5 قازان كۇنى «استانا وپەرا» كامەرالىق زالىندا الەمدىك جانە ءداستۇرلى دىندەر كوشباسشىلارىنىڭ VI سەزىن وتكىزۋ اياسىندا «استانا – الەم داۋىسى» حالىقارالىق فەستيۆالىنىڭ سالتاناتتى اشىلۋى وتەدى.
كونتسەرت قر مادەنيەت جانە سپورت مينيسترلىگىنىڭ قولداۋىمەن «رۋحاني جاعىرۋ» باعدارلاماسىنىڭ اياسىندا تاريحي-مادەني مۇرالاردى ساقتاۋ, دامىتۋ جانە ناسيحاتتاۋ ماقساتىندا وتەدى. كەش ەلوردانىڭ 20 جىلدىعىنا ورايلاستىرىلعان.
باعدارلاما وتاندىق جانە الەمدىك حور مەكتەپتەرى حاس شەبەرلەرىنىڭ ۇزدىك تۋىندىلارىنان, زاماناۋي وڭدەۋدەگى حالىق اندەرىنەن قۇرالعان. كونتسەرتتە ابايدىڭ «كوزىمنىڭ قاراسى», اقان سەرىنىڭ «قاراتورعاي», ە.استاتۋروۆتىڭ وڭدەۋىندەگى پ.چايكوۆسكيدىڭ «ششەلكۋنچيك mix», Zequinha de Abreu «Tico-tico no fuba», Tom Jobim «Garota de Ipanema» جانە كوپتەگەن تۋىندىلار ورىندالادى.
دارىندى ونەرپازداردان قۇرالعان كامەرالىق حور قازاقستان مەن ودان تىس ايماقتاردا بىرنەشە رەت گاسترولدىك ساپارعا شىققان. 2004 جىلى نەگىزى قالانعان حور ۇجىمى بىرنەشە مارتە حالىقارالىق بايقاۋلاردىڭ ماراپاتتارىن يەلەنگەن, ولاردىڭ قاتارىندا «World Choir Games» قوس التىن مەدالى (لاتۆيا, 2014); «شابىت-2014» حالىقارالىق شىعارماشىل جاستار فەستيۆالىنىڭ باس جۇلدەسى (استانا); «جۇبانوۆ كوكتەمى-2012» حالىقارالىق بايقاۋىنىڭ باس جۇلدەسى (اقتوبە); «حاينۋۆكا» ححح حالىقارالىق رۋحاني مۋزىكا فەستيۆالىنىڭ باس جۇلدەسى (پولشا, بەلوستوك, 2011); بەيجىڭدەگى بۇكىلالەمدىك حور فورۋمىنىڭ ەكى التىن كۋبوگى (قىتاي, 2011); «استانا – ءان قاناتىندا» باس جۇلدەسى (استانا, 2008) جانە ت.ب. بار.
ۇجىمنىڭ كوركەمدىك جەتەكشىسى گۇلميرا قۇتتىباداموۆا ءوزىنىڭ ۇستازى كسرو حالىق ءارتىسى, قازاقستاندىق حور ديريجەرى اناتولي مولودوۆتىڭ ءداستۇرىن لايىقتى تۇردە جالعاستىرا وتىرىپ, ءاردايىم حور مۋزىكاسىن ورىنداۋدا جوعارى شىعارماشىلىق دەڭگەيدى باعىندىرادى.