شەكارالاس ايماقتاردا مەديتسينالىق ءتۋريزمدى دامىتۋدىڭ ماڭىزى زور ەكەنىن قازاقستان دا, رەسەي دە جاقسى تۇسىنەدى. وسىنداي ىنتىماقتاستىق سولتۇستىك قازاقستان جانە تۇمەن وبلىستارى اراسىندا جاقسى جولعا قويىلعان.
تەرىسكەيگە ارنايى ساپارمەن كەلگەن تۇمەندىك اق حالاتتى ابزال جاندار جەرگىلىكتى ەمدەۋ مەكەمەلەرىن ارالاپ, تەحنيكالىق جابدىقتالۋ جايىمەن تانىستى. «دوڭگەلەك ۇستەل» وتىرىسىندا مەديتسينالىق تۋريزم سالاسىن دامىتۋ ماسەلەلەرى جان-جاقتى تالقىلاندى.
دەنساۋلىق ساقتاۋ سالاسىندا شەشىمىن تاباتىن وزەكتى پروبلەمالار از ەمەس. سونىڭ ءبىرى وڭىردە وكپەنىڭ قاتەرلى ىسىگى اۋرۋلارىنا شالدىعۋشىلاردىڭ ازايماي وتىرعانى. دارىگەرلەر ونىڭ سەبەبىن دەرتتى باستاپقى كەزەڭىندە انىقتاۋ مۇمكىندىگىنىڭ جەتكىلىكسىزدىگىمەن, ادامدار سكرينينگتىك تەكسەرۋدەن وتۋگە ق ۇلىقسىزدىعىمەن تۇسىندىرەدى. ونكولوگيالىق ديسپانسەر ۋزي, حيميالىق تەراپيا, دياگنوستيكا كابينەتتەرىمەن جاقسى جابدىقتالعان. يننوۆاتسيالىق تەحنولوگيالار وبلىستىق بالالار اۋرۋحاناسىندا دا قولدانىلادى. مۇنداعى حيرۋرگيا جۇمىسى 80-90 پايىزعا جاڭارعان.
«شەتەلدىك فيرمادان ليزينگ ارقىلى ەندوسكوپيالىق قۇرىلعىلار ساتىپ الىندى. وتالاردىڭ باسىم بولىگى وزىق ادىستەر ارقىلى جۇزەگە اسىرىلادى. بۇيرەك اۋرۋلارىنا شالدىققان ناۋقاستار رەسپۋبليكالىق اۋرۋحانالارعا جىبەرىلىپ كەلسە, وتا ەندى وزىمىزدە جاسالماق. قۇلاق دەرتتەرىن دە حيرۋرگيالىق جولمەن ەمدەيمىز», دەيدى وبلىستىق بالالار اۋرۋحاناسىنىڭ باس دارىگەرى ولەگ زاۆيالوۆ.
مۇندا مەديتسينالىق ءتۋريزمدى بىرتىندەپ دامىتۋدىڭ بىرقاتار جوبالارى قاراستىرىلعان. بيىل رەسەيدىڭ بىرنەشە تۇرعىنىنا جاڭا لور قۇرىلعىسى ارقىلى وتا جاسالىپتى. مەيماندار وبلىستىق ەرەسەكتەر اۋرۋحاناسىندا, كارديولوگيالىق ورتالىقتا بولىپ, تەحنيكالىق جاراقتاندىرىلۋدىڭ جوعارى دەڭگەيدە ەكەنىنە, بىلىكتى ماماندارمەن قامتىلعانىنا كوز جەتكىزدى. رەسەيمەن قاتار قىرعىزستان مەن وزبەكستاننان دا ادامدار ەمدەلۋگە كەلەدى. ەلەكتروكارديوگراممالاردىڭ تىكەلەي قابىلدانۋى ميوكارد ينفاركتىنىڭ الدىن الۋعا كومەكتەسەدى ەكەن. تۇمەندىك ارىپتەستەر جەرگىلىكتى ەمدەۋ مەكەمەلەرىنىڭ شەتەلدەگىدەن ەش كەم تۇسپەيتىن تەحنيكالىق جابدىقتالۋىنا جوعارى باعا بەردى.
تۇمەن وبلىسى مەديتسينالىق تۋريزم ورتالىعىنىڭ ديرەكتورى ۆاديم گادەۆيچتىڭ ايتۋىنشا, ەڭ باستىسى - مەديتسينالىق قۇرال-جابدىقتاردىڭ مۇمكىندىگىن تولىق پايدالانۋ. بۇل جاعىنان العاندا ۇيرەنەتىن تاجىريبەلەر از ەمەس. تۇمەندىك ماماندار دا تمد ەلدەرىنىڭ تۇرعىندارىن كوپ قابىلدايدى. ولاردىڭ اراسىندا قازاقستان ازاماتتارىنىڭ سانى باسىم. ول مەديتسينالىق قالاشىق سالىنىپ جاتقانىن, مۇنىڭ ءوزى مەديتسينالىق تۋريزم بويىنشا باعدارلامالاردى جۇزەگە اسىرۋعا مۇمكىندىك بەرەتىنىن جەتكىزدى.
قوس تاراپتىڭ كەزدەسۋىندە ساپالى مەديتسينالىق قىزمەت كورسەتۋمەن قاتار پاتسيەنتتەردى ۆوكزال, اەروپورتتاردان قارسى الۋ, قوناقۇيلەرگە ورنالاستىرۋ جانە تاعى باسقا تۋريستىك كىزمەتتەردى ورىستەتۋدىڭ وڭتايلى جولدارى دا اڭگىمەلەندى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى