كەشە پرەزيدەنت ءىس باسقارماسى مەديتسينالىق ورتالىعىنىڭ اۋرۋحاناسىندا «ەنتەروسكوپيا, ەندوسكوپيالىق ۋلترادىبىستىق زەرتتەۋ جانە ەندوسكوپيالىق رەتروگرادتىق حولانگيوپانكرەاتوگرافيا ەرەكشەلىكتەرى» اتتى شەبەرلىك سىنىبى ءوتتى.
يزرايلدەگى بەيلينسون مەديتسينالىق ورتالىعىنىڭ گاستروەنتەرولوگ- ەندوسكوپيستى ۆيولەتتا گابوۆيچ ەلوردا دارىگەرلەرىنە ەندوسكوپيالىق ۋلترادىبىستىق زەرتتەۋ (ۋدز) ارقىلى اسقازان-ىشەك جانە ۇيقى بەزى مەن ءوت جولدارىنداعى ىسىكتەردى, ەنتەروسكوپيامەن اش ىشەكتەگى ىسىكتەردى انىقتاۋ, سونداي-اق وعان سول مەزەتتە وپەراتسيا جاساۋ ءادىسىن ۇيرەتتى.
پرەزيدەنتتىك كلينيكا دارىگەرلەرى ەندوسكوپيالىق دياگنوستيكانىڭ بارلىق زاماناۋي ادىستەرىن يگەرگەن. اش ىشەكتى زەرتتەۋ ەنتەروسكوپياسى ەلىمىزدە تۇڭعىش رەت وسى اۋرۋحانادا ءبىر اي بۇرىن جۇزەگە اسقان بولاتىن. از ۋاقىت ىشىندە وسى ادىسپەن 23 زەرتتەۋ جۇرگىزىلگەن. ەندوسكوپيالىق ۋلترادىبىستىق زەرتتەۋ دە وسى كلينيكادا العاش رەت جاسالىپ جاتقان ەندوسكوپيالىق دياگنوستيكانىڭ ءبىر ءتۇرى. پرەزيدەنتتىك كلينيكاداعى زاماناۋي جابدىقتار زەرتتەۋلەردىڭ وسى ءتۇرىن كۇندەلىكتى جۇرگىزۋگە مۇمكىندىك تۋعىزىپ وتىر. ال ەندوسكوپيالىق رەتروگرادتىق حولانگيوپانكرەاتوگرافيا بولسا اسقىنۋ قاۋپى جوعارى, كۇردەلى حيرۋرگيالىق پروتسەدۋرا.
شەبەرلىك سىنىبىن جۇرگىزگەن شەتەلدىك دارىگەر اتالعان ادىستەردى ءبىر مەزەتتە ورىنداۋدى تاجىريبە جۇزىندە كورسەتتى. «قازىرگى ۋاقىتتا ادامدار اسقازان-ىشەك, ۇيقى بەزى مەن ءوت جولدارى جانە اش ىشەك اۋرۋلارىنا ءجيى شالدىعادى. ولار وسى ءادىس-ءتاسىلدى قاجەت ەتەدى. بۇگىن كورسەتىلىپ جاتقان ءادىس ارقىلى وسى ورگاندارداعى ىسىكتەردەن اناليز الىپ, ءتۇرىن انىقتاۋعا بولادى. سونداي-اق جىلاۋىق تۇرىندەگى جانە قاتەرسىز ىسىكتەردى سول مەزەتتە ەندوسكوپيالىق جولمەن الىپ تاستاۋعا مۇمكىندىك بار. بۇعان دەيىن ناۋقاستار شەتەلگە بارىپ تەكسەرىلەتىن. بولماسا ناۋقاس كومپيۋتەرلىك توموگرافيا ارقىلى ىسىكتىڭ ءتۇرىن انىقتاپ, حيرۋرگيالىق اشىق وپەراتسيا جاساتۋعا ءماجبۇر ەدى. تىلىك جاسالاتىن حيرۋرگيالىق وپەراتسيادان كەيىن پاتسيەنت ءبىر اپتا بويى اۋرۋحانادا جاتاتىن. وندا اسقىنۋلار دا كوپ كەزدەسەتىن. ال 30 مينۋتتان ءبىر ساعاتقا دەيىن سوزىلاتىن بۇل ادىسپەن ءبىر مەزەتتە دياگنوستيكانى جاساپ, وپەراتسيانى دا ىستەپ, سول كۇنى ناۋقاستى ۇيىنە قايتارۋعا دا مۇمكىندىك الىپ وتىرمىز», دەيدى پرەزيدەنت ءىس باسقارماسى مەديتسينالىق ورتالىعىنىڭ اۋرۋحاناسىنىڭ دارىگەرى جەڭىسبەك تىنىكوزيەۆ.
مايگۇل سۇلتان,
«ەگەمەن قازاقستان»