مەديانىڭ ساندىق ترانسفورماتسياسى: نارىق, ءوندىرىس جانە كونتەنت ديستريبۋتسياسى قانداي بولماق دەگەن تاقىرىپتا باق فورۋمى وتۋدە.
وڭىرلىك باق فورۋمى دەپ اتالاتىن بۇگىنگى جيىندى اقپارات جانە كوممۋنيكاتسيا ءمينيسترى داۋرەن اباەۆ اشتى.
«وڭىرلىك ماسس-مەديا وكىلدەرىنىڭ باسىن قوسىپ وتىرعان فورۋم Astana Media Weeك اپتالىعىنىڭ اياسىندا ءوتىپ جاتقانى بارشاڭىزعا بەلگىلى. جۋرناليستەر ءۇشىن, ءباسپاسوز قىزمەتى مەن اقپارات سالاسىنىڭ باسقا دا ماماندارى ءۇشىن كوپتەگەن سەمينار-ترەنينگتەر ءوتتى. مەملەكەتتىك مۇددەنى حالىققا جەتكىزىپ, قوعامداعى وزگەرىستەرگە ساي كوزقاراس قالىپتاستىرۋدا ايماقتىق مەديانىڭ ماڭىزى زور. وسى ورايدا قازىرگى كۇنى وڭىرلىك اقپارات قۇرالدارىنىڭ الدىندا ۇلكەن ماقسات-مىندەتتەر تۇر. ول - مەملەكەت باسشىسىنىڭ تاپسىرماسىمەن جۇزەگە اسىرىلىپ جاتقان ساياسي, ەكونوميكالىق جانە رۋحاني جاڭعىرۋ جونىندەگى كەشەندى رەفورمالارعا جۇرتشىلىقتى جۇمىلدىرۋ», دەدى مينيستر.
مەديا اپتالىعىنىڭ ۇيىمداستىرۋىمەن وڭىرلىك باق فورۋمى بيىل ءۇشىنشى جىل ءوتىپ وتىر. اتالمىش فورۋمدا جىل سايىن وڭىرلىك اقپارات قۇرالدارى تاراپىنان ءتۇرلى ماسەلەلەر ايتىلىپ كەلەدى. اقپارات جانە كوممۋنيكاتسيالار مينيسترلىگى فورۋمدا ايتىلعان ۇسىنىس-پىكىرلەردى زەردەلەپ, وڭىرلىك مەديا ساپاسىن ارتتىرۋ بويىنشا شەشىم تابۋدا. سوعان سايكەس مينيسترلىك قازىرگى ەفيرلىك-تسيفرلىق اقپارات, تەلەراديوحابارلاردى تاراتۋدى ۇيىمداستىرۋ جۇمىستارىن جۇرگىزىپ جاتىر.
«الداعى ۋاقىتتا ايماقتىق فورۋم ءوزارا پىكىر مەن تاجىريبە الماسۋدىڭ تۇراقتى الاڭىنا اينالادى دەپ سەنەمىن. اقپارات جانە كوممۋنيكاتسيالار مينيسترلىگى وڭىرلىك ماسس-مەديانىڭ ساپاسىن ارتتىراتىن كەز كەلگەن باستامانى قولداۋعا ءازىر», دەدى داۋرەن اباەۆ.
بۇدان سوڭ ەلىمىزدىڭ ءار ايماعىنان كەلگەن قوناقتار «كونتەنت ماركەت» - كورمە حوللىنداعى كوۆوركينگ-ايماعىن ارالادى. سونداي-اق Astana Media Week اپتالىعىنىڭ اياسىندا بۇگىن وڭىرلىك باق اليانسى ۇيىمداستىرىپ جاتقان مەديانىڭ ساندىق ترانسفورماتسياسى: نارىق, ءوندىرىس جانە كونتەنت ديستريبۋتسياسى قانداي بولماق دەگەن تاقىرىپتا باق فورۋمى ءوتىپ جاتىر.
جيىنعا اقپارات جانە كوممۋنيكاتسيالار ۆيتسە-ءمينيسترى نۇرگۇل ماۋبەرلينوۆا, وڭىرلىك باق اليانسىنىڭ پرەزيدەنتى ەرجان سەيتكازينوۆ, TNS Central Asia باس ديرەكتورى تاتيانا ستارتسەۆا, Aiqyn گازەتىنىڭ باس رەداكتورى نۇرتورە ءجۇسىپ, وتىرار تەلەارناسىنىڭ باسشىسى جانارا نۇرسەيتوۆا, Nur.kz اقپارات پورتالىنىڭ باس ديرەكتورى قۋات باحريدينوۆ قاتىستى.
باسەكەلەستىك جاعدايىندا ءداستۇرلى باق-تىڭ جەڭىسكە جەتۋى تاقىرىبىندا Aiqyn گازەتىنىڭ باس رەداكتورى نۇرتورە ءجۇسىپ جاڭا مەديا مەن ءداستۇرلى ءباسپاسوزدى قاتار دامىتۋ كەرەك ەكەنىن اتاپ ءوتتى.
«قازىرگى ۋاقىتتا قازاقستاندا 9 ملن ادام ينتەرنەتتى قولدانادى ەكەن. كۇنىنە 25-30 مىڭ ادام ەلەكتروندى ۇكىمەت قىزمەتىنە جۇگىنەدى. وسىنىڭ بارلىعى ءبىزدىڭ اقپاراتتىق جاھانداندىرۋدىڭ جوعارى قارقىنمەن ءجۇرىپ جاتقانىن كورسەتەدى. 2002 جىلى 1,4 ملرد ادام جاڭالىقتى ينتەرنەتتەن وقىپ بىلسە, 2004 جىلى ونىڭ سانى 3,4 ميللياردقا دەيىن كوبەيدى. وسىنداي جاعدايدا ءبىزدىڭ ءداستۇرلى باق نارىق جاعدايىنا توتەپ بەرە الا ما, ءومىر سۇرە الا ما, بولاشاعى قالاي بولادى دەگەن ماسەلە تۋرالى الەمدە دە ونىڭ ىشىندە قازاقستاندا دا كوپتەن بەرى اڭگىمە بوپ كەلە جاتىر. ءومىر, زامان ءبىر ورىندا توقتامايتىنىن كورىپ وتىرمىز, جىلدام ەكەنىن كورىپ وتىرمىز. سونداي كەزەڭدە ءسوز باسەكەسىندە قازاق ءباسپاسوزى جاۋاپكەرشىلىك پەن ناقتىلىقتى سەزىنىپ, كوپتەگەن جەتپەي جاتقان نارسەلەردى جەتىلدىرە وتىرىپ, جاڭا مەديا مەن ءداستۇرلى ءباسپاسوزدىڭ اراسىن قۇستىڭ قوس قاناتىنداي بىرگە ۇستاۋىمىز كەرەك», دەدى ول.
مارجان تىلەۋبەك,
«ەگەمەن قازاقستان»