جاقىندا عانا گازەتىمىزدە وبلىستىڭ قىسقا دايىندىعى, كومىردىڭ الەۋمەتتىك نىساندارعا قالاي جەتكىزىلىپ جاتقاندىعى جايىندا جازعان ەدىك. وبلىستىق ەنەرگەتيكا جانە تۇرعىن-ءۇي كوممۋنالدىق شارۋاشىلىعى باسقارماسىنىڭ باسشىسى مۇرات مۇساتاەۆپەن سويلەسكەنىمىزدە بۇل تاراپتا ەشقانداي ماسەلە جوقتىعىن, وڭىردەگى مەكتەپتەر كومىرمەن 95 پروتسەنتكە قامتىلعانىن ايتىپ: «جىل سايىن وڭىردە جىلۋ 15 قازاننان باستاپ قوسىلادى.
دەگەنمەن دە, ءبىز 1 قازاندا 100 پروتسەنت دايىن بولۋعا ءتيىسپىز. ءبىلىم, دەنساۋلىق نىساندارىندا كومىر جەتكىلىكتى. قاراجات بولىنگەن. اكىمدىكتەر قاداعالاپ وتىر. سۋىق تۇسسە, كەز كەلگەن ۋاقىتتا جىلۋدى قوسۋعا دايارمىز», دەگەن ەدى. الايدا بۇل مالىمەتتەردىڭ شىندىققا جاناسپايتىنى «نۇر وتان» پارتياسى وبلىستىق فيليالىنىڭ ساياسي كەڭەس بيۋروسىندا بەلگىلى بولدى. ەڭ الدىمەن, بايانداما جاساعان باسقارما باسشىسى ءسوزىن جاپ-جاقسى دەرەكتەرمەن تۇزدىقتاپ, ءوڭىردىڭ جىلۋ جۇيەلەرى قىس ماۋسىمىنا 95,6, سۋمەن قامتۋ جانە ارىق جۇيەلەرى 94, ال بيۋدجەتتىك سالاداعى مەكەمەلەر 97 پروتسەنت دايىن ەكەندىگىن (دەنساۋلىق ساقتاۋ نىساندارى – 96,1, ءبىلىم نىساندارى – 96, الەۋمەتتىك نىساندار – 100 %) جەتكىزگەن.
الايدا ودان كەيىن بايانداما جاساعان وبلىس اكىمىنىڭ ورىنباسارى سەرىك اقتانوۆتىڭ ايماقتىڭ جىلۋ ماۋسىمىنا دايىندىعىنا بايلانىستى ەسەبى وزگەشە بولىپ شىقتى. ءوڭىر باسشىسىنىڭ كوممۋنالدىق شارۋاشىلىققا جاۋاپتى ورىنباسارى 5 قىركۇيەكتەگى جاعداي بويىنشا ريددەر قالاسى مەن بورودۋليحا جانە ۇلان اۋداندارىنداعى ءبىلىم نىساندارىنا كومىر جەتكىزىلمەگەنىن, تارباعاتاي اۋدانىن كومىرمەن قامتۋ كورسەتكىشى نەبارى 13 پروتسەنتتى قۇراعانىن, سول ۋاقىتتا سەمەي قالاسى مەن گلۋبوكوە اۋدانىنىڭ دەنساۋلىق نىساندارى – 37, كوكپەكتى اۋدانى قاتتى وتىنمەن 44 پروتسەنت قامتىلعانىن, ال حالىققا كومىر جەتكىزۋ كۇرشىم مەن زايسان اۋداندارىندا – 30, سەمەيدە 31 پروتسەنتتەن اسپاي وتىرعانىن مالىمدەدى. جانە بۇعان وبلىستىق ەنەرگەتيكا جانە تۇرعىن-ءۇي كوممۋنالدىق شارۋاشىلىعى باسقارماسى مەن كەيبىر قالا-اۋدان اكىمدەرىنىڭ ءوز جۇمىسىنا سالعىرتتىق تانىتقانى سەبەپ بولعاندىعىن دا جاسىرماي ايتتى.
وبلىس اكىمى ورىنباسارىنىڭ كەلتىرگەن دەرەكتەرىن بەسقاراعاي اۋدانىنىڭ اكىمى داۋلەت باتىرباەۆ تا شەگەلەي ءتۇسىپ, اۋدانداعى ءبىلىم نىساندارى كومىرمەن بار بولعانى 25 پروتسەنتكە قامتىلعانىن تىلگە تيەك ەتتى. بۇل ولقىلىقتى جيىندى جۇرگىزىپ وتىرعان «نۇر وتان» پارتياسى وبلىستىق فيليالىنىڭ توراعاسى, وبلىس اكىمى دانيال احمەتوۆ قاتتى سىنعا الدى. «ەنەرگەتيكا باسقارماسى مەن اكىمدەردىڭ دەرەكتەرى ءبىر-بىرىنە سايكەس كەلمەيدى. بۇل باسقارمانىڭ بىزگە جالعان مالىمەتتەر بەرىپ وتىرعاندىعىن كورسەتەدى», دەگەن وبلىس اكىمى ەنەرگەتيكا جانە تۇرعىن-ءۇي كوممۋنالدىق شارۋاشىلىعى باسقارماسىنىڭ باسشىسى مۇرات مۇساتاەۆقا پارتيالىق قاتاڭ سوگىس جاريالاناتىنىن جەتكىزدى.
ازامات قاسىم,
«ەگەمەن قازاقستان»
وسكەمەن