دۇنيە جۇزىندە ەڭ جاس قۇسبەگى اتانعان قانداسىمىز ايشولپان نۇرعايىپقا سدۋ ۋنيۆەرسيتەتى 100% ءبىلىم گرانتىن ۇسىندى.
بۇل شەشىمدى ءبىلىم وشاعىنىڭ باسشىلىعى قر ءبىلىم جانە عىلىم ءمينيسترى ەرلان ساعاديەۆتىڭ ايشولپانعا «قالاعان وتاندىق وقۋ ورنىنا تۇسۋگە قولداۋ كورسەتىلەدى» دەگەن ۇسىنىسىنا بايلانىستى قابىلدادى. قازاقتىڭ اتىن الەم ەلدەرىنە پاش ەتكەن قانداسىمىزدى اتامەكەنگە ورالعان ساتىندە ىستىق ىقىلاسپەن قارسى الىپ, جوعارى ءبىلىم الۋىنا جان-جاقتى جاعداي جاساۋ قاجەت, دەگەن نيەتتە ءبىلىم ورداسىنىڭ باسشىلىعى.
قازاق حالقىنىڭ قۇسبەگىلىك ونەرىن الەمدىك ارەنادا كەڭىنەن ناسيحاتتاپ, وتاندىق ەتنومادەنيەتكە ەلەۋلى ۇلەس قوسقان ءۇشىن قانداسىمىز ايشولپان نۇرعايىپقا سدۋ ۋنيۆەرسيتەتىنىڭ 100 پايىزدىق گرانتىن تاعايىندايمىز. ارينە, قانداسىمىزعا الەمنىڭ ۇزدىك ۋنيۆەرسيتەتتەرى ۇسىنىس بىلدىرگەنى ۇلكەن ماقتانىش. الايدا, اتمەكەندى اڭساپ كەلگەن دارىندى جاستارعا قولداۋ كورسەتۋ, ولاردىڭ وتانعا دەگەن سۇيىسپەنشىلىگىن ارتتىرۋ جانە ءبىلىمىن شىڭداپ, ەلىنە ەلەۋلى قىزمەت اتقاراتىن ازامات تاربيەلەۋ – باستى مۇددەمىز, - دەگەن پىكىردە سدۋ رەكتورى قانات قوجاحمەت.
ايتا كەتكەن ءجون, ايشولپان تۋرالى ونداعان فيلمدەر تۇسىرىلگەن. بۇگىنگى تاڭدا ول نيۋ-يوركتە «ازيانىڭ باتىر قىزى» دەگەن ماراتپاتقا يە. موڭعوليانىڭ بايان-ولگەي ايماعىندا دۇنيەگە كەلگەن قازاق قىزىنىڭ قۇسبەگىلىك ونەرى جايلى اقش رەجيسسەرى وتتو بەلل دەرەكتى فيلمىندە دارىپتەپ, كۇللى الەمگە پاش ەتكەن. قازىر 16 جاسار بويجەتكەندى الەمنىڭ بەلدى جوعارى وقۋ ورىندارى - گارۆارد پەن وكسفورد ءبىلىم الۋعا شاقىرعان. الايدا, ايشولپان وتاندىق وقۋ ورنىندا ءبىلىمىن شىڭداعىسى كەلەدى جانە وسى ساتتە بويجەتكەننىڭ بولاشاقتا جۋرناليست ماماندىعىن تاڭدايتىنى ءمالىم بولدى.