استانادا يرينا بەكەتوۆا ەسىمدى ءجۋرناليستىڭ ولىمىنە قاتىستى 34 جاستاعى ەر ادام كۇدىكتى رەتىندە انىقتالدى, دەپ حابارلايدى استانا قالالىق ءىىد-ءنىڭ ءباسپاسوز قىزمەتى.
ءجۋرناليستىڭ ءولىمى تۋرالى الەۋمەتتىك جەلىدە ارىپتەستەرى حابارلادى. ولاردىڭ ايتۋىنشا, ءتىلشىنىڭ سوڭىندا ءۇش ۇلى مەن ءبىر قىزى قالعان.
«بۇگىن ارىپتەسىمىز ءارى جاقىن ارالاسقان دوسىمىز يرينا بەكەتوۆادان ايىرىلىپ قالدىق. ارتىندا اڭىراپ ءۇش ۇلى جانە ءبىر قىزى قالدى. وكىنىشتىسى, يرا ءالى جاس ەدى, بالالارى قاناتتانباعان سارى اۋىز بالاپان سەكىلدى تىم كىشكەنتاي, تۇلا بويى تۇڭعىشى ومىرزاق بولسا, مۇگەدەك, اقىلبەگى ەندى عانا ەكىنشى سىنىپقا كوشتى, جانساياسى مەن جانبولاتى ەندى ۇشتەن اسقان, بالاباقشادا», - دەپ جازادى يرينانىڭ ارىپتەستەرىنىڭ ءبىرى.
كوپ كەشىكپەي استانانىڭ قۇقىق قورعاۋشىلارى كۇدىكتىنىڭ انىقتالعانىن ءمالىم ەتتى. «استانا قالاسىنىڭ قۇقىق قورعاۋشىلارى 34 جاستاعى قالا تۇرعىنىن سەزىكتى رەتىندە انىقتادى. ول كىسى ولىمىنە اكەپ سوققان, قاساقانا تۇردە اۋىر دەنە جاراقاتىن سالۋ كۇدىگىنە ءىلىنىپ وتىر. كۇدىكتىنى قولعا ءتۇسىرۋ ءۇشىن بارلىق شارالار جۇرگىزىلىپ, قاجەتتى ساراپتاما جۇمىستارى تاعايىندالدى. قازىرگى تاڭدا سوتقا دەيىنگى تەرگەۋ امالدارى جۇرگىزىلىپ جاتىر», - دەلىنگەن حابارلامادا.