تاياۋدا الماتى وبلىسىنىڭ جەتىگەن ەلدى مەكەنىندە ورنالاسقان قازاقستان رەسپۋبليكاسى ۇلتتىق ۇلانىنىڭ ارنايى ماقساتتاعى جاۋىنگەرلىك جانە ادىستەمەلىك دايىندىق ورتالىعىندا ۇلتتىق ۇلانداعى بارلىق اسكەري ءبولىم كومانديرلەرىنىڭ وقۋ-ادىستەمەلىك جيىنى ءوتتى.
ءۇش كۇنگە سوزىلعان وقۋ-ادىستەمەلىك جيىن ۇلتتىق ۇلان باس قولباسشىسىنىڭ ارنايى بۇيرىعى نەگىزىندە وسى جىلدى ۇلتتىق ۇلان قۇرامىندا «2018 جىل – كاسىبي بىلىكتىلىك جىلى» دەپ جاريالانۋىمەن ۇشتاستىرىلىپ, كەڭ كولەمدە العاش رەت ۇيىمداستىرىلدى. مۇنداعى كوزدەلگەن نەگىزگى باسىمدىق اسكەردىڭ الدىڭعى بۋىن وفيتسەرلەرىنىڭ كاسىبي بىلىكتىلىگىن جوعارىلاتۋعا باعىتتالعان. ياعني, ارنايى ماقساتتاعى اسكەري بولىمدەرى, تۇزەۋ مەكەمەلەرى مەن اسا ماڭىزدى نىسانداردى كۇزەتۋ جونىندەگى اسكەري بولىمدەرى جانە توتەنشە جاعدايلار بويىنشا اسكەري ءبولىم كومانديرلەرى تەوريالىق جانە تاجىريبەلىك سىناقتار تاپسىردى. ناقتىلاي تۇسسەك, قاتىسۋشىلار جاۋىنگەرلىك دايىندىقتىڭ نەگىزگى تۇرلەرىنەن: اتۋ قارۋىمەن, دەنە دايىندىعى, ادىستەمەلىك, مەملەكەتتىك-قۇقىقتىق دايىندىق پەن جالپى اسكەري جارعىدان, تاكتيكا مەن جەدەل شەشىم قابىلداۋدىڭ شەبەرلىگىنەن جانە اسكەردى باسقارۋ ونەرىنەن سىناقتار تاپسىردى.
شارانىڭ العاشقى كۇنى كومانديرلەر پسيحولوگيالىق تەستەن ءوتىپ, ارنايى قۇرىلعىلار ارقىلى ولاردى پسيحولوگيالىق جانە پسيحوفيزيولوگيالىق دياگنوستيكادان وتكىزۋ جۇمىستارى دا جوسپارعا ساي جۇرگىزىلدى. وسى ورايدا ايتا كەتەرلىك جايت, بۇگىنگى تاڭدا ۋاقىت تالابىمەن ۇندەسەتىن زاماناۋي دياگنوستيكادان وتكىزۋگە ارنالعان مۇنداي قۇرىلعىلارمەن ۇلتتىق ۇلاننىڭ ءۇش وڭىرلىك قولباسشىلىعى تولىق دەرلىك قامتىلعان.
سونىمەن قاتار جيىنعا قاتىسۋشىلار جەتەكشى قۇجاتتار مەن بۇيرىقتاردى ءبىلۋ جونىنەن ارنايى تەستىلەۋدەن ءوتتى. جيىنعا جەتەكشىلىك ەتكەن ۇلتتىق ۇلان باس قولباسشىسىنىڭ ورىنباسارى, گەنەرال-مايور البەرت ماتكاريموۆتىڭ ايتۋىنشا, وقۋ-ادىستەمەلىك جيىننىڭ ساباقتارى نەگىزىنەن تاجىريبەلىك تۇرعىدا ماشىقتاندىرۋعا ارنالعان. سونىڭ اياسىندا ۇيىمداستىرۋشىلار وقۋ-ادىستەمەلىك جيىنعا قاتىسۋشى وفيتسەرلەردىڭ قارۋ تۇرلەرىن كۇندىز بەن تۇندە پايدالانۋىن, ارنايى جاتتىعۋ قۇرىلعىلارىندا جاۋىنگەرلىك تەحنيكالاردى تىزگىندەۋ قابىلەتىن تانىتا وتىرىپ, ءوز شەبەرلىكتەرىن كورسەتۋىنە باسىمدىق بەرىلدى. ءبولىم كومانديرلەرى جاۋىنگەرلىك ۇرىس جاعدايىنا بەيىمدەلگەن ءتۇرلى سيپاتتاعى دابىل بويىنشا ءوز شەبەرلىكتەرىن شىڭدادى.
سونداي-اق جيىن بارىسىندا كومانديرلەرگە اسكەرگە جاڭادان كەلىپ جاتقان سوڭعى ۇلگىدەگى كوزدەۋ قۇرالدارى مەن جاتتىعۋ قۇرىلعىلارى, ناقتىلاپ ايتساق, لازەرمەن يمميتاتسيالانعان مۋلتيمەديالىق اتۋ ءتيرىنىڭ جانە باسقا دا قۇرىلعىلاردىڭ قىر-سىرى تانىستىرىلدى.
شەبەرلىكتى شىڭداۋعا باعىتتالعان وقۋ-ادىستەمەلىك جيىندى ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆ قورىتىندىلاپ, ىشكى ىستەر ءمينيسترى مەن باس قولباسشىنىڭ اسكەري بولىمدەردىڭ جاۋىنگەرلىك دايارلىعىن جەتىلدىرۋگە قاتىستى الداعى ۋاقىتقا ناقتىلانعان تاپسىرمالارى بەرىلدى.
ەستەرىڭىزگە سالا كەتەيىك, ۇلتتىق ۇلاننىڭ ارنايى ماقساتتاعى جاۋىنگەرلىك جانە ادىستەمەلىك دايىندىق ورتالىعى 2016 جىلى مەملەكەت باسشىسى – قازاقستان قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆتىڭ قاتىسۋىمەن اشىلعان بولاتىن. حالىقارالىق تالاپقا ساي كەلەتىن اتالعان ورتالىقتا ءىىم مەن ۇلتتىق ۇلاننىڭ اسكەريلەرى جانە وزگە دە كۇش قۇرىلىمدارىنىڭ ماماندارى كاسىبي بىلىكتىلىكتەرىن شىڭداپ كەلەدى.
«ەگەمەن-اقپارات»