«ەگەر پوليتسەيلەر بولماعاندا, ماشينامنان دا, جۇكتەن دە تۇك قالماس ەدى. جىگىتتەرگە العىسىمدى ايتامىن, جۇمىستا ابىرويلى بولا بەرسىن», دەدى قىرعىزستاندىق ازامات تاشپۋلات حاسانوۆ.
قوستاناي-اۋليەكول-سۇرعان تاس جولى بويىندا ول جۇرگىزىپ بارا جاتقان ۇلكەن جۇك ماشيناسى تىركەمەسىنىڭ دوڭعالاعىنان ءورت شىعادى. ول ساسىپ قالادى, نە ىستەرىن بىلمەي جۇگىرىپ جۇرگەندە, جول-پاترۋلدىك پوليتسياسى باتالونىنىڭ قىزمەتكەرلەرى بەرىك بايكەنوۆ پەن ارمان جولماعامبەتوۆ كەلە قالادى دا, وزدەرىنىڭ ءورت ءسوندىرۋ قۇرالدارىمەن وتتى ءوشىرىپ الادى. پوليتسەيلەر ءورتتى كورىسىمەن الدىمەن تىركەمەنى ماشيناندان اجىراتادى, جولدى قورشايدى. جولاۋشى ماشينالاردان دا ءورت ءسوندىرۋ قۇرالدارىن الىپ, جانىپ جاتقان دوڭعالاقتى وشىرەدى. بىرگە كەلە جاتقان ۇزاق جولداعى جۇرگىزۋشىلەر دە پوليتسەيلەردىڭ ساۋاتتى, جىلدام, ساسپاي جاساعان قيمىلىنا ريزا بولادى.
«كوز الدىمىزدا ماشينادان وت شىقتى. الىس جولعا شىققان جۇرگىزۋشىلەردىڭ ءورت سوندىرەتىن قۇرالدارى بولۋى ءتيىس. «كەرەك تاستىڭ اۋىرلىعى جوق» د ەگەن عوي اتالارىمىز» دەيدى پوليتسەيلەر. ولار جۇرگىزۋشىگە ماشينانىڭ دوڭعالاعىن اۋىستىرۋعا دا كومەك بەرىپ, جولعا سالىپ جىبەردى. قىرعىزستاندىق تاشپۋلات حاسانوۆ قوستانايلىق پوليتسەيلەردىڭ تەك كومەگىنە عانا ەمەس, ولاردىڭ ادامگەرشىلىگىنە, ونىڭ جاسىن سىيلاعان تاربيەلىلىگىنە دە ريزاشىلىعىن ءبىلدىرىپ, العىسىن ايتا-ايتا كەتىپتى.
ءنازيرا جارىمبەت,
«ەگەمەن قازاقستان»
قوستاناي